निवडणुकीपूर्वीच तळकोकणात महायुतीत संघर्ष? शिवसेनेचा 'एकला चलो रे'चा नारा? भाजप-राष्ट्रवादीची कोंडी?

थोडक्यात बातमीचा सारांश :

1. रत्नागिरी जिल्ह्यातील जिल्हा परिषद आणि पंचायत समितीच्या सार्वत्रिक निवडणुका पावसाळ्यानंतर होण्याची शक्यता आहे.

2. उपमुख्यमंत्री एकनाथ शिंदे यांच्या नेतृत्वाखालील शिवसेनेचे रत्नागिरी जिल्ह्यात मोठे प्राबल्य असल्यामुळे, जिल्हा परिषद पुन्हा त्यांच्या ताब्यात राहण्याची शक्यता वर्तवली जात आहे.

3. आगामी निवडणुकांमध्ये शिंदे सेना भाजप आणि राष्ट्रवादीला सोबत घेऊन महायुती म्हणून लढणार की, स्वतंत्रपणे निवडणूक लढवणार, याबाबत राजकीय वर्तुळात मोठी उत्सुकता आहे.

चिपळूण : मुझफ्फर खान

जिल्हा परिषद आणि पंचायत समितीच्या सार्वत्रिक निवडणुकांचे बिगुल पावसाळ्यानंतर वाजण्याची शक्यता आहे. रत्नागिरी जिल्ह्यात उपमुख्यमंत्री एकनाथ शिंदे यांच्या सेनेचे प्राबल्य आहे. त्यामुळे रत्नागिरी जिल्हा परिषद पुन्हा एकदा शिवसेनेच्या ताब्यात राहण्याची शक्यता आहे. शिंदे शिवसेना भाजप आणि राष्ट्रवादीला सोबत घेणार की, स्वतंत्र जिल्हा परिषद लढवणार याची सर्वांना उत्सुकता आहे.

रत्नागिरी जिल्हा परिषद निवडणुकीला सामोरे जाताना शिवसेना (शिंदे) सर्वाधिक जागा मागणार, हे निश्चित आहे. दापोली आणि चिपळूण मतदार संघातून राष्ट्रवादीकडून काही जागांची मागणी होईल; मात्र या दोन्ही पक्षाचे उमेदवार ज्या ठिकाणाहून हमखास निवडून येणार त्या जागा भाजप मागणार, असे बोलले जात आहे. शिवसेनेकडून प्रेमाने दिल्या जाणाऱ्या जागांवर राष्ट्रवादी आणि भाजपने समाधान मानले नाही तर जिल्हा परिषद निवडणूक स्वतंत्र लढवण्याची तयारी शिंदे यांच्या शिवसेनेने केल्याची चर्चा सुरू आहे.

रत्नागिरी जिल्हा परिषदेचा राजकीय इतिहास पाहिला तर 1997 पासून जिल्हा परिषदेवर शिवसेनेची एकतर्फी सत्ता आहे. 1992 ते 1997 या कालावधीत काँग्रेसची सत्ता होती; मात्र त्यानंतर 1997 पासून सलग 28 वर्ष ही जिल्हा परिषद सेनेच्या ताब्यात आहे. राज्यात पंधरा वर्ष काँग्रेस राष्ट्रवादी आघाडीचे सरकार होते. त्या काळात ही रत्नागिरी जिल्हा परिषद शिवसेनेच्या ताब्यात होती. जिल्ह्यात राष्ट्रवादीने बऱ्यापैकी ताकद निर्माण केली होती तरीही जिल्हा परिषद ताब्यात घेता आली नाही.

आता शिवसेनेचे दोन भाग झाले आहेत. उद्धव ठाकरे यांची शिवसेना मर्यादित तालुक्यांमध्ये आहे. मात्र रत्नागिरी जिल्ह्यातील पाचपैकी तीन आमदार एकनाथ शिंदे यांच्या शिवसेनेचे आहेत. ठाकरे यांच्या शिवसेनेतून विधानसभेची निवडणूक लढवलेले दोन माजी आमदार शिंदे यांच्या शिवसेनेत आले आहेत. त्यामुळे रत्नागिरी, राजापूर आणि दापोली विधानसभा मतदार संघात शिवसेनेची (शिंदे) ताकद मोठी आहे.

पालकमंत्री उदय सामंत यांनी चिपळूण विधानसभा मतदार संघात शिवसेना वाढवण्यासाठी लक्ष दिले आहे. त्यामुळे आगामी निवडणुकीत जिल्हा परिषद एकहाती ताब्यात घेण्यासाठी एकनाथ शिंदे यांच्या शिवसेनेचा प्रयत्न राहील. या निवडणुकीसाठी प्रभागरचनेचा प्रारूप आराखडा तयार झाला असून, त्यांची अधिसूचना जारी करण्यात आली आहे. यावर येणाऱ्या हरकती विचारात घेऊन ही प्रभागरचना अंतिम करण्यात येणार आहे.

आगामी जिल्हा परिषद आणि पंचायत समिती निवडणुकांच्या पार्श्वभूमीवर जिल्हा प्रशासनाने गट आणि गणांचा प्रारूप मसुदा जाहीर केला आहे. नव्याने केलेल्या प्रारूप प्रभाग पुनर्रचना संपुष्टात आल्याने पूर्वीच्या गट आणि गणाच्या संख्येत वाढ झाली आहे. पूर्वी 55 गट आणि 110 गणांची संख्या होती. आता जिल्ह्यात 56 गट तर 112 गणांची संख्या असणार आहे. नव्या प्रारूप मसुद्यानुसार गुहागर तालुक्यात एक गट आणि दोन गणांची निर्मिती झाली आहे.

वारंवार विचारले जाणारे प्रश्न :

प्र.1: रत्नागिरी जिल्हा परिषद आणि पंचायत समिती निवडणुका कधी होण्याची शक्यता आहे? उ.1: रत्नागिरी जिल्हा परिषद आणि पंचायत समितीच्या निवडणुका पावसाळ्यानंतर वाजण्याची शक्यता आहे.

प्र.2: रत्नागिरी जिल्ह्यात कोणत्या पक्षाचे प्राबल्य आहे? उ.2: रत्नागिरी जिल्ह्यात उपमुख्यमंत्री एकनाथ शिंदे यांच्या नेतृत्वाखालील शिवसेनेचे (शिंदे गट) प्राबल्य आहे.

प्र.3: रत्नागिरी जिल्हा परिषद पुन्हा कोणाच्या ताब्यात राहण्याची शक्यता आहे? उ.3: शिंदे सेनेचे प्राबल्य असल्याने, रत्नागिरी जिल्हा परिषद पुन्हा एकदा शिवसेनेच्या ताब्यात राहण्याची शक्यता आहे.

प्र.4: आगामी निवडणुकीत शिंदे सेना कशी लढणार आहे? उ.4: शिंदे सेना भाजप आणि राष्ट्रवादीला सोबत घेऊन महायुती म्हणून लढणार की, स्वतंत्र जिल्हा परिषद लढवणार, याबाबत अजून स्पष्टता नाही आणि तीच उत्सुकता आहे.

प्र.5: या निवडणुकांमध्ये कोणकोणते पक्ष सहभागी होण्याची शक्यता आहे? उ.5: या निवडणुकांमध्ये मुख्यत्वे एकनाथ शिंदे यांची शिवसेना, भाजप आणि राष्ट्रवादी काँग्रेस हे पक्ष प्रमुख भूमिकेत असण्याची शक्यता आहे.