Supreme Court: मुलीच्या लग्नासाठी वडील आपली संपत्ती विकू शकतात! सुप्रीम कोर्टाचा मोठा निर्णय

Supreme Court: लग्नांमध्ये वरेमाप खर्च न करण्याचं आणि पैसा जपून वापरण्याचं कायमच आवाहन केलं जातं. पण दुसरीकडं बडेजाव करण्यासाठी कर्ज काढून लग्न करणारे आपल्याकडं कमी नाहीत. मात्र, या महत्वाच्या चर्चेमध्ये सुप्रीम कोर्टानं लग्नाच्या खर्चासंदर्भात एक महत्वाचा निकाल दिला आहे. मुलीच्या लग्नासाठी वडील आपली संपत्ती विकू शकतात, असा निकाल सुप्रीम कोर्टानं दिला आहे. ही बाब कायदेशीर गरज असल्याचंही कोर्टानं म्हटलं आहे.

न्या. संदीप मेहता आणि न्या. जायमाल्य बागची यांच्या खंडपीठानं म्हटलं की, "भलेही मुलीचं लग्न हे मालमत्ता विक्रीच्या आधीच झालं असेल पण तिच्या विवाहासाठी घेतलेलं कर्ज आणि खर्चाचा परिणाम अनेक वर्षे कायम राहतो. त्यामुळं अशा प्रकारचं कर्ज फेडण्यासाठी वडिलांनी आपली मालमत्ता विकली तर तो व्यवहार वैध मानली जाईल. हा निकाल देताना खंडपीठानं कर्नाटक हायकोर्टाचा २००७चा निकाल रद्द ठरवला. यामध्ये कनिष्ठ कोर्टाचा आदेश बदलून HUFच्या (हिंदू अविभाजित कुटुंब) संपत्तीची विक्री अवैध ठरवली होती.

कनिष्ठ कोर्टाला निकाल बदलला

कनिष्ठ कोर्टानं सुरुवातीला मालमत्ता खरेदी करणाऱ्याच्या बाजूनं निर्णय दिला होता. या प्रकरणाला तेव्हा सुरुवात झाली जेव्हा HUF कुटुंबातील चार मुलांपैकी एका मुलानं आपल्या वडिलांनी केलेल्या मालमत्तेच्या विक्रीला कोर्टात आव्हान दिलं होतं. या खटल्यात वडील आणि त्यांच्या पत्नीनं जबाब दिला की संपत्ती विकण्याचा हेतू हा मुलगी काशीबाईच्या लग्नासाठी काढलेलं कर्ज फेडणं हा होता. या मालमत्ता विक्रीला ५ वा प्रतिवादी म्हणजेच खरेदीदारानं देखील 'कायदेशीर गरजे'चा हवाला देत योग्य ठरवलं आहे.

सुप्रीम कोर्टानं म्हटलं की, खरेदीदारानं पुरावे सादर करत ही बाब सिद्ध केली की संपत्तीची विक्री लग्नाच्या खर्चाशी संबंधित होती. कोर्टात सादर झालेल्या मालमत्तेच्या कागदपत्रांवर वडिलांसह पत्नी, मुलगी आणि दोन मुलांच्या सह्या देखील होत्या. यावरुन ही गोष्ट सिद्ध होते की, या मालमत्ता विक्रीमध्ये कुटुंबातील इतर सदस्यांची सहमती देखील होती.