NCP Symbol Dispute : राष्ट्रवादीचं 'घड्याळ' कुणाचं? सुप्रीम कोर्टाच्या सुनावणीपूर्वीच 'तडजोडी'ची चर्चा; शरद पवार, अजितदादा एकत्र येणार?

राष्ट्रवादी काँग्रेसच्या पक्षचिन्हावरून सुरू असलेला वाद पुन्हा एकदा ऐरणीवर आला आहे. घड्याळ नेमकं कुणाचं, यावर सर्वोच्च न्यायालयात 21 जानेवारीला महत्त्वाची सुनावणी होणार आहे. मात्र त्याआधीच राजकीय वर्तुळात वेगवेगळ्या चर्चांना उधाण आलं आहे. शरद पवार आणि अजित पवार पुन्हा एकत्र येणार का, असा प्रश्न राजकीय चर्चांचा केंद्रबिंदू ठरला आहे.

नुकत्याच झालेल्या महापालिका निवडणुकांमध्ये राष्ट्रवादी काँग्रेसचा बालेकिल्ला असलेल्या भागांत दोन्ही गटांनी एकत्र येत आपली ताकद दाखवण्याचा प्रयत्न केला होता. वैचारिक मतभेद बाजूला ठेवून निवडणूक रणनीती आखण्यात आली होती. स्थानिक पातळीवर समन्वय साधत प्रचारही करण्यात आला. मात्र प्रत्यक्ष निकाल पाहता हा प्रयोग अपेक्षेइतका यशस्वी ठरला नाही. भाजपने आक्रमक प्रचार, मजबूत संघटनाच्या जोरावर बाजी मारली.

तरीही या निकालानंतर राष्ट्रवादीतील हालचाली थांबलेल्या नाहीत. उलट आगामी जिल्हा परिषद आणि पंचायत समिती निवडणुकांच्या पार्श्वभूमीवर पुन्हा एकत्र येण्याच्या चर्चा जोर धरू लागल्या आहेत. विशेषतः बारामती परिसरात झालेल्या बैठकींमध्ये दोन्ही गटांनी स्थानिक स्वराज्य संस्थांच्या निवडणुका एकत्र लढवण्याच्या शक्यतांवर विचार केल्याची माहिती समोर येत आहे.

यातच आता 21 जानेवारीला सर्वोच्च न्यायालयात राष्ट्रवादी काँग्रेसच्या पक्षचिन्हासंदर्भात निर्णायक सुनावणी होणार आहे. या सुनावणीकडे संपूर्ण राज्याचे लक्ष लागले आहे. न्यायालयाकडून अंतिम निर्णय होणार की दोन्ही गटांमध्ये काही तडजोडीचा मार्ग निघणार, याबाबत तर्कवितर्क सुरू आहेत.

पक्षचिन्हाचा प्रश्न सुटला, तर त्याचा थेट परिणाम आगामी जिल्हापरिषदा आणि पंचायत समितीच्या निवडणुकांवर होणार आहे. त्यामुळे ही सुनावणी केवळ कायदेशीर नाही, तर राजकीय दृष्टिकोनातूनही अत्यंत महत्त्वाची मानली जात आहे.