Vikas Thakre : नाना पटोलेंना मुख्यमंत्री करा; ठाकरे आणि लोंढेंची, पद हिसकावण्याची अन् स्वस्थ न बसण्याची भाषा

Mumbai News : नागपूर इथल्या काँग्रेस आढावा बैठकीत प्रदेशाध्यक्ष नाना पटोले यांना मुख्यमंत्री करा, अशी कार्यकर्त्यांनी मागणी लावून धरली आहे.

आमदार विकास ठाकरे आणि प्रवक्ता अतुल लोंढे यांनी नाना पटोले यांना मुख्यमंत्रीपदासाठी योग्य असल्याचं सांगताच, बैठकीत कार्यकर्त्यांनी समर्थनार्थ जोरदार घोषणाबाजी केली.

नागपूर इथं काँग्रेसची (Congress) आढावा बैठक झाली आहे. या बैठकीत नाना पटोले यांना मुख्यमंत्री करा, अशी कार्यकर्त्यांनी बाजू लागून धरली. आमदार विकास ठाकरे यांनी, नाना पटोलेंना काँग्रेसच्या पडत्या काळात काँग्रेसला अच्छे दिन आणून दिले आहे. त्यामुळे त्यांना मुख्यमंत्री करण्यासाठी ते पद हिसकावून घेऊ, असं म्हणत खळबळ उडवून दिली. प्रवक्ता अतुल लोंढे यांनी नाना पटोले मुख्यमंत्री होईपर्यंत स्वस्थ्य बसणार नाही, असं म्हटलं आहे.

उत्साही कार्यकर्त्यांच्या या प्रकारावर नाना पटोले यांनी सावध प्रतिक्रिया घेतली. नाना पटोले (Nana Patole) म्हणाले, "पक्षाच्या कार्यकर्त्यांना वाटत असते की, त्यांचा नेता मुख्यमंत्री व्हावं म्हणून. 'मविआ'मध्ये एक विचारानं आणि काँग्रेस हायकमांड यावर निर्णय होईल. पण आमच्यासमोर महाराष्ट्र गुजरातधार्णिज्य करणाऱ्यांना रोखण्याचं महत्त्वाचं काम आमच्यासमोर आहे. कार्यकर्त्यांमध्ये काय चर्चा होते, तो विषय आमच्यासाठी महत्त्वाचा नाही".

काँग्रेसचे ज्येष्ठ नेते आमदार बाळासाहेब थोरात यांनी हा महाविकास आघाडी म्हणून मुख्यमंत्रीपदावर निर्णय घेऊ, असे म्हटलं. "काही उत्साही कार्यकर्ते असतात, ते निरनिराळी नावं घेत असतात, ती मान्य करण्याचं काही कारण नाही. हिसकावून घेण्याची आणि स्वस्थ न बसण्याची भाषा म्हणजे, ते उत्साही कार्यकर्ते आहेत. ते सर्वच पक्षात असतात, आणि ते असायला देखील हवेत", असे बाळासाहेब थोरात यांनी म्हटलं आहे.

आमदार विकास ठाकरे काय म्हणाले

प्रत्येक कार्यकर्त्याला वाटते की, त्याच्या जिल्ह्यातील किंवा भागातील माणूस मुख्यमंत्री व्हावा, नाना पटोले विदर्भाचे नेते आहेत. त्यांची मेहनत आहे. विदर्भातून काँग्रेसला भरभरून जागा मिळाल्या, तर नैसर्गिक क्लेम त्यांचाच असेल. यासाठी राहुल गांधी यांना आम्ही सगळे विदर्भातील कार्यकर्ते साकडे घालू. नानाभाऊसाठी मुख्यमंत्री खेचून आणू. काँग्रेसमध्ये सर्वच सक्षम नेते आहेत.

या स्पर्धेत विदर्भातील जनतेने जास्त जागा दिल्या, तर विदर्भातील जनतेचा हक्क आहे. विदर्भ नंबर वन असला, तर यावर हायकमांड सुद्धा न्याय करेल. महाविकास आघाडी म्हणून नाही, तर काँग्रेसकडून मुख्यमंत्री पदाचा चेहरा द्यायचा असेल, तर नैसर्गिक रित्या नाना पटोले यांचा नाव असेल. विदर्भातून जास्त जागा आल्,या तर आम्ही साकड घालू आणि म्हणू की विदर्भातील नेतृत्वाला संधी द्या. यात काय गुन्हा आहे? त्यामुळे विदर्भातील लोक जोमाने आमदार निवडून आणण्यासाठी काम करतील, असे विकास ठाकरे यांनी म्हटलं आहे.