Kolhapur News: हत्तीला हात लावू देणार नाही! प्रसंगी शेतकऱ्यांचे मुडदे पाडा, यड्रावकरही संतापले

Kolhapur News : कोल्हापूर जिल्ह्यातल्या शिरोळ तालुक्यातील नांदणी इथं जीनसेन मठातील महादेवी हत्तीला गुजरातमधील वनतारा संग्रहालयात पाठवण्याचा आदेश हायकोर्टानं दिल्यानंतर नांदणी गावांमध्ये संतापाची लाट उसळली आहे. त्याला स्थगिती मिळवण्यासाठी ग्रामस्थांकडून सुप्रीम कोर्टात याचिका दाखल करण्यात आली आहे.

संदर्भात आज या गावातील सर्व समाजबांधवांनी आणि ग्रामस्थांकडून मूक मोर्चा काढण्यात आला, यावेळी संतप्त भावना उमटल्या. मोठ्या काळापासून या मठाला हत्ती सांभाळण्याची परंपरा आहे. हा हत्ती नेण्याच्या हालचाली सुरू झाल्या असल्या तरी आम्ही ते होऊ देणार नाही. प्रशासनाला हत्तीला हात लावू देणार नाही. प्रसंगी, शेतकऱ्यांचे मुडदे पाडा अशा संतप्त भावना ग्रामस्थांनी व्यक्त केल्या आहेत.

शिरोळचे आमदार राजेंद्र पाटील यड्रावकर यांनी देखील हा प्रकार निषेधार्थ असल्याचे म्हटलं आहे. गेली अनेक वर्षे ही परंपरा सुरू आहे साडेसातशेपेक्षा अधिक गावे या मठाच्या अधिपत्याखाली येतात. गेल्या अनेक वर्षांपासून या मठाचा हत्तीचा इतिहास आहे. अनेक पारंपरिक कार्यक्रमात आणि धार्मिक कार्यक्रमात हत्तीचा वापर होतो. 2019 पासून हा हत्ती इथून नेण्यापासून प्रयत्न झाले आहेत. मात्र, ग्रामस्थांच्या एकीमुळं हा प्रयत्न फसला.

कोणतेही निर्णय न्यायालय देणार नाही तशा पद्धतीचा निर्णय हायकोर्टानं दिला आहे. पोलीस संरक्षण देण्याची टिपण्णी न्यायालयानं केली आहे. मात्र, जैन समाज हा अहिंसावादी आहे, अशा घटनेला पोलीस संरक्षण द्यावं असं जर न्यायालय म्हणत असेल तर यामध्ये पूर्वग्रह दूषित निर्णय असण्याची शंका येते, असा आरोप आमदार राजेंद्र पाटील यड्रावकर यांनी केला.

समाजाला हा निर्णय मान्य नसल्यानं आम्ही सुप्रीम कोर्टात गेलो आहे. संदर्भात निर्णय नाही झाला तर आक्रमक पद्धतीनं आंदोलन होईल. महादेवी (माधुरी) हत्ती हा स्वाभिमान आणि अभिमानाची गोष्ट आहे. हा हत्ती नेला जाऊ नये ही लोक भावना आहे. या हत्तीची कुठेही हेळसांड झालेली नाही, याची जबाबदारी हे मठ अधिष्ठान घेत आहे. हा प्रकार निषेधार्य आहे, सुप्रीम कोर्टातून जे काही प्रयत्न करावे लागतील ते प्रयत्न आम्ही करु, असंही आमदार यड्रावकर यांनी यावेळी सांगितलं.