सूत्रे हाती येताच माजी आमदार सूर्यकांत दळवींनी केली मोठी घोषणा

दाभोळ : दापोली नगरपंचायतीच्या सार्वत्रिक निवडणुकीसाठी शिवसेना (shivsena) आणि राष्ट्रवादी काँग्रेसची (NCP) आघाडीची घोषणा शिवसेनेचे माजी आमदार सूर्यकांत दळवी व राष्ट्रवादीचे माजी आमदार संजय कदम यांच्या उपस्थितीत झालेल्या पत्रकार परिषदेमध्ये गुरुवारी (ता. ९ डिसेंबर) करण्यात आली. (Shiv Sena-NCP alliance in Dapoli: Former MLA Suryakant Dalvi announcement)

या वेळी आघाडीतर्फे समन्वय साधून उमेदवारांचा प्रचार करण्यात येईल, असेही सांगण्यात आले. ही आघाडी वरिष्ठ पातळीवरून जाहीर झाली असल्याने दोन्ही पक्षांचे पदाधिकारी व कार्यकर्ते प्रचारात सामील होणार आहेत. या निवडणुकीसाठी शिवसेना ८, तर राष्ट्रवादी ९ जागा दापोलीमध्ये लढणार आहेत. मंडणगडमध्ये आघाडी झाली आहे. या ठिकाणी पाच जागा राष्ट्रवादी, ४ जागा शिवसेना व दोन जागा अपक्ष लढणार असल्याचे जाहीर करण्यात आले.

शिवसेनेच्या वतीने अरिफ मेमन, ममता मोरे, प्रियांका अमृते, शिवानी खानविलकर, सुचिता रेळेकर, रवींद्र क्षीरसागर, अजीम चिपळूणकर, तर राष्ट्रवादी काँग्रेसच्या वतीने परवीन शेख, खालीद रखांगे, मेहबूब लांजेकर, विलास शिगवण यांची उमेदवारी जाहीर करण्यात आली. महाआघाडीला कोणाचाही विरोध नसल्याने सर्व उमेदवार विजयी होतील, असा आशावाद या वेळी व्यक्त करण्यात आला.

वरिष्ठ पातळीवर ठरल्याप्रमाणे दापोली आणि मंडणगड येथे दोन्ही पक्षाच्या वतीने एबी फॉर्म वाटप केले असून त्यानुसार दोन्ही पक्षाच्या विचाराने निवडणुकीला सामोरे जाऊ. आगामी काळात अडीच, अडीच वर्ष नगराध्यक्षपद घेतले जाईल, असे सांगण्यात आले.

आमदार कदमांनी आघाडीत सामील व्हावे

व्यक्तीपेक्षा पक्षसंघटना श्रेष्ठ आहे. त्यामुळे आमदार योगेश कदम यांनीही आपल्या कार्यकर्त्यांसह या प्रवाहात सामील व्हावे. या निवडणुकीत अपक्ष उमेदवारांनी अर्ज सादर केले आहेत. त्यांना देखील अर्ज मागे घेण्याबाबत विनंती केली जाईल, असे माजी आमदार दळवी यांनी सांगितले.