Chikhaldara Nagar Parishad Result : देवेंद्र फडणवीसांचा भाऊ बिनविरोध झालेल्या नगरपरिषदेत काँग्रेसची सत्ता, नगराध्यक्षपदी दणदणीत विजय!

Congress News : नगरपंचायत आणि नगरपरिषदेतील निवडणुकीत भाजप हा सर्वात मोठा पक्ष ठरत असून सर्वाधिक जागांवर विजय मिळवताना दिसतो आहे. मुख्यमंत्री देवेंद्र फडणवीस यांचे मामेभाऊ आल्हाद कलोती यांची अमरावती जिल्ह्यातील चिखलदरा नगरपरिषदेच्या निवडणुकीआधीच नगरसेवक म्हणून बिनविरोध निवड झाली होती. मात्र, आज जाहीर झालेल्या या नगरपरिषदेची सत्ता काँग्रेसने मिळवली आहे.

20 पैकी 12 नगरसेवक काँग्रेसचे विजयी झाले असून आठ ठिकाणी भाजपला विजय मिळवता आला आहे. काँग्रेसचे नगराध्यक्ष शेख अब्दुल यांनी भाजपच्या नगराध्यक्षपदाच्या उमेदवाराचा 431 मतांनी पराभव केला आहे.

प्रभाग क्रमांक 10 मधून आल्हाद कलोती यांनी उमेदवारी अर्ज दाखल केला होता. येथून त्यांच्या विरोधात तीन अर्ज होते. मात्र, रवी राणा यांनी पुढाकार घेत मुख्यमंत्र्यांचे मामेभाऊ कलोती यांना बिनविरोध निवडणूक आणण्यासाठी हालचाली सुरु केल्या होत्या. त्यामध्ये त्यांना यश देखील आले.

भाजपचा उमेदवार बिनविरोध विजयी झाल्याने या पालिकेवर भाजपची सत्ता येईल, अशी शक्यता वर्तवली जात होती. मात्र, काँग्रेसने जोरदार कमबॅक करत भाजपचा दणदणीत पराभव केला.