Ajit Pawar Politics : छगन भुजबळांच्या मराठा विरोधी भूमिकेवर अजित पवार नाराज, कडक शब्दांत सुनावलं!

Ajit Pawar News : हैद्रबाद गॅझेटच्या जीआरनंतर राष्ट्रवादी काँग्रेसचे ज्येष्ठ नेते आणि मंत्री छगन भुजबळ हे आक्रमक झाले आहेत. मराठा समाजाला या जीआरच्या माध्यमातून ओबीसींमध्ये घुसवण्यात आले असल्याचा आरोप ते करत आहेत. त्यांनी मराठा विरोधी भूमिका घेतल्याने उपमुख्यमंत्री अजित पवार नाराज असल्याची माहिती आहे. पक्षाच्या बैठकीत त्यांनी भुजबळांचे नाव न घेता खडेबोल सुनावल्याची माहिती आहे.

राष्ट्रवादीच्या काही नेत्यांनी घेतलेल्या टोकाच्या भूमिकेमुळे पक्षाची प्रतिमा खराब होत असून त्याची राजकीय किंमत पक्षाला मोजावी लागेल, अशा शब्दांत अजित पवार यांनी नाराजी व्यक्त केले.

दोन दिवसांपूर्वी राष्ट्रवादी काँग्रेसच्या सर्व आमदारांची बैठक मुंबईतील एका हाॅस्पिटलमध्ये पार पडली. त्यावेळी मराठा-ओबीसी तणावाच्या अनुषंगाने चिंता व्यक्त करण्यात आली. तर, काही नेते टोकाची भूमिका घेत असल्याने त्याचा फटका बसेल, अशी भीती देखील काही आमदार खासगीत व्यक्त करत होते.

नागपूरच्या शिबिरामध्ये देखील अजित पवार यांनी भुजबळ यांचे नाव न घेता ज्या मंत्र्यांना इतर कामे असतील त्यांनी मंत्रिपद खाली करावे, असा इशारा दिला होता. आगामी स्थानिक स्वराज संस्थांच्या पार्श्वभूमीवर मराठा-ओबीसी तणाव वाढत असून जे नेते ओबीसींच्या व्यासपीठावर दिसतील त्यांना आम्ही पाडणार, असा इशारा मराठा आंदोलक मनोज जरांगे पाटील यांनी दिला आहे.

अजित पवारांनी साप पाळलाय...

मंत्री छगन भुजबळ यांच्यावर टीका करताना मनोज जरांगे पाटील यांनी अजित पवार यांनी साप पाळलाय,असे म्हटले. त्यावर भुजबळ यांना पत्रकारांनी विचारले असता म्हटले, त्याला काही काम धंदा नाही, तुम्ही त्याच्या काय नादी लागलाय. त्याचे शिक्षण किती? काही माहिती आहे का? असे देखील भुजबळ म्हणाले.