Mukhtar Ansari Dies: माफिया मुख्तार अन्सारीचा हृदयविकाराच्या झटक्याने मृत्यू

Mukhtar Ansari Death Heart Attack : उत्तर प्रदेशच्या बांदा जेलमध्ये (Banda Jail of Uttar Pradesh) शिक्षा भोगत असलेला माफिया डॉन मुख्तार अन्सारीचा मृत्यू झाला आहे. मुख्तार अन्सारीला हृदयविकाराचा झटका आल्यामुळे तो तुरुंगात बेशुद्ध अवस्थेत पडला होता. त्यानंतर तुरुंगातील अधिकाऱ्यांनी त्याला रुग्णालयात उपचारासाठी दाखलं केले. त्याला मोठ्या फौजफाट्यासह रुग्णालयात नेण्यात आलं. मात्र, उपचारादरम्यान अन्सारी (Mukhtar Ansari Dies of Cardiac Arrest) याचा मृत्यू झाला.

रुग्णालयात दाखल केल्यानंतर मुख्तारला आयसीयूमधून सीसीयूमध्ये दाखल करावे लागणार होते. इथे त्याच्यावर उपचार करण्यासाठी 9 डॉक्टरांची टीम तैनात करण्यात आली होती. मात्र, त्याचा जीव वाचवण्यात डॉक्टरांना अपयश आलं.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

दरम्यान, मंगळवारी त्याला वैद्यकीय महाविद्यालयात दाखल करण्यात आले होते. डॉक्टरांनी उपचारानंतर त्याला त्याच दिवशी तुरुंगात पाठवले होते. बुधवारी तुरुंगात त्यांच्या प्रकृतीची चाचणी करण्यात आली, ज्यामध्ये सर्व काही सामान्य असल्याचे आढळून आले होते. परंतु आज तुरुंगातच त्याला हृदयविकाराचा झटका आला आणि उपचारादरम्यान अखेर त्याचा मृत्यू झाल्याची माहिती समोर आली आहे.

(ताज्या बातम्या)

60 वर्षांचा मुख्तार याने सुनावणीदरम्यान न्यायालयात आरोप केला होता की, तुरुंगात आपली हत्या करण्याचा प्रयत्न केला जात आहे. त्याच्या जेवणात स्लो पॉईझन (Slow Poison) दिले जात असल्याने त्यांची प्रकृती बिघडत आहे. दरम्यान, एमपीएमएलए न्यायालयानेही या प्रकरणी तुरुंग प्रशासनाकडून अहवाल मागवला होता.

मुख्तारच्या मृत्यूनंतर गाझीपूर आणि मऊसह इतर संवेदनशील जिल्ह्यांमध्ये हाय अलर्ट जारी करण्यात आला आहे. खबरदारीचा उपाय म्हणून मोठ्या प्रमाणात पोलिसांचा फौजफाटा तैणात करण्यात आला आहे. मऊ, बांदा आणि गाझीपूरमध्ये (Ghazipur) कलम 144 लागू करण्यात आल्याची माहिती मिळाली आहे.

(Edited By - Jagdish Patil)

R