Tukaram Mundhe News : अधिवेशनात आरोप होत असताना तुकाराम मुंढेंचा विधानभवनातील व्हिडीओ व्हायरल; तीन शब्दांतच दिला संदेश...

Maharashtra Assembly Session : विधिमंडळाच्या हिवाळी अधिवेशनाचे रविवारी सूप वाजले. नागपुरातील हे अधिवेशन धडाकेबाज आयएएस अधिकारी तुकाराम मुंढे यांच्यावरील आरोपांनी ‘लक्षवेधी’ ठरले. भाजपचे नागपुरातील आमदार कृष्णा खोपडे यांनी सध्या दिव्यांग विभागात प्रधान सचिव असलेल्या मुंढेंविरोधात लक्षवेधी मांडत अनेक गंभीर आरोप केले. त्यांचे समर्थक आपल्याला धमकी देत असल्याचे त्यांनी मुख्यमंत्री देवेंद्र फडणवीस यांच्यासमोर विधानसभेत सांगितले.

नागपुरात असताना मुंढे यांनी मनमानी कारभार केल्याचा आरोप खोपडे यांनी केला आहे. अधिवेशनात फडणवीस यांनी याबाबत चौकशी करण्याचे आश्वासन दिले. सत्ताधारी आमदार मात्र मुंढे यांची बाजू मांडताना दिसते. एकीकडे विधानसभेत आरोप होत असताना मुंढे यांनी तीन दिवसांपूर्वी १२ डिसेंबरला सोशल मीडियात एक व्हिडीओ पोस्ट केला होता. हा व्हिडीओ चांगलाच व्हायरल होत आहे.

नागपुरातील विधानभवनाच्या आवारातील हा व्हिडीओ पोस्ट करताना IAS मुंढे यांनी ‘प्रतिष्ठा, आदर, दूरदृष्टी’ हे तीन शब्द लिहिले होते. यातून त्यांना नेमका काय संदेश द्यायचा आहे, हे स्पष्ट होते. सुटाबुटात विधिमंडळात प्रवेश करतानाचा हा व्हिडीओ आहे. फेसबुकवर या व्हिडीओला ११ हजारांहून अधिक लाईक्स असून जवळपास ७०० कमेंट आहेत. तर १६० जणांनी हा व्हिडीओ शेअर केला आहे.

पोस्टवरील कमेंटमध्ये अनेकांनी मुंढे यांच्याबाबत अधिवेशनात सुरू असलेल्या वादावर भाष्य केले आहे. अनेकांनी त्यांना पाठिंबा देत त्यांच्या धडाकेबाज कामाचे कौतुक केले आहे. तुम्ही सर्वसामान्यांचे हिरो आहात. सर्वसामान्य जनतेसाठी प्रामाणिकपणे मनापासून काम करती राहा, कारण हेच तुमचे शस्त्र आहे, अशा अनेक भावना मुंढेंच्या पोस्टवर व्यक्त करण्यात आल्या आहेत.

दरम्यान, विधिमंडळातील आरोपांवर तुकाराम मुंढे यांनी एका वृत्तवाहिनीशी बोलताना आपल्यावर आरोप फेटाळून लावले आहेत. कुणाचेही नाव न घेता काही लोकांची मनमानी होऊ दिली नाही म्हणून माझ्याविरोधात कटकारस्थान केले जात असल्याची प्रतिक्रिया मुंढे यांनी दिली आहे. चौकशीत निर्दोष आढळल्याचेही त्यांनी स्पष्ट केले आहे.