भाजपला अवघ्या तीन दिवसांत दुसरा मोठा धक्का!

माथेरान : माथेरान नगरपरिषदेचे माजी उपनगराध्यक्ष राजेश दळवी यांनी भारतीय जनता पक्षाला रामराम करत राष्ट्रवादी कॉँग्रेस पक्षात प्रवेश केला आहे. अवघ्या तीन दिवसांत भाजपला हा दुसरा धक्का बसला आहे. (BJP's Matheran Former Deputy Mayor Rajesh Dalvi joins NCP)

शिवसेनेतून भारतीय जनता पक्षात दाखल झालेल्या माथेरानमधील १० नगरसेवकांना रायगडचे जिल्हाधिकारी महेंद्र कल्याणकर यांनी नुकतेच अपात्र ठरविले आहे. या घटनेला दोन दिवस होत नाहीत तोच माजी उपनगराध्यक्ष राजेश दळवी यांनी भाजपला सोडचिठ्ठी दिली आहे. माथेरानमध्ये दळवी हे बऱ्यापैकी ताकद राखून आहेत.

सुमारे तीन वर्षांपूर्वी आमदार प्रशांत ठाकूर यांच्या उपस्थितीत राजेश दळवी यांनी भारतीय जनता पक्षामध्ये प्रवेश केला होता. स्थानिक पदाधिकाऱ्यांनी वेळोवेळी डावलल्यामुळे त्यांनी सहकारी नितीन शेळके यांच्यासह रायगडचे राष्ट्रवादी काँग्रेसचे खासदार सुनील तटकरे यांच्या उपस्थित घड्याळ हाती बांधले आहे. पक्षप्रवेशाच्या कार्यक्रमाला राष्ट्रवादी काँग्रेसचे माथेरान तालुका अध्यक्ष भगवान चंचे, माथेरान राष्ट्रवादी काँग्रेस शहर अध्यक्ष अजय सावंत हे उपस्थित होते.

दरम्यान, शिवसेनेला ‘जय महाराष्ट्र’ करत भारतीय जनता पक्षात प्रवेश करणाऱ्या माथेरान नगरपरिषदेच्या दहा नगरसेवकांना रायगडच्या जिल्हाधिकाऱ्यांनी ता. २९ ऑक्टोबर रोजी दणका दिला होता. पक्षांतर करणाऱ्या या दहाही नगरसेवकांना अपात्र ठरविण्याचा निर्णय जिल्हाधिकारी महेंद्र कल्याणकर यांनी दिला होता.

या अपात्र ठरवलेल्या नगरसेवकांमध्ये विद्यमान उपनगराध्यक्ष तथा आरोग्य सभापती आकाश कन्हैया चौधरी, नगरसेवक राकेश नरेंद्र चौधरी, संदीप कदम, स्वीकृत नगरसेवक चंद्रकांत जाधव, सोनम दाभेकर, महिला बालकल्याण समितीचे सभापती, प्रतिभा घावरे, शिक्षण समितीचे सभापती, रुपाली आरवाडे, सुषमा जाधव, प्रियांका कदम, ज्योती सोनावळे यांचा समावेश होता.

भारतीय जनता पक्षाचे प्रदेशाध्यक्ष चंद्रकात पाटील यांच्या उपस्थितीत माथेरानच्या शिवसेनेच्या या दहा नगरसेवकांनी कोल्हापूर येथे भाजपमध्ये प्रवेश केला होता. या पक्षांतराच्या निर्णयाविरोधात माथेरान नगरपरिषदेतील शिवसेनेचे गटनेते प्रसाद सावंत यांनी रायगडचे जिल्हाधिकारी कल्याणकर यांच्याकडे पक्षांतर बंदी कायद्यानुसार तक्रार दाखल केली होती. त्यानुसार जिल्हाधिकाऱ्यांनी वरील निर्णय दिला होता.