Sharad Pawar Video : भर पावसात शरद पवारांची सभा; इचलकरंजीत 2019 च्या साताऱ्यातील सभेची पुनरावृत्ती?

Sharad Pawar News : 2019 च्या विधानसभा निवडणुकीत श्रीनिवास पाटील यांच्यासाठी घेतलेल्या सभेत शरद पवार पावसात भिजले होते. त्यांच्या या सभेची महाराष्ट्रभर चर्चा झाली होती. या सभेमुळे महायुतीच्या बाजुचे वातावरण बदलले. त्यामुळे शरद पवारांच्या पावसाच्या सभेची नेहमीच चर्चा असते.

यंदाच्या निवडणुकीतही शरद पवार हे इचलकरंजीमध्ये उमेदवार मदन कारंडे यांच्यासाठी आयोजित सभेत बोलण्यासाठी उभे राहिले त्यावेळी पावसाने हजेरी लावली. त्यामुळे 2019 ला श्रीनिवास पाटलांनी विजय मिळवला होता. तसा इजलकरंजीमध्ये विजय मिळवत साताऱ्याची पुनरावृत्ती इजलकरंजीमध्ये होणार, अशी कार्यकर्त्यांमध्ये जोरदार चर्चा आहे.

सभेत शरद पवार आणि पाऊस याचे समीकरण पुन्हा एकदा जुळून आल्याने कार्यकर्त्यांनी जल्लोष केला. तर शरद पवार म्हणाले, माझा जाहीरसभेचा आणि पावसाचा काही संबध नाही. महाराष्ट्रात मी बोलायला लागलो की पावसाची सुरुवात होती. आणि तशापद्धतीने निवडणुकीचा निकाल हा चांगला लागतो.

शरद पवार म्हणाले, विधानसभेची निवडणूक आहे. महाराष्ट्राचा पाळणा कुणाच्या हातात द्यायचा हा निर्णय घ्यायचा आहे. ज्यांच्याकडे सध्या सत्ता आहे त्यांचा अनुभव काही चांगला नाही. त्यामुळे येणाऱ्या 20 तारखेला महाविकास आघाडीच्या उमेदवारांना विजयी करा. महाराष्ट्रात महाविकास आघाडीची सत्ता आल्याशिवाय राहणार नाही. असा विश्वास त्यांनी व्यक्त केला.

शरद पवार यांनी केलेल्या सात मिनिटांच्या भाषणात तीन मिनिटांचा वेळ हा उमेदवार आणि उपस्थित त्यांच्या नावामध्ये खर्च केला. आणि उरलेल्या चार मिनिटात त्यांनी सभा आणि पाऊस यासंदर्भात मत मांडले.

सभांचा धडाका

इचलकरंजी येथील सभा झाल्यानंतर राष्ट्रवादीचे नेते शरद पवार यांची चंदगड आणि कागल विधानसभा मतदारसंघात सभा होणार आहे. चंदगडच्या महाविकास आघाडीच्या उमेदवार डॉ. नंदाताई बाभुळकर यांच्या प्रचारार्थ सभा मानगाव येथे होणार आहे. तर कागल विधानसभा मतदारसंघातील महाविकास आघाडीचे उमेदवार समरजित घाटगे यांच्या प्रचारार्थ सभा गडहिंग्लज येथे होणार आहे.