Municipal election : राष्ट्रवादीने तिसऱ्या नगराध्यक्षपदाचा सस्पेन्सही संपवला, भाजपने दावा करूनही पदरात काहीच नाही

Raigad News : आगामी नगर परिषदेच्या निवडणुका जिंकण्यासह नगराध्यक्षपदावर ताबा मिळवण्यासाठी रायगडमध्ये जोरदार हालटाची सुरू झाल्या आहेत. राष्ट्रवादी काँग्रेसने शिंदेंच्या शिवसेनेशी सुरू असलेल्या वादानंतर थेट फारकत घेत महायुती तुटणारी घोषणा केली. राष्ट्रवादीचे माजी आमदार अनिकेत तटकरे यांनी शिंदेंच्या शिवसेनेला वगळून भाजप आणि राष्ट्रवादी काँग्रेसची युती झाल्याची घोषणा केली.

त्यापाठोपाठ प्रदेशाध्यक्ष खासदार सुनिल तटकरे यांनी माथेरान आणि कर्जत नगरपरिषदेसाठी नगराध्यक्ष पदासाठी उमेदवारांच्या नावाची घोषणा केली होती. पण खोपोली नगरपालिकेच्या नगराध्यक्षपदाच्या जागेवरून पक्षातच सुरू असणारी रस्सीखेच आणि भाजपने केलेला दावा यामुळे याची घोषणा करण्यात आली नव्हती. पण आता जिल्हाध्यक्ष सुधाकर घारे यांनी याची आता घोषणा करत सस्पेन्सही संपवला आहे. यामुळे जिल्ह्यातील माथेरान, कर्जत आणि खोपोली नगरपालिकेच्या नगराध्यक्ष पदाच्या निवडणुकीत राष्ट्रवादीचेच उमेदवार असतील हे स्पष्ट झाले आहे.

राष्ट्रवादीकडून माथेरान नगरपरिषदेसाठी अजय सावंत आणि कर्जत नगरपरिषदेसाठी पुष्पा हरिश्चंद्र दगडे यांची नगराध्यक्ष पदासाठी उमेदवारी तटकरे यांनी जाहीर केली. मात्र खोपोली नगरपालिकेच्या थेट नगराध्यक्षपदाच्या जागेवरून पक्षांतर्गत रस्सीखेच सुरू असल्याने नाव जाहीर केली नव्हती. त्यांनी उमेदवाराचे नाव गुलदस्त्यात ठेवले होते. त्यामुळे येथे कोणाचे नाव पुढे येते याची जिल्ह्यात उत्सुकता लागली होती.

दरम्यान आता खोपोली नगराध्यक्ष पदासाठी राष्ट्रवादीकडू्‌‍न डॉ.सुनिल पाटील यांच्या नावाला उमेदवार म्हणून पसंती देण्यात आल्याची घोषणा जिल्हाध्यक्ष सुधाकर घारे यांनी शनिवारी केली. यामुळे अखेर खोपोलीच्या नगराध्यक्षपदाचा तिढा सुटला आहे. मात्र येथे अद्याप नाराजी असून माजी नगराध्यक्ष दत्ताजीराव मसुरकर,माजी नगरसेवक मंगेश दळवी यांची मनधरणी करण्यात तटकरे यशस्वी होणार का हे पाहावं लागणार आहे.

खोपोली नगरपालिकेच्या नगराध्यक्ष पदाचे आरक्षण हे सर्वसाधारण पडल्याने प्रत्येक पक्षाने या नगराध्यक्ष पदाच्या उमेदवारीवर दावा केला होता. त्यातच येथे राष्ट्रवादीने थेट शिवसेनेशी फारकत घेतली. तर भाजपला जवळ करत युती केली. तसेच कर्जत आणि खोपोली नगरपालिकेच्या नगराध्यक्ष पदाचे उमेदवार राष्ट्रवादीने जाहीर केले. यामुळे खोपोली भाजपसाठी सोडली जाईल अशी चर्चा होती. तसा दावाच भाजपने दोन एक दिवसांपूर्वी केला होता. मात्र पक्षाकडून नावाची घोषणा करण्यात आली नव्हती.

पण आता अजित पवारांच्या राष्ट्रवादी पक्षाकडून उमेदवारी अर्ज भरण्यासाठी दोन दिवसांची मुदत राहिली असतानाही नगराध्यक्ष पदासाठीचा उमेदवार जाहीर करण्यात आला आहे. जिल्हाध्यक्ष घारे यांनी खोपोलीत पक्ष कार्यालयात पत्रकार परिषद घेत नगराध्यक्ष पदाचे उमेदवार डॉ.सुनील पाटील असतील अशी घोषणा केली. यामुळे आता राष्ट्रवादीतील कार्यकर्ते आणि मतदारांमधील संभ्रम दूर झाला आहे.

FAQs :

1. खोपोली नगराध्यक्षपदासाठी राष्ट्रवादीने कोणाची निवड केली?

राष्ट्रवादीने डॉ. सुनील पाटील यांची नगराध्यक्षपदासाठी उमेदवार म्हणून निवड केली आहे.

2. घोषणेला उशीर का झाला?

पक्षातील रस्सीखेच आणि भाजपने केलेल्या दाव्यांमुळे घोषणा काही काळ थांबवण्यात आली होती.

3. घोषणा कोणी अधिकृतपणे केली?

राष्ट्रवादीचे जिल्हाध्यक्ष सुधाकर घारे यांनी शनिवारी अधिकृत घोषणा केली.

4. या घोषणेचा स्थानिक राजकारणावर काय परिणाम होऊ शकतो?

या निर्णयामुळे निवडणुकीतील समीकरणे बदलू शकतात आणि पक्षांतर्गत गटबाजीही थांबण्याची शक्यता आहे.

5. भाजपचा या जागेवर काय दावा होता?

भाजपने या जागेवरून दावा केला होता, त्यामुळे राजकीय तणाव निर्माण झाला होता.