Dhananjay Munde News : धनंजय मुंडेंचा मोठा निर्णय; जगमित्र कार्यालयाची चावी अजय मुंडेंच्या हाती, कराड सांभाळत होता काम

Beed Latest News : मस्साजोग गावचे सरपंच संतोष देशमुख यांच्या निघृण हत्येनंतर मंत्री धनंजय मुंडे अडचणीत आले आहेत. हत्याप्रकरणातील आरोपी वाल्मिक कराड हा मुंडेंचा निकटवर्तीय असल्याने विरोधकांकडून त्यांच्या राजीनाम्याची मागणी केली जात आहे. त्यांना याच प्रकरणामुळे पालकमंत्रिपदही मिळाले नाही, अशी चर्चा आहे. पण आता त्यांनी मतदारसंघात पुन्हा जोमाने कामाला सुरूवात करण्याचे ठरवले आहे.

धनंजय मुंडे यांच्या परळीतील जगमित्र कार्यालयाची सुत्रे त्यांनी चुलत बंधू अजय मुंडे यांच्याकडे सोपवली आहेत. याच कार्यालयातून परळी मतदारसंघातील नागरिकांचे प्रश्न जाणून घेणे, त्याची सोडवणूक करण्याचे काम आधी वाल्मिक कराड करायचा. आता कराड जेलमध्ये गेल्याने या खुर्चीवर कोण बसणार, याची चर्चा तालुक्यात रंगली होती.

अखेर धनंजय मुंडेंनी त्यांचेच चुलत बंधू अजय मुंडे यांच्या हाती कार्यालयाच्या चाव्या सोपवल्या आहेत. ते बीड जिल्हा परिषदेचे सदस्य असून गटनेतेपदही त्यांच्याकडेच आहे. मंत्री मुंडे मतदारसंघात नसताना अजय मुंडे सक्रीय असायचे. आता ते जगमित्र कार्यालयात बसून ही कामे पाहतील.

दरम्यान, अजय मुंडे यांच्या हाती काम सोपवल्याने वाल्मिक कराडच्या समर्थकांमध्ये त्याची काय प्रतिक्रिया उमटते, हे पाहावे लागेल. वाल्मिक कराड हा सध्या न्यायालयीन कोठडीत आहे. त्याच्या जामीनासाठी वकिलांकडून प्रयत्न केले जात आहेत. कराडसह अन्य आरोपीही तुरुंगात आहेत. या गुन्ह्यात दोषी आढळणाऱ्यांना फाशी देण्याची मागणी धनंजय मुंडे यांनीही केली आहे.

धनंजय मुंडे यांच्या हातून पालकमंत्रिपद निसटले असले तरी कॅबिनेट मंत्री हे पद शाबूत आहे. उपमुख्यमंत्री अजित पवारांसह मुख्यमंत्री देवेंद्र फडणवीस यांचा सध्यातरी त्यांच्यावर भरवसा आहे. त्यामुळे आता मुंडेंनी पुन्हा परळी आणि बीडमध्ये आपली राजकीय ताकद दाखवण्यासाठी जोमाने काम सुरू केल्याचे दिसते.