Manikrao Kokate: पैसे पाठवतोय रम्मी खेळा अन् जिंकल्यावर मलाही पाठवा पैसे! शेतकरी तरुणानं कोकाटेंना केली मनीऑर्डर

Manikrao Kokate: कृषीमंत्री माणिकराव कोकाटे यांनी विधानसभेत रम्मी खेळत असल्याचं कॅमेरॅत कैद झाल्यानं ते टीकेचे धनी बनले आहेत. राज्यात शेतकऱ्यांची बिकट अवस्था असताना कृषीमंत्री भलत्याच कारणासाठी चर्चेत राहत असल्यानं नाशिक जिल्ह्यातल्या निफाडच्या एका तरुण शेतकऱ्यानं चक्क कृषीमंत्र्यांना मनीऑर्डर पाठवली आहे. तसंच मनीऑर्डरच्या या पैशातून रम्मी खेळा आणि त्यातून जिंकलेले पैसे आपल्यालाही पाठवावेत असं या शेतकऱ्यानं म्हटलं आहे.

निफाड तालुक्यातील देवगा या गावचा रहिवासी असलेल्या योगेश खुळे नामक तरुणानं कृषीमंत्री कोकाटे यांना ५ हजार ५०० रुपयांची मनीऑर्डर केली आहे. बाजारातून आणलेलं सोयाबिनचं बियाणं पावसामुळं पेरता आलं नाही, त्यामुळं घरात पडून राहिलेलं हे बियाणं विकून त्यातून मिळलेले साडेपाच हजार रुपये त्यानं थेट कृषीमंत्र्यांना पाठवून दिले.

कृषीमंत्री माणिकराव कोकाटे यांना मनीऑर्डर केल्यानंतर योगेश खुळे यानं आपल्या भावना मीडियासमोर व्यक्त केल्या आहेत. त्यानं म्हटलं की, माझ्या क्षेत्रात पेरणीसाठी मी जे सोयाबिनचं बियाणं घेतलं होतं, हे सोयाबिनचं बियाणं मी दुसऱ्यांना विकून त्यातून आलेले ५,५५० रुपये मी कोकाटे साहेबांना मनिऑर्डरद्वारे पोस्टाने पाठवले आहेत. मला राज्यातील कृषीमंत्र्यांकडून एकच अपेक्षा आहे की त्यांनी मी पाठवलेल्या पैशातून रमीचा एक डाव खेळावा आणि त्यातून मला पैसे मिळवून द्यावेत. कारण माझ्याकडं आज कुठल्याही प्रकारचं उत्पन्नाचं साधन राहिलेलं नाही.

दरम्यान, पावसाळी अधिवेशन सुरु असताना विधानसभेचं कामकाज सुरु असताना कृषीमंत्री माणिकराव कोकाटे हे आपल्या मोबाईलवर रम्मी अर्थात पत्ते खेळत असल्याचं दिसून आलं. कोणीतरी त्यांच्या नकळत त्यांचा पत्ते खेळतानाचा व्हिडिओ काढला आणि तो आमदार रोहित पवार यांच्याकडं सुपूर्द केला. त्यानंतर रोहित पवारांनी तो आपल्या सोशल मीडियावर शेअर केला. त्यानंतर हा व्हिडिओ तुफान चर्चेत आला पण त्यामुळं माणिकराव कोकाटे मात्र चांगलेच अडचणी आले आहेत. विरोधकांनी सातत्यानं कृषीमंत्री कोकाटेंचा राजीनामा घ्यावा अशी मागणी केली असून राष्ट्रवादी काँग्रेसचे अध्यक्ष अजित पवार यांच्यावर यामुळं दबाव निर्माण झाला आहे.