Kokan Loksabha : शिंदे गटाची धाकधूक वाढली; कोकणातील दोन्ही लोकसभा मतदारसंघावर भाजपचा डोळा...

Konkan News : आगामी लोकसभा, विधानसभा निवडणुकांच्या पार्श्वभूमीवर भाजपचे प्रदेशाध्यक्ष चंद्रशेखर बावनकुळे यांनी लोकसभा व विधानसभा निवडणूक प्रमुख नियुक्ती केल्या आहेत. या नवनिर्वाचित प्रमुखांवर लोकसभा व विधानसभा मतदारसंघनिहाय पक्ष संघटनात्मक वाढीसाठी जबाबदारी सोपवल्या आहेत.रत्नागिरी-सिंधुदुर्ग लोकसभा निवडणूक प्रमुखपदी प्रमोद जठार यांची नियुक्ती केली आहे. (BJP eyes on both Lok Sabha constituencies in Konkan)

आगामी लोकसभा (Loksabha Election) आणि विधानसभा निवडणुकीसाठी भाजप (BJP) कामाला लागल्याचे दिसत आहे. संघटनात्मक बांधणीवर भाजपचा जोर आहे. भाजपने रायगड लोकसभा निवडणूक प्रमुखपदी सतीश धारप, रत्नागिरी-सिंधुदुर्ग लोकसभा निवडणूक प्रमुख पदी प्रमोद जठार यांची नियुक्ती केली आहे. लोकसभेच्या निवडणुकीला केवळ वर्षभराचा कालावधी शिल्लक आहे. कोकणातील लोकसभेच्या या दोन्ही जागा भाजप स्वतंत्र लढणार की शिंदे सेनेला सोबत घेणार, याची उत्सुकता सर्वांना आहे.

शिवसेना-भाजप युतीच्या जागावाटपात कोकणातील या दोन्ही जागा शिवसेनेकडे होत्या. रत्नागिरी-सिंधुदुर्गची जागा शिवसेनेने जिंकली तर या रायगडच्या जागेवर शिवसेनेला अपयश आले. आता मात्र दोन्ही जागा ताब्यात घेण्यासाठी भाजपने कंबर कसली आहे. त्याचबरोबर विधानसभेच्या निवडणुकीसाठी भाजपने मोर्चेबांधणीला सुरवात केली आहे.

रत्नागिरी विधानसभा निवडणूक प्रमुखपदी माजी आमदार बाळ माने, गुहागर-माजी आमदार डॉ. विनय नातू, दापोली-केदार साठे, चिपळूण-संगमेश्वर-प्रमोद अधटराव यांच्यावर जबाबदारी सोपवण्यात आली आहे. माजी आमदार बाळ माने मागील काही दिवसांपासून संघटना बांधणीच्या कामात अलिप्त होते; परंतु अलीकडच्या काळात ते कमालीचे सक्रिय झाले आहेत.

तळकोकणातील संघटना बांधण्यासाठी भाजपने केंद्रीय मंत्र्यांनाही मैदानात उतरवले आहे. त्यामुळे कोकणात संघटना बांधणीसाठी भाजपने अधिक लक्ष घातल्याचे दिसून येत आहे.