Shiv Sena vs NCP Raigad : रायगडमध्ये शिवसेना आणि खासदार सुनील तटकरे टोकाचा वाद उफळला आहे. उपमुख्यमंत्री एकनाथ शिंदे यांची शिवसेनेचे आमदार, मंत्री आणि शिवसेना पदाधिकारी राष्ट्रवादी काँग्रेसचे खासदार सुनील तटकरेंवर तुटून पडले आहे. खासदार सुनील तटकरे आणि त्यांची कन्या मंत्री आदिती तटकरेंविरोधात एकापोठापाठ एक, अशी आरोपांची राळ उडवून दिली आहे.
रायगडमधील अलिबाग मुरूड रोहा मतदारसंघातील एकनाथ शिंदे यांच्या शिवसेनेचे आमदार महेंद्र दवळी यांनी खासदार तटकरेंवर निशाणा साधत, गंभीर आरोप केला. भैयुजी महाराजांकडून आघोरी विद्या करून घेणाऱ्या तटकरेंचा खरा चेहरा आता मी महाराष्ट्रासमोर आणणार असल्याचा इशारा दिला आहे.
अलिबाग इथं शिवसेनेच्या आढावा बैठक मेळाव्यात त्यांनी राष्ट्रवादी काँग्रेसचे खासदार सुनील तटकरे (Sunil Tatkare) यांच्यावर आमदार दळवी यांनी निशाणा साधला. आमदार दळवी यांनी तटकरेंविरोधात गंभीर आरोप करत खळबळ उडवून दिली. यासाठी त्यांनी भैयुजी महाराज यांचा संदर्भ दिल्याने, आणि त्यासंदर्भातील आपल्याकडे पुरावे असल्याचे आमदार दळवी यांनी केलेल्या आरोपांची आता चर्चा सुरू झाली आहे.
आमदार दळवी म्हणाले, "भैयुजी महाराज आता या दुनियेत नाहीत. काही मी राष्ट्रवादीमध्ये (NCP) काम केलं आहे. निवडणूक आली, जेंव्हा मोठं पद हवं असतं, किंवा एखादा मोठा बदल घडवायचा असतो, तेंव्हा तटकरे महाराजांची आधार घ्यायचे. भैयुजी महाराजांकडून तटकरेंनी अशा अनेक आघोरी विद्येचे प्रकार केले आहे. त्याची अधिकृत कॅसेट देखील आपल्याकडे आहे. याची चिंता तुम्ही करू नका". तटकरेंचा खरा चेहरा मी आता महाराष्ट्रसमोर आणणार आहे, असे दळवी यांनी म्हणत खळबळ उडवून दिली.
मंत्री भरत गोगावले यांचे आघोरी पुजा केल्याचे व्हिडिओ समाज माध्यमांवर व्हायरल झाले आहे. यावरून बोलताना महेंद्र दळवी यांनी गोगावले हा सर्वसामान्य माणूस आहे. तो सर्वसामान्यांसाठी काम करतो. त्यांची तटकरेंनी अशी बदनामी करणे योग्य नाही. पण त्यांना त्यांच्या भाषेत आता उत्तर द्यावे लागेल, असे आमदार महेंद्र दळवी यांनी म्हटले.
दरम्यान, एकनाथ शिंदे यांच्या शिवसेना पक्षाचे कर्जतमधील आमदार महेंद्र थोरवे यांनी देखील तटकरे कुटुंबांवरती सरकारी जमीन लाटल्याचा गंभीर आरोप करत, खळबळ उडवून दिला. आदिती तटकरे यांच्या मंत्री पदाचा राजीनाम्याची मागणी आमदार थोरवे यांनी केली आहे. रोहा तालुक्यातील दुरटोली गावा जवळील एका सरकारी जमिनीवर आधी शेतकऱ्यांचे नाव लावले नंतर ती जमीन तटकरे यांनी विकत घेतली, असा आरोप आमदार महेंद्र थोरवे यांनी केला.
रायगड जिल्ह्याच्या पालकमंत्रिपदावर एकनाथ शिंदे यांच्या शिवसेनेत आणि अजित पवार यांच्या राष्ट्रवादी काँग्रेसमधील वाद टोकाला पोचला आहे. महायुतीची सत्ता स्थापन होऊन, देखील रायगड जिल्ह्यातील पालकमंत्रिपदाचा तिढा सुटलेला नाही. त्यातून पुन्हा दोन्ही पक्ष आमने-सामने येत पावसाळी अधिवेशनाच्या तोंडावर एकमेकांविरोधात गंभीर आरोप करत आहेत. या सत्ताधारी मित्रपक्षांचे एकमेकांवरील आरोपाचे पडसाद विधानभवनात उमटणार असे दिसते आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.