Shiv Sena Politics : नानांवर 4 कोटींच्या मागणीचा आरोप करणारा नेता शिंदेंच्या गळाला; धनुष्यबाण हाती घेणार

Navi Mumbai Political News : विधानसभा निवडणुकीनंतर महाराष्ट्रात पुन्हा एकदा पक्षांतराचे पेव फुटले आहे. प्रामुख्याने काँग्रेस, राष्ट्रवादी काँग्रेस शरदचंद्र पवार पक्ष आणि शिवसेना उद्धव बाळासाहेब ठाकरे पक्षातील नेते, पदाधिकारी पक्ष सोडत आहेत. उपमुख्यमंत्री एकनाथ शिंदेंच्या शिवसेनेमध्ये सध्या सर्वाधिक इनकमिंग सुरू असल्याचे चित्र आहे. नवी मुंबईतील बडा नेता लवकरच धनुष्यबाण हाती घेणार असल्याचे समजते.

नवी मुंबईतील काँग्रेसचे (Congress) ज्येष्ठ नेते आणि माजी महापौर रमाकांत म्हात्रे यांनी नुकतीच पक्षाला सोडचिठ्ठी दिली आहे. राजीनामा देताना त्यांनी विधानसभा निवडणुकीत उमेदवारीसाठी पक्षातील दोन नानांपैकी एका नानानं 4 कोटींची मागणी केल्याचा गंभीर आरोप केला होता. त्यांचा रोख प्रदेशाध्यक्ष नाना पटोलेंकडे होता का, यावरून राजकीय चर्चांना उधाण आले आहे.

म्हात्रे यांच्या आरोपांनंतर नांदेड आणि नवी मुंबईतील जिल्हाध्यक्षांच्या नियुक्तीला स्थगिती देण्यात आली आहे. या नियुक्त्या नाना पटोले यांनी केल्या होत्या. पटोलेंनी केलेल्या नियुक्तीवर म्हात्रे यांनी नाराजी व्यक्त केली होती. आपल्याला हे पद मिळावे, अशी त्यांची अपेक्षा होती. विधानसभा निवडणुकीदरम्यान मुलाच्या तिकीटासाठीही ते आग्रही होते.

मुलाला तिकीट नाकारल्यापासून त्यांची नाराजी वाढत गेली होती. या कारणांमुळे ते पक्षातून बाहेर पडल्याची चर्चा आहे. आता ते एकनाथ शिंदे यांच्या शिवसेनेत प्रवेश करणार असल्याचे समजते. काही दिवसापूर्वीच त्यांनी शिंदेंची भेटही घेतली होती. या भेटीतच त्यांच्या प्रवेशाबाबत निश्चिती झाल्याची चर्चा झाली आणि आता पुढील एक-दोन दिवसांता पक्षप्रवेशाचा कार्यक्रम होऊ शकतो, असा अंदाज वर्तवला जात आहे.

म्हात्रे यांच्या काँग्रेसला सोडचिठ्ठी दिल्याने नवी मुंबईत पक्षाचे अस्तित्व राहणार की नाही, असा प्रश्न उपस्थित झाला आहे. तर म्हात्रे यांनी शिवसेनेत प्रवेश केल्यास शिंदेंची ताकद आणखी वाढणार आहे. नवी मुंबईत महापालिका निवडणुकीदरम्यान भाजप आणि शिवसेना आमनेसामने येण्याची शक्यता आहे. त्यामुळे म्हात्रे यांच्या प्रवेशाला महत्व प्राप्त झाले आहे.