Nilesh Rane: फक्त 20 तारखेपर्यंत सहन करा, नंतर कधीच..! निलेश राणेंची हात जोडून विनंती

Maharashtra Assembly Election 2024 : कोकणातील कुडाळ विधानसभा मतदारसंघातील लढतीकडे अवघ्या महाराष्ट्राचे लक्ष लागले आहे. शिवसेना उध्दव बाळासाहेब ठाकरे पक्षाचे विद्यमान आमदार वैभव नाईक आणि शिवसेनेचे निलेश राणे यांच्यात ही लढत होणार आहे. दोन्ही बाजूने आरोप-प्रत्यारोपांच्या फैरी सुरू झाल्या आहेत.

निलेश राणे यांनी कुडाळमधून उमेदवारीसाठी नुकताच मुख्यमंत्री एकनाथ शिंदे यांच्या उपस्थितीत शिवसेनेत प्रवेश केला. त्यांच्या उमेदवारीमुळे वैभव नाईक यांच्यासमोर आव्हान उभे राहिले आहे. या प्रवेशानंतर निलेश यांनी शुक्रवारी ‘एक्स’वर एक पोस्ट करत नाईकांवर गंभीर आरोप केले आहेत.

मी कुडाळ मालवण वासियांना हात जोडून विनंती करतो, असे म्हणत राणेंनी आवाहन केले आहे की, मला खात्री आहे, आमदार नाईकांनी आपल्याला फोन करून त्रास द्यायला सुरु केला आहे. पण आपण फक्त 20 नोव्हेंबरपर्यंत सहन करा, नंतर कधीच आपल्याला कसलाही त्रास मी होऊ देणार नाही.

व्यावसायिकांना, अधिकाऱ्यांना आणि वेगवेगळ्या घटकांना फोन करून मला भेटून जा, नाहीतर मी बघून घेईन, हे सध्या उपक्रम नाईक यांचे सुरु असल्याचे गंभीर आरोप राणेंनी केला आहे. कारखाने बंद करून टाकेन अशी धमकी दिली जात आहे, जो सहकार्य करणार नाही त्याला संपून टाकायच्या धमक्या दिल्या जात आहेत, असा दावा राणेंनी पोस्टमध्ये केला आहे. म्हणून मी अगोदर म्हणालो, फक्त 20 तारखे पर्यंत सहन करा, असे राणेंनी शेवटी म्हटले आहे.

वैभव नाईक हे राणेंचे कट्टर विरोधक मानले जातात. ते सातत्याने खासदार नारायण राणे यांच्यासह त्यांच्या दोन्ही मुलांवर टीकेची झोड उठवत असतात. शिवाजी महाराजांचा पुतळा कोसळल्यानंतर नाईक यांनी थेट राणेंना आव्हान दिले होते. त्यामुळे नाईक यांच्याविरोधात एकनाथ शिंदे यांच्याकडून थेट राणेंच्या कुटुंबातील सदस्यालाच रिंगणात उतवण्यात आल्याने ही लढत हायहोल्टेज ठरणार आहे.