Mahayuti Government : धनंजय मुंडेंना आता मंत्रिपदाची संधी नाहीच, परतीचे दोर कापले! भुजबळांच्या एन्ट्रीने गणित बिघडले!

Dhananjay Munde News : संतोष देशमुख यांच्या हत्येच्या प्रकरणानंतर मुख्य आरोपी वाल्मिक कराड याच्यावरून धनंजय मुंडे यांना विरोधकांनी टार्गेट केले होते. पुढे तब्येतीचे कारण देत मुंडे यांनी आपल्या मंत्रि‍पदाचा राजीनामा दिला होता. वातावरण शांत झाल्यानंतर मुंडेंना पुन्हा मंत्रिमंडळात संधी मिळेल, अशी शक्यता वर्तवली जात होती. मात्र, मंगळवारी (ता.20) छगन भुजबळ यांनी मंत्रि‍पदाची शपथ घेतली आणि धनंजय मुंडे यांची मंत्री होण्याची संधी हुकली. आता मुंडे यांना या महायुती सरकारमध्ये पुन्हा मंत्री होत येणार नसल्याची शक्यता आहे.

राष्ट्रवादी काँग्रेसच्या वाट्याला आलेल्या मंत्रि‍पदाच्या कोट्याला आलेली सर्व मंत्रि‍पदे भरली गेली आहेत. त्यामुळे धनंजय मुंडे यांचे परतीचे दोर कापले गेले आहेत. धनंजय मुंडे यांना आता सरकारचा कार्यकाळ पूर्ण होईपर्यंत पुन्हा संधी मिळणे कठीण मानले जात आहे.

आगामी स्थानिक स्वराज संस्थांच्या निवडणुकीत महायुती सरकारकडे कोणताही मोठा ओबीसी चेहरा नव्हता. त्यामुळे निवडणुकीत त्यांना फटका बसण्याची शक्यता वर्तवली जात होती. मात्र, धनंजय मुंडे यांच्या रिक्त जागेवर छगन भुजबळ यांना संधी देत ओबीसी समाजाची नाराजी दूर करण्याचा प्रयत्न केला गेला असल्याचे देखील मानले जात आहे.

धनंजय मुंडे नाराज?

छगन भुजबळ यांना मंत्रि‍पदी संधी मिळाल्याने आपल्या पुन्हा लवकरच मंत्रिपद मिळणे कठीण असल्याची जाणीव धनंजय मुंडे यांना झाल्याची चर्चा आहे. मंत्रि‍पदावर संधी न मिळाल्याने ते नाराज असल्याचे देखील बोलले जात आहेत. त्यामुळेच मंगळवारी रात्री उपमुख्यमंत्री अजित पवार यांनी धनंजय मुंडेंना घेऊन मुख्यमंत्री देवेंद्र फडणवीस यांची भेट घेतली. या भेटीत पवार आणि फडणवीसांनी मुंडेंची नाराजी दूर करण्याचा प्रयत्न केला.

भुजबळांच्या मंत्रि‍पदासाठी कोणाचा पुढाकार?

मंत्रि‍पदावर संधी मिळाल्यानंतर छगन भुजबळ यांनी मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजित पवार यांचे आभार मानले. भुजबळांच्या मंत्रि‍पदासाठी मुख्यमंत्री देवेंद्र फडणवीस यांनी पुढाकार घेतला असल्याची चर्चा आहे. तर, भुजबळांना मंत्री करण्याचा निर्णय उपमुख्यमंत्री अजित पवार, खासदार सुनील तटकरे, खासदार प्रफुल्ल पटेल यांनी घेतल्याची माहिती आहे.