Vijay Wadettiwar: दंगली घडविण्यासाठीच भाजपला बदलायचा आहे इतिहास?

Nagpur News: काश्मीरमध्ये पर्यटकांवर फायरिंग झाल्यानंतर आता इतिहासाच्या पुस्तकातून मुस्लिम राजे आणि राजवटीचा इतिहास काढून टाकण्यात येणार आहे. इतिहास बदलला जात असल्याने काँग्रेस आणि विरोधीपक्षांतर्फे सत्ताधाऱ्यांवर टीका करणे सुरू झाले आहे. काँग्रेस विधिमंडळ पक्षाचे नेते विजय वडेट्टीवारांनी इतिहास पुसण्यापेक्षा इतिहास घडवण्याची ताकद दाखवावी असा टोला भाजपला लगावला.

भाजपचा इतिहास हा विषमतेचा आहे. तो त्यांना अभ्यासक्रमात मांडून दोन धर्मांमध्ये दंगली घडवायच्या असल्याचा आरोपही त्यांनी यावेळी केला. राज्याच्या शालेय अभ्यासक्रमात हिंदी सक्ती करण्यात आली होती. त्यानंतर मोठा वाद उफाळला होता.

महाराष्ट्र नवनिर्माण सेनेसह महायुती वगळता सर्वांनीच या निर्णयाला कडाडून विरोध केला होता. त्यानंतर महायुती सरकारला हिंदीची सक्ती काढून टाकावी लागली होती. आता इतिहासावरून नवे राजकारण सुरू झाले आहे. राज्याच्या आणि देशातील शालेय पुस्तकात मुस्लिम राजवटीचा इतिहास मोठ्या प्रमाणात आहे. तो काढून टाकण्याचा निर्णय घेण्यात आला आहे.

वडेट्टीवार म्हणाले, "इतिहास हा घटनांची नोंद आणि साक्ष असते. भूतकाळात जे काही चांगले वाईट घडले त्याचा ठेवा इतिहासात असतो. मात्र भाजपला विषमतेच इतिहास मांडायचा आहे. जाती, धर्मांमध्ये तेढ निर्माण होईल, दंगली होतील असा नवा इतिहास अभ्यासक्रमात समावेश करायचा आहे. धर्मांधतेला खतपाणी घालण्याचा हा प्रकार आहे.

काश्मीमरमध्ये दोनशे किलोमीटर आत घसून अतिरेकी आले. त्यांनी गोळीबार करून निरपराध पर्यटकांचा बळी घेतला. यावर केंद्र सरकार चर्चा करीत नाही. फक्त हिंदू आणि मुस्लीम यांचीच चर्चा होत आहे. देशाच्या सीमेवर इतके दुर्लक्ष केले जात असेल तर राज्यात रोज होणाऱ्या खुनाच्या घटनेबाबत कोणाला बोलावे असा प्रश्न पडतो.

नागपूर हे गृहमंत्र्यांचे शहर आहे. या शहरातील कायदा सुव्यवस्थेची स्थिती भंयकर आहे. वेळीच बंधने घातली नाही आणि परिस्थिती आटोक्यात आणली नाही तर नागपुरात स्फोटकासारखी स्थिती निर्माण होईल अशी भीतीही वडेट्टीवार यांनी व्यक्त केली.