Marathwada Flood News : मराठवाड्यातील पुरग्रस्त शेतकऱ्यांना मोठा दिलासा : फडणवीस सरकारने पंचनाम्याच्या अटी बदलल्या

Marathwada Flood News : अतिवृष्टीने हवालदिल झालेल्या मराठवाड्यातील शेतकऱ्याला दिलासा देण्यासाठी राज्य सरकारने मोठा निर्णय जाहीर केला आहे. मुख्यमंत्री देवेंद्र फडणवीस यांनी पंचनाम्याचे नियम शिथिल करत असल्याची घोषणा केली आहे. याशिवाय अधिकाऱ्यांनीही शेतकऱ्यांना जास्तीत जास्त मदत कशी मिळेल याची काळजी घेण्याच्या सूचना त्यांनी दिल्या आहेत.

मुख्यमंत्री देवेंद्र फडणवीस यांनी बुधवारी (24 सप्टेंबर) सोलापूरमधील निमगाव आणि दारफळ, तर लातूरमधील औसा तालुक्यात उजनी गावात पहाणी दौरा केला. यानंतर ते माध्यमांशी बोलत होते.

यावेळी फडणवीस म्हणाले, आमच्याकडे जे पंचानामे येत आहेत, त्यावर आम्ही कारवाई करत आहोत. जिथे जाऊन पंचनामा करणे शक्य नाही तिथे ड्रोन पंचनामाही ग्राह्य धरला जाईल. कोणी अगदी मोबाईल फोटो काढून दिला तरी तो पंचनामा म्हणून मान्य केला जाणार आहे. त्या भागात केवळ पाणी गेलं आहे एवढेच आपल्या रेकॉर्डला असले पाहिजे.

याशिवाय पंचनाम्यासाठी येणाऱ्या अधिकाऱ्यांनी थोडं सहानुभूतीने पंचनामे करावेत. जास्त नियम सांगत बसू नये. जास्तीत जास्त कशी मदत देता येईल याचा विचार करावा अशा सूचनाही मुख्यमंत्री फडणवीस यांनी दिले. या कठीण परिस्थितीत सरकार म्हणून आम्ही शेतकऱ्याला व नुकसान झालेल्यांना वाऱ्यावर सोडणार नाही. आपल्या सर्व मागण्या पूर्ण केल्या जातील आपण चिंता करण्याची गरज नाही, असे आश्वासन त्यांनी दिले.

सोलापुरचे पालकमंत्री जयकुमार गोरे, लातूरचे पालकमंत्री शिवेंद्रराजे भोसले आणि सर्वपक्षीय आमदार, खासदार, अधिकारी यावेळी त्यांच्यासोबत होते. शेतकऱ्यांचे अतिवृष्टी, ढगफुटी, पूराने मोठ्या प्रमाणात नुकसान झाले आहे. त्यामुळे शेतकऱ्यांच्या भावना तीव्र आहेत. तातडीच्या मदतीसह कर्जमाफी आणि ओला दुष्काळा जाहीर करण्याची मागणी त्यांच्याकडून केली जात आहे.