Shivsena UBT Crisis : उद्धव ठाकरेंनी भाकरी फिरवताच नाराजीचा स्फोट! कोकणात नव्या नियुक्त्यांमुळे शिवसैनिक आक्रमक

Panvel Shivsena UBT News : नुकताच पनवेलमध्ये शिवसेनेत मोठ्या उलथा पालथी झाल्या असून दीपक निकम यांची जिल्हाप्रमुखपदी तर समाधान काशीद यांची थेट महानगरप्रमुखपदी वर्णी लागली आहे. यामुळे पक्षाशी निष्ठावंत राहिलेल्या शिरीष घरत यांना आपल्या पदावरून पायउतार व्हावे लागले आहे. या नियुक्तीनंतर आता पनवेलमध्ये नाराजीचा उद्रेक पाहायला मिळत असून घरत समर्थक आक्रमक झाले आहेत.

शिवसेना उद्धव बाळासाहेब ठाकरे पक्षाचे प्रमुख उद्धव ठाकरे यांनी पक्षात भाकरी फिरवत नव्या नियुक्त्या केल्या. ज्यानंतर नवनियुक्त जिल्हाप्रमुख दिपक निकम यांनी मुंबईत 'मातोश्री' निवासस्थानी जाऊन पक्षप्रमुख उद्धव ठाकरे यांची भेट घेतली. यावेळी निकम यांचे अभिनंदन ठाकरे यांनी केले. तसेच पनवेलमध्ये पक्ष संघटना अधिक मजबूत करण्याच्या सूचना दिल्या. ही भेट पनवेलमधील शिवसेनेच्या नव्या संघटनात्मक रणनीतीच्या दृष्टीने महत्त्वपूर्ण मानली जात आहे.

दरम्यान आता या नियुक्तीने घरत समर्थक मोठ्या प्रमाणात नाराज झाल्याची माहिती मिळत आहे. तर ही नाराजी जाहीर करण्यात आलेल्या कार्यकारिणीत शिरीष घरत तसेच पूर्वाश्रमीचे महानगर प्रमुख अवचित राऊत यांना स्थान न देण्यावरून समोर येत आहे. तर पनवेलमध्ये पक्षासाठी कठीण काळात साथ देणाऱ्या पदाधिकाऱ्यांना डावलल्याने कमजोर असलेली उद्धवसेना आणखी कमजोर होण्याची भीती व्यक्त केली जात आहे. तर या नियुक्त्या पनवेल शिवसेनेत नेहमीच वर्चस्व राहिलेले बबन पाटील यांच्या हस्तक्षेपामुळेच झाल्याची चर्चा आहे.

दरम्यान आता पनवेल महापालिकेत नियुक्ती झालेल्या स्वीकृत नगरसेवक पदावरून देखील आता खटके उडताना दिसत आहे. बबन पाटील यांनी आपले समर्थक नितीन गावंड यांची नियुक्ती केली असून यात देखील मोठी आर्थिक देवाण-घेवाण झाल्याची चर्चा रंगली होती. अशातच आता नव्या नियुक्त्यांमुळे पुन्हा एकदा नवा वाद सुरू झाला आहे.

या नियुक्त्यांत बबन पाटील यांचे बंधू रामदास पाटील व खारघरमधील पक्षाचे नेते भरत पाटील यांना उपजिल्हा प्रमुख केल्याने या वादाला तोंड फुटले आहे. तर शिरीष घरत यांनी पक्षाची ताकद वाढवत पनवेल महापालिकेतही पक्षाची ताकद वाढली. एकही जागा नसलेल्या पालिकेत त्यांनी पक्षाच्या चिन्हावर पाच नगरसेवक निवडून आणले. पण नव्या नियुक्त्त्यामध्ये आपल्याला विश्वासात घेतले नाही, अशी खंत व्यक्त केलीय.

FAQs :

1. पनवेलमध्ये शिवसेनेत कोणते बदल करण्यात आले?

दीपक निकम यांची जिल्हाप्रमुखपदी आणि समाधान काशीद यांची महानगरप्रमुखपदी नियुक्ती करण्यात आली आहे.

2. शिरीष घरत यांच्याबाबत काय निर्णय झाला?

त्यांना जिल्हाप्रमुख पदावरून पायउतार व्हावे लागले आहे.

3. या बदलांनंतर कोण नाराज असल्याची चर्चा आहे?

शिरीष घरत समर्थक नाराज असल्याची चर्चा सुरू आहे.

4. समाधान काशीद यांची पक्षात कोणत्या पदावर नियुक्ती झाली?

त्यांची थेट महानगरप्रमुखपदी नियुक्ती करण्यात आली आहे.

5. उद्धव ठाकरे यांच्या निर्णयानंतर काय चर्चा सुरू झाली?

पनवेलमधील शिवसेनेच्या नव्या राजकीय समीकरणांची आणि अंतर्गत नाराजीची चर्चा सुरू झाली आहे.