Pawar Vs Thackeray : विधानसभेत सगळेच खोके म्हणणाऱ्या राज ठाकरेंना अजित पवारांनी डिवचले; म्हणाले, 'कधी निवडणूक...'

Ajit Pawar News : बीड जिल्ह्यात सतीश भोसले उर्फ खोक्याच्या गुन्हेगारी कृत्यांची चर्चा सुरू आहे. खोक्याला पोलिसांनी अटक देखील केली आहे. खोक्याबाबत बोलताना राज ठाकरे यांनी तुम्ही एका खोक्याभाईचे काय घेऊन बसलात सर्व विधानसभाच खोक्याभाईंनी भरली आहे, असे वक्तव्य केले होते. त्यांच्या या वक्तव्यानंतर आशिष शेलार यांनी राज ठाकरेंवर टीका केली होती. आता उपमुख्यमंत्री अजित पवार यांनी ठाकरेंना बोचरा सवाल करत त्यांची कोंडी केली आहे.

उपमुख्यमंत्री अजित पवार यांना पत्रकारांनी राज ठाकरे यांच्या खोक्या विषयीच्या विधानविषयी विचारले असता त्यांनी मनसेच्या निवडणुकीतील अपयशावर बोट ठेवत विचारले "तुम्ही कधी निवडून आलाय का?"

अजित पवार यांनी निवडणुकीतील मनसेच्या अपयशावर बोट ठेवून राज ठाकरेंवर पलटवार केला आहे. त्यावेळी राज ठाकरे हे गुडी पाडव्याला मनसेची जाहीर सभा घेणार आहेत. त्या दिवशी या टीकेला काय प्रत्युतर देतात याकडे मनसे कार्यकर्त्यांचे लक्ष असणार आहे.

आशिष शेलारांनी सुनावले

आशिष शेलार यांनी राज ठाकरे यांच्यावर टीका करताना म्हटले होते की, आपलं अस्तित्व दाखवून देण्यासाठी एखादं वक्तव्य करणं आणि आपल्याकडे ध्यान आकर्षित करून घेणं हे संबंध महाराष्ट्राला आता कळून चुकलं आहे. ज्यांनी जनतेचे काम केलं त्यांना महाराष्ट्राच्या जनतेने निवडून दिले असून ते विधानसभेत बसले आहे. मात्र ज्यांना निवडून येता येत नाही तसेच जनता निवडून देत नाही. ते विधानसभेत न जाता विधान करण्याच्या कार्यक्रमात व्यस्त आहेत.

राज ठाकरे मनातलं बोलणार

मनसे गुढी पाडव्याला मेळावा घेणार आहे. या मेळाव्यात राज ठाकरे मार्गदर्शन करणार आहेत. मागे एका कार्यक्रमात बोलताना राज ठाकरे म्हणाले, गुढी पाडव्याच्या मेळावाला सगळं स्पष्ट बोलणार आहे. त्यामुळे राज ठाकरे या मेळाव्यातून आपल्या टीकारांना काय उत्तर देणार तसेच महापालिका निवडणुकीसाठी महायुतीसोबत जाणार की नाही? याचे स्पष्ट संकेत मिळण्याची शक्यता आहे.