Balasaheb Thackeray birth centenary : बाळासाहेबांच्या जन्मशताब्दीनिमित्त उपमुख्यमंत्री शिंदेंची मोठी घोषणा; म्हणाले, 'त्यांचा 'हा' संकल्प...'

Mumbai News : शिवसेनाप्रमुख बाळासाहेब ठाकरे यांच्या जन्मशताब्दीनिमित्त उपमुख्यमंत्री एकनाथ शिंदे यांनी अभिवादन केले. यावेळी त्यांनी बाळासाहेब ठाकरे यांचे संकल्प पूर्ण करण्याचा निर्धार व्यक्त केला. शिवसेना हा सर्वसामान्य कार्यकर्त्याला मोठे करणारा पक्ष राहिला आहे. त्यामुळे गेल्या काही दिवसात चांदा ते बांदा शिवसेना पोहचविण्याचा प्रयत्न आमचा राहिला असल्याचे उपमुख्यमंत्री एकनाथ शिंदेंनी स्पष्ट करीत बाळासाहेबांच्या जन्मशताब्दीनिमित्त त्यांच्या विचारांचा वारसा पुढे नेण्याचा संकल्प पूर्ण करण्याचा निर्धार शिंदेंनी व्यक्त केला.

बाळासाहेब ठाकरेंचे जे स्वप्न होते ते स्वप्न पंतप्रधान नरेंद्र मोदी यांनी पूर्ण केले आहे. त्यामध्ये अयोध्येत राममंदिर बांधण्याचे त्यांचे स्वप्न पूर्ण झाले आहे. त्यासोबतच काश्मीरमधील ३७० कलम हटविण्याचा निर्णय पीएम मोदी यांनी घेतला आहे. त्यामुळे या सर्व गोष्टीचा सार्थ अभिमान वाटत असल्याचे शिंदे (Eknath Shinde) यांनी स्पष्ट केले.

त्याचवेळी उपमुख्यमंत्री एकनाथ शिंदे यांनी यावेळी काही घोषणा केल्या आहेत. त्यामध्ये येत्या काळात मुंबई महापालिकेच्या वतीने बाळासाहेब ठाकरे (Balasaheb Thackeray)आरोग्य आपल्या दारी हे अभियान राबविण्यात येणार असल्याचे त्यांनी सांगितले. महापालिका क्षेत्रात पसरत असलेल्या विविध आजारांना आळा घालण्यासाठी घरोघरी जाऊन तपासणी मोहीम राबविण्यात येणार असल्याचे त्यांनी सांगितले. त्यासोबतच मुंबई महापालिकेच्या बजेटमधून विविध आरोग्य योजना राबविण्यात येणार असल्याचे त्यांनी सांगितले.

त्यासोबतच राज्यातील गडकोट किल्ला परिसराची स्वच्छता व पाण्याची सुविधा देण्यात येणार आहे. त्यासाठी गडकोट किल्ला परिसरात हे अभियान राबविण्यात येणार आहे. नगरविकास विभागाकडून राज्यातील 29 महापालिका व 394 नगरापलिकासाठी अभियान राबविण्यात येणार आहे. त्यासोबतच शाळा व शिक्षणासाठी मदत करण्यात येणार आहे. त्यासोबतच चांगल्या शाळांना बक्षीस देण्यात येणार आहे.

महिला बचतगट सक्षम करण्यासाठी नगरविकास खात्याच्या माध्यमातून मोठी मदत करणार आहोत. मराठी भाषा संवर्धन करण्यासाठी 100 कोटी रुपयांची तरतूद करण्याचा निर्णय राज्य सरकारकडून घेण्यात आला आहे. परिवहन महामंडळाकडून सहलीचे आयोजन करण्यात येणार असल्याची माहिती यावेळी उपमुख्यमंत्री एकनाथ शिंदे यांनी दिली.