Prakash Ambedkar: प्रकाश आंबेडकरांची इच्छा असेल तर...; वंचितसोबतच्या आघाडीच्या चर्चेवर काँग्रेसनं मांडली सडेतोड भूमिका

Prakash Ambedkar: मुंबईसह राज्यातील इतर महापालिकांमध्येही समविचारी पक्षांना सोबत घेऊन लढण्याची भूमिका काँग्रेसनं मांडली आहे. त्यासाठी विविध समविचारी पक्षांशी त्यांची चर्चाही सुरु आहे. यामध्ये वंचित बहुजन आघाडीचाही समावेश आहे. पण अद्याप वंचितसोबतच्या चर्चेतून कोणता तोडगा निघाला हे कळू शकलेलं नाही. त्यातच आता काँग्रेसनं वंचितसोबतच्या आघाडीच्या चर्चांवर आपली स्पष्ट आणि सडेतोड भूमिका मांडली आहे.

काँग्रेसचे प्रवक्ते सचिन सावंत यांनी सोशल मीडियात पोस्ट करत म्हटलं की, "काँग्रेस पक्षाची मुंबई महानगरपालिका निवडणुकीत लोकशाही व संविधानाची बांधिलकी ठेवणाऱ्या समविचारी पक्षांना बरोबर घेऊन जाण्याची मनापासून इच्छा आहे. याकरिता अतिशय प्रामाणिकपणे निकराचे प्रयत्न आम्ही करत आहोत. याच धर्तीवर वंचित बहुजन आघाडीशी गेले काही दिवस सातत्याने अतिशय तळमळीने चर्चा सुरू आहे. आजही आमची चर्चा सुरू राहिली आहे. परम आदरणीय बाळासाहेब आंबेडकर यांची इच्छा असेल तर लवकरच ही चर्चा पूर्णत्वास जाईल. त्याचप्रमाणे CPI, CPIM, रिपब्लिकन पार्टी (गवई) या पक्षांशी चर्चा जवळपास पूर्णत्वास गेली आहे"

सचिन सावंत यांच्या या भूमिकेनुसार, वंचितकडून अद्याप काँग्रेससोबत आघाडी करण्याची इच्छा दिसत नाही. त्यामुळं युतीबाबतची चर्चा अद्याप पूर्णत्वास जाऊ शकलेली नाही. तर दुसरीकडं डावे पक्ष आणि रिपब्लिकन पार्टीपैकी गवई गटाशी काँग्रेसनं यशस्वीरित्या चर्चा पूर्ण केली आहे. त्यामुळं लवकरच त्यांचं जागा वाटप जाहीर होण्याची शक्यता आहे. पण हे जागा वाटप केवळ वंचित बहुजन आघाडीमुळं अद्याप जाहीर झालेलं नाही, असंही सावंत यांच्या भूमिकेतून स्पष्ट होतं.

दरम्यान, दुसरीकडं वंचित बहुजन आघाडीचे समन्वयक असलेल्या प्रकाश आंबेडकांनी काँग्रेसवरच आघाडी न होण्याचं खापर फोडलं आहे. तसंच काँग्रेसनं अपप्रचार करु नये असंही म्हटलं आहे. मी अजून माझं तोंड उघडलेलं नाही, मी ज्या दिवशी बोलेल त्यादिवशी काँग्रेसला महाराष्ट्रात नाही तर देशभरात फटका बसेल, अशा शब्दांत प्रकाश आंबेडकरांनी इशारा दिला आहे.