Sindhudurg Politics : राजकीय नेत्यांमध्ये कार्यालयातच जुंपली? एक पदाधिकारी दुसऱ्याच्या अंगावर काठी घेऊन धावला; तळकोकणातील राजकीय वर्तुळात खळबळ

Sindhudurg Politics News : सिंधुदुर्ग जिल्ह्यातील वैभववाडी तालुक्यात एका राजकीय पक्षाच्या कार्यालयात पदाधिकाऱ्यांमधील वाद विकोपाला गेल्याची चर्चा रंगली आहे. पक्षाच्या बंद दाराआड आयोजित बैठकीत एका पदाधिकाऱ्याने दुसऱ्या पदाधिकाऱ्याच्या अंगावर थेट काठी घेऊन धाव घेतल्याची माहिती समोर आली आहे. मात्र, उपस्थित इतर पदाधिकाऱ्यांनी वेळीच हस्तक्षेप करून त्याला रोखल्याने मोठा अनर्थ टळला. एका कामाच्या देवाणघेवाणीवरून हा वाद सुरू झाल्याची चर्चा असून, या प्रकारामुळे तालुक्यातील राजकीय वर्तुळात खळबळ उडाली आहे.

मिळालेल्या माहितीनुसार, जिल्ह्यातील संबंधित राजकीय पक्षाच्या कार्यालयात बंद दाराआड बैठक आयोजित करण्यात आली होती. या बैठकीला पक्षाचे आजी-माजी प्रमुख तसेच तालुका पातळीवरील महत्त्वाचे पदाधिकारी उपस्थित होते. सुरुवातीला पक्षाच्या काही महत्त्वाच्या विषयांवर चर्चा झाली. त्यानंतर एका कामाच्या देवाणघेवाणीचा विषय चर्चेला आला आणि वातावरण अचानक तापल्याचे सांगितले जात आहे.

कामाच्या देवाणघेवाणीवरून वादाला सुरुवात

संबंधित विषयावर चर्चा सुरू असताना दोन पदाधिकाऱ्यांमध्ये शाब्दिक खडाजंगी झाली. सुरुवातीला झालेला वाद हळूहळू वाढत गेला. दोघांमधील शाब्दिक चकमक इतकी विकोपाला गेली की, बंद दाराआड सुरू असलेला आवाज बाहेरपर्यंत ऐकू जाऊ लागला. याचदरम्यान एका पदाधिकाऱ्याचा पारा चांगलाच चढला. तो अचानक जागेवरून उठला आणि दुसऱ्या पदाधिकाऱ्याला शिवीगाळ करू लागला. एवढ्यावरच न थांबता जवळच असलेली काठी हातात घेत त्याने संबंधित पदाधिकाऱ्याच्या दिशेने धाव घेतल्याची चर्चा आहे.

चार-पाच पदाधिकाऱ्यांनी रोखले; मोठा अनर्थ टळला

हा प्रकार पाहून बैठकीला उपस्थित असलेल्या चार ते पाच पदाधिकाऱ्यांनी तातडीने हस्तक्षेप केला. त्यांनी काठी घेऊन धावणाऱ्या पदाधिकाऱ्याला रोखले. त्यामुळे संभाव्य मारहाण टळली आणि मोठा अनर्थ घडण्यापासून बचाव झाला. मात्र, या गोंधळादरम्यान संबंधित पदाधिकाऱ्याची शिवीगाळ सुरूच होती, असे सांगितले जात आहे. या संपूर्ण प्रकारात पक्षातील काही ज्येष्ठ पदाधिकाऱ्यांनाही अपमानास्पद परिस्थितीचा सामना करावा लागल्याची चर्चा आहे. त्यामुळे बैठकीतील वातावरण अधिकच तणावपूर्ण झाले होते.

बंद दाराआडचा वाद तालुक्यात चर्चेचा विषय

पक्षाच्या कार्यालयात बंद दाराआड झालेल्या या प्रकाराची माहिती काही मिनिटांतच बाहेर पसरली. त्यानंतर वैभववाडी तालुक्यात या घटनेची जोरदार चर्चा सुरू झाली. कामाच्या देवाणघेवाणीवरून सुरू झालेला हा वाद आता पक्षाच्या वरिष्ठ नेत्यांपर्यंत पोहोचल्याचे बोलले जात आहे. दरम्यान, या घटनेची पक्षाचे वरिष्ठ नेते कशी दखल घेतात आणि संबंधित पदाधिकाऱ्यांबाबत काय निर्णय घेतात, याकडे आता तालुक्यातील राजकीय वर्तुळाचे लक्ष लागले आहे. पक्षांतर्गत वादामुळे संघटनेतील वातावरणही चर्चेच्या केंद्रस्थानी आले आहे.