Rahul Gandhi News : शशी थरूरांच्या नाराजीची चर्चा अन् राहुल गांधींनी शेअर केला खास फोटो! द्यायचा तो संदेश दिला...

Kerala Politics : काँग्रेसचे केरळमधील खासदार आणि माजी केंद्रीय मंत्री शशी थरूर यांच्या नावाची सध्या देशाच्या राजकीय वर्तूळात जोरदार चर्चा होत आहे. पक्षावर ते नाराज असल्याचे त्यांच्या काही विधानांवरून स्पष्ट झाले होते. त्यातच पंतप्रधान नरेंद्र मोदींचे कौतुक करत त्यांनी पक्षातील नेत्यांची नाराजीही ओढवून घेतली होती.

शशी थरूर यांच्या नाराजीची चर्चा असतानाच लोकसभेतील विरोधी पक्षनेते राहुल गांधी यांनी रविवारी सोशल मीडियात एक खास फोटो शेअर केला आहे. थरूर यांच्या नाराजीप्रमाणे केरळ काँग्रेसमधील इतर नेत्यांच्या नाराजीवरही त्यांनी पडदा टाकण्याचा प्रयत्न केला आहे. तसेच थरूर आणि विरोधी पक्षांनाही द्यायचा तो संदेश दिला आहे.

राहुल यांनी 28 फेब्रुवारीला दिल्लीमध्ये पक्षाच्या नेत्यांसोबत बैठक घेतली होती. या बैठकीनंतर केरळ काँग्रेसमधील नेत्यांचा पत्रकार परिषदेतील एक फोटो राहुल यांनी सोशल मीडियात शेअर केला आहे. त्यासोबत त्यांनी पक्षातील सर्व नेते केरळमध्ये एकजुट आणि आणि मिळून काम करत असल्याचे लिहिले आहे.

राहुल गांधींनी पोस्ट केलेल्या फोटोमध्ये शशी थरूरही आहेत. त्यांच्या नाराजीच्या पार्श्वभूमीवर राहुल यांनी पक्षातील नेते एकजुट असल्याचा संदेश इतर पदाधिकारी व कार्यकर्ते तसेच विरोधकांना देण्याचा प्रयत्न केला आहे. पुढील काही महिन्यांत केरळमध्ये विधानसभेची निवडणूक आहे. यापार्श्वभूमीवर त्यांच्याकडून पक्षातील सर्वकाह आलबेल असल्याचा सूचक संदेश देण्यात आला आहे.

दरम्यान, दोन दिवसांपूर्वी झालेल्या बैठकीत केरळमधील विधानसभा निवडणुकीच्या रणनीतावरही चर्चा झाली. जे नेते पक्षाच्या धोरणाविरोधात बोलतील, त्यांच्यावर कडक कारवाई केली जाईल, असा इशाराही नेत्यांना देण्यात आला आहे. थरूर यांच्या उपस्थितीत झालेली ही बैठक तीन तास चालली होती.