भरत गोगावले जबरदस्त कॉन्फिडन्स; पोलिस म्हणतात विकास फरार? पण ते म्हणतात, 'तो इथेच, माझ्या संपर्कातही... वरच्या कोर्टात...'

Raigad News : रायगड जिल्ह्यातील महाडमध्ये नगरपरिषद निवडणुकीदरम्यान झालेल्या खळबळजनक राडा प्रकरणात राज्याचे मंत्री भरत गोगावले यांचे पुत्र विकास गोगावले यांना न्यायालयाने मोठा झटका दिला आहे. त्यांचा अटकपूर्व जामीन अर्ज मुंबई उच्च न्यायालयाने फेटाळल्यानंतर त्यांची कधीही अटक होवू शकते. सध्या ते फरार असून पोलीस त्यांच्या शोधात आहेत. मात्र ते फरार नसल्याची स्पष्ट कबूली गोगावले यांनी दिली असून ते आपल्या संपर्कात असल्याचे म्हटलं आहे. तसेच मुलाची अटक टाळण्यासाठी आपण वरच्या न्यालायलयाचे दार ठोठावणार असल्याचे त्यांनी म्हटलं आहे. यामुळे आता त्यांच्या मुलाची अटक होणार की वरच्या न्यायालयात जामीन मंजूर होणार याकडे जिल्ह्यासह राज्याच्या राजकीय वर्तुळाचे लक्ष लागले आहे.

रायगड जिल्ह्यातील महाड नगरपरिषदेच्या निवडणुकीत मोठा राडा झाला होता. बळ हाणामारी प्रकरणी गोगावले यांचा मुलगा विकास गोगावले याच्यासह 29 जणांविरोधात गुन्हे दाखल करण्यात आले होते. यानंतर आजपर्यंत विकास फरार असून त्यांनी अटकपूर्व जामीन अर्ज मुंबई उच्च न्यायालयात दाखल केला होता. मात्र न्यायालयाने त्यांना झटका देत त्यांचा अर्ज फेटाळला होता. यानंतर आता त्यांचा शोध पोलिस घेत असून अटक होण्याची शक्यता आहे. दरम्यान शिरगावचे सरपंच सोमनाथ ओझर्डे यांनी फरार असलेल्या विकास गोगावले यांची माहिती देणाऱ्याला १ लाख रुपयांचे बक्षीस जाहीर केले आहे.

पण आता गोगावले यांनीच आपला मुलगा फरार नसून तो आपल्या संपर्कात असल्याची माहिती दिली आहे. यावरून आता राजकीय वर्तुळात खळबळ उडाली आहे. गोगावले यांनी, आपला मुलगा फरार नसून तो आपल्या संपर्कात असल्याची जाहीर कबुली स्वत: तुळजापूर येथे माध्यमांना दिली आहे. ते म्हणाले, माझा मुलगा फरार नाही, माझं त्याच्याशी नियमित बोलणं होतं. संपर्क आहे. आम्ही अटकपूर्व जामिनासाठी मुंबई उच्च न्यायालयात प्रयत्न केले होते.

मात्र आम्हाला दिलासा मिळाला नाही. त्यामुळे आता आम्ही सर्वोच्च न्यायालयात दाद मागितली आहे. पण जर येथेही दाद मिळाली नाही, अटकपूर्व जामीन फेटाळला तर आम्ही त्याला स्वत:हून पोलिसांत हजर करू. त्यांच्या या कबुलीमुळे आता पोलिस यंत्रणा राजकारण्यांच्या दबावाखाली काम करत आहेत का सवाल उपस्थित केला जातोय.

नेमकं काय घडलं?

२ डिसेंबर २०२५ रोजी महाड नगरपरिषद निवडणुकीसाठी मतदान सुरू असताना जोरदार राडा झाला होता. अजित पवार यांच्या राष्ट्रवादी काँग्रेसचे नेते सुशांत जाबरे आणि मंत्रीपुत्र विकास गोगावले त्यांच्या समर्थकांत हाणामारी झाली होती. यावेळी जाबरे यांच्या गाडीची (फॉर्च्युनर) तोडफोड करण्यात आली. कार्यकर्त्यांना लाथाबुक्क्यांनी मारहाण करण्यात आली होती. यावेळी विकास गोगावले यांच्यावर जाबरे यांच्या अंगरक्षकाने रिव्हॉल्व्हर तानली होती. जी विकास यांनी हिसकावून घेत ती पोलिसांच्या ताब्यात दिली होती. या राड्यानंतर परस्पर तक्रारी दाखल करण्यात आल्या होत्या. ज्यानंतर विकास गोगावले यांच्यावर गुन्हा दाखल करण्यात आला होता.

हायकोर्टाचे कडक ताशेरे

दरम्यान विकास गोगावले यांनी अटकेपासून वाचण्यासाठी मुंबई उच्च न्यायालयात धाव घेतली होती. मात्र, न्यायालयाने त्यांचा अर्ज फोटाळत कडक ताशेरे ओढले होते. न्यायालयाने या प्रकरणात अत्यंत परखड मत व्यक्त करताना, लोकशाहीत एका जबाबदार मंत्र्याचा मुलगा जर अशा हिंसक गुन्ह्यात सहभागी होत असेल, तर ही बाब अत्यंत गंभीर आहे," असे म्हटले होते.

FAQs :

1) विकास गोगावले यांचा जामीन का फेटाळण्यात आला?
महाड निवडणुकीदरम्यान झालेल्या राडा प्रकरणात गंभीर आरोप असल्याने हायकोर्टाने जामीन नाकारला.

2) विकास गोगावले सध्या फरार आहेत का?
भरत गोगावले यांच्या म्हणण्यानुसार ते फरार नसून त्यांच्या संपर्कात आहेत.

3) हे प्रकरण कोणत्या न्यायालयात आहे?
सध्या मुंबई उच्च न्यायालयात सुनावणी झाली असून पुढील दाद सुप्रीम कोर्टात मागितली जाणार आहे.

4) महाड राडा प्रकरण नेमकं काय आहे?
नगरपरिषद निवडणुकीदरम्यान झालेल्या हिंसाचार व गोंधळाशी संबंधित हे प्रकरण आहे.

5) या प्रकरणाचा राजकीय परिणाम काय होऊ शकतो?
या घटनेमुळे रायगड जिल्ह्यात मोठी राजकीय खळबळ उडाली असून युतीतील तणाव वाढण्याची शक्यता आहे.