ज्योतिरादित्य शिंदेंनी बदलला राजघराण्याचा इतिहास; 160 वर्षांत पहिल्यांदाच...

ग्वाल्हेर : केंद्रीय मंत्री ज्योतिरादित्य शिंदे (Jyotiraditya Scindia) यांनी रविवारी राजघराण्याचा इतिहास बदलून टाकला. त्यांनी झाशीची राणी लक्ष्मीबाई (Rani Lakshmibai) यांच्या समाधीवर जात डोकं टेकवलं. मागील 160 वर्षात पहिल्यांदाच शिंदे घराण्यातील प्रमुखाने राणी लक्ष्मीबाई यांच्या समाधीचे दर्शन घेतले. त्यामुळे शिंदे यांच्या या कृतीची सर्वत्र जोरदार चर्चा रंगली आहे. शिंदे यांनी आपल्या कृतीतून विरोधकांना चपराक लगावल्याचे सांगितले जात आहे.

शिंदे यांनी रविवारी ग्लाल्हेरमधील एलिवेटेड रस्त्याची पाहणी केली. त्यानंतर राणी लक्ष्मीबाई यांच्या समाझीवपळ या प्रकल्पाची माहिती घेण्यासाठी पोहचले होते. इथे पोहचल्यानंतर शिंदे यांनी प्रकल्पाची माहिती घेण्याआधी थेट समाधी गाठली. शिंदेंना तिकडे जाताना पाहून त्यांचे समर्थक प्रद्युम्न सिंह तोमर हेही धावत मागे गेले. समाधीस्थळी पोहचताच शिंदे यांनी समाधीवर डोकं टेकवलं.

शिंदे यांनी समाधीला प्रदक्षिणा घालत पुन्हा नतमस्तक झाले. शिंदे यांच्या या कृतीमुळे त्यांच्या राजघराण्याचा इतिहासच बदलू गेल्याचे मानले जात आहे. शिंदे राजघराण्यावर आतापर्यंत राणी लक्ष्मीबाई यांच्याबाबत नेहमीच प्रश्न उपस्थित केले जात आले आहेत. शिंदे राजघराण्याने 1857 मध्ये इंग्रजांसोबत झालेल्या लढाईत राणी लक्ष्मीबाई यांना मदत केली नव्हती. त्यांनी इंग्रजांना मदत केली होती, असे मानले जाते.

युध्दात राणी लक्ष्मीबाई यांचा मृत्यू झाल्यानंतर तिथेच समाधी उभारण्यात आली होती. त्यानंतर आतापर्यंत एकदाही शिंदे राजघराण्यातील कोणताही सदस्य समाधीस्थळी आला नव्हता. मागील 160 वर्षांत राजघराण्यातील कुणीच राणी लक्ष्मीबाई यांना अभिवादन केलं नव्हतं. त्यावरून शिंदे घराण्यावर टीकाही होत होती. अनेक आरोपही केले जात होते. पण ज्योतिरादित्य शिंदे यांनी रविवारी समाधीस्थळी येऊन आरोप करणाऱ्यांना आपल्या कृतीतून अप्रत्यक्षपणे चोख प्रत्युत्तर दिल्याचे बोलले जात आहे.