राज्याचे उपमुख्यमंत्री व शिवसेनेचे मुख्य नेते एकनाथ शिंदेंच्या एस्कॉर्ट पथकातील पोलीस उपनिरीक्षक विजय सागंडे यांचं हृदयविकाराच्या झटक्यानं निधन झालं आहे. ते 57 वर्षांचे होते.ड्युटीवर आल्यानंतर ठाण्याच्या शासकीय विश्रामगृहात त्यांच्या छातीत दुखण्यास सुरुवात झाली. याचदरम्यान, त्यांना चक्करही आली.सांगडे यांना तात्काळ जवळच्या रुग्णालयात दाखल करण्यात आलं. मात्र, उपचारादरम्यान त्यांचा मृत्यू झाला.
राष्ट्रवादी काँग्रेस पार्टी शरदचंद्र पवार पक्षाच्या महिला प्रदेशाध्यक्षा रोहिणी खडसे यांनी बिहारच्या जमुई येथे घडलेल्या घटनेबाबत तीव्र संताप व्यक्त केला आहे. त्यांनी अंधभक्तांची जमात आहे, ती फोफावत चालली असल्याचं म्हटलं आहे. बिहारमधील हा व्हिडिओ प्रचंड मन हेलवून टाकणारा आणि त्यासोबतच चीड आणणारा आहे. दहावीत शिकणाऱ्या मुलीचा या तथाकथित 'संस्कृती रक्षकांनी' अक्षरशः विनयभंग केला असल्याची टीका त्यांनी सोशल मीडियावरील पोस्टमधून केला आहे.
विधान परिषदेचे माजी विरोधी पक्षनेते व शिवसेना उद्धव बाळासाहेब ठाकरे पक्षाचे नेते अंबादास दानवे यांनी महाराष्ट्रातील मराठवाडा आणि विदर्भात दुष्काळसदृश परिस्थिती निर्माण झाली आहे. कर्नाटक सरकारने तीन आठवड्यांपूर्वीच 130 तालुक्यांमध्ये दुष्काळ जाहीर केला आहे. मग महाराष्ट्र सरकारला दुष्काळ जाहीर करण्यासाठी 5 ऑक्टोबरची वाट पाहण्याची गरजच काय असा सवाल उपस्थित केला आहे.
बीड : मस्साजोगचे सरपंच संतोष देशमुख हत्या प्रकरणातील खटल्याच्या सोमवारी झालेल्या सुनावणीत सरकारी पक्षाने साक्षीदार, पुराव्याची तपासणी लवकर करावी, अशी मागणी केली. बीडच्या विशेष न्यायालयात सोमवारी झालेल्या सुनावणी दरम्यान, सरकारी पक्षाने जप्त करण्यात आलेल्या पुराव्यांच्या सुरक्षेबाबत युक्तिवाद केला. न्यायालयाने दोन्ही बाजूंचे म्हणणे ऐकून घेत या प्रकरणाची पुढील सुनावणी आता 30 सप्टेंबर रोजी निश्चित करण्यात आली आहे.
राज्यातील SIR प्रक्रियेत २ कोटी ६ लाख नावं वगळण्यात आले आहेत. त्यामुळं नाव नोंदणी आणि दुरुस्तीसाठी मुदतवाढ देण्याची जोरदार मागणी काँग्रेसकडून केली जात आहे. याच मुद्द्याच्या अनुषंगाने प्रदेशाध्यक्ष हर्षवर्धन सपकाळ यांच्या नेतृत्वात काँग्रेसचे शिष्टमंडळ उद्या सकाळी साडेअकरा वाजता मुख्य निवडणूक अधिकारी चोक्कलिंगम यांची भेट घेणार आहे.
राज्य लोकसेवा आयोगाच्या पेपर फुटीप्रकरणातील सर्व आरोपींना येत्या ५ आक्टोंबरपर्यंत न्यायालयीन कोठडी सुनावण्यात आली आहे. या सुनावणीसाठी प्रत्यक्ष केवळ ऋतुजा पाटील उपस्थित होते, बाकीचे सर्व आरोपी व्हिडिओ कॉन्फिरन्सिंगद्वारे उपस्थित होते. यातील एकाही आरोपीने आतापर्यंत जामीनासाठी अर्ज केलेला नाही.
राज्य महिला आयोगाचे अध्यक्षपद आणि महिला आर्थिक विकास महामंडळाचे अध्यक्षपद लवकरात लवकर भरण्यात यावे, अशी मागणी आम्ही सरकारकडे केली आहे. मुख्यमंत्री देवेंद्र फडणवीस आणि उपमुख्यमंत्री सुनेत्रा पवार यांना भेटून ही विनंती केली आहे. यातील महिला अर्थिक विकास महामंडळ भाजपकडे असून महिला आयोगाचे अध्यक्षपद राष्ट्रवादीकडे आहे, असे भाजप आमदार चित्रा वाघ यांनी सांगितले.
भारतीय जनता पक्षाचे आमदार प्रवीण दरेकर यांच्या ताफ्यातील गाडीला मुंबईतील ‘फ्री वे’वर अपघात झाला आहे. या अपघातात दरेकर यांच्या पायाला खरचटले आहे, त्यामुळे त्यांना किरकोळ दुखापत झाली आहे.
तुळजापूरमध्ये शेतकऱ्याने अंगावर पेट्रोल ओतून आत्मदहन करण्याचा प्रयत्न केला आहे. काँग्रेसच्या वतीने तुळजापुरात शेतकरी आक्रोश मोर्चा काढण्यात आला होता, त्या मोर्चादरम्यान तुळजापूर तहसील कार्यालयासमोर हा प्रकार घडला आहे. पोलिसांच्या सतर्कतेमुळे मोठा अनर्थ टळला आहे. तुळजापूर तालुक्यातील सुरतगाव येथे सोलार कंपनीने शेतीकडे जाणारा रस्ता अडवल्याने शेतकऱ्याने आत्मदहनाचा प्रयत्न केला.
IIT मुंबईतील विद्यार्थी आत्महत्येच्या प्रकरणावरून कॅम्पसमध्ये निर्माण झालेला रोष पाहता प्रशासनाने मोठी कारवाई केली आहे. विद्यार्थ्यांच्या तीव्र आंदोलनानंतर डीन सूर्यनारायण डुल्ला यांना तडकाफडकी निलंबित करण्यात आले आहे.
सोलापुरात ऊसाच्या थकीत बिलासाठी स्वाभिमानी शेतकरी संघटना आक्रमक झालीय... सिद्धेश्वर साखर कारकान्यासमोर ठिय्या आंदोलन पुकारण्यात आलंय.. सिद्धेश्वर साखर कारखान्याच्या थकीत असलेल्या उसाचं बिल देण्याची मागणी संघटनेकडून जोर धरू लागलीय..
IIT पवईबाहेर विद्यार्थ्यांचं आंदोलन सुरु आहे. साहिल वाकोडेच्या आत्महत्येनंतर विद्यार्थी आक्रमक झाले आहेत. पोलिसांकडून आंदोलक विद्यार्थ्यांची धरपकड केली जात आहे. मेणबत्ती लावून साहिल वाकोडेला श्रद्धांजली वाहिली जात आहे.
मिरज शासकीय रुग्णालयात प्रवेशद्वाराचं काम सुरू असताना एक दुर्घटना घडली. सिव्हिल हॉस्पिटलबाहेर स्लॅब कोसळून सात जण ढिगाऱ्याखाली अडकल्याची माहिती समोर आली आहे. या दुर्घटनेत सात जण जखमी झाले आहेत. सात जण जखमी असून जखमींची प्रकृती स्थीर असल्याची माहिती पोलीस अधीक्षक तुषार दोशी यांनी दिली आहे.
दुष्काळग्रस्त शेतकऱ्यांना तातडीची मदत मिळावी आणि नियमित कर्जदारांच्या विविध मागण्या सोडवाव्यात, या मागण्यांसाठी किसान सभेने 23 सप्टेंबरला राज्यव्यापी आंदोलनाची घोषणा केली आहे. या आंदोलनादरम्यान मंत्री आणि आमदारांना काजू-बदाम पाठवून सरकारच्या धोरणांचा अनोख्या पद्धतीने निषेध नोंदवला जाणार आहे.
लाचलुचपत प्रतिबंधक विभागाने राज्यभरात लाचखोरांविरोधात मोठी मोहीम राबवली. या कारवाईत तब्बल 3 कोटी 3 लाख रुपयांच्या लाचखोरीची प्रकरणे समोर आली आहेत. यामध्ये पोलीस विभागातील लाचखोरीचे प्रमाण सर्वाधिक असून 69 लाख रुपयांची प्रकरणे उघड झाली. नाशिक परिक्षेत्रात सर्वाधिक गुन्ह्यांची नोंद झाल्याची माहिती आहे.
शिवसेनेचे नेते रविंद्र धंगेकर यांनी संतोष पंडित यांचा पुण्यातील कार्यालयात सत्कार केला. भाजप नेत्यावर भाष्य केल्याप्रकरणी संतोष पंडित यांच्याविरोधात कोथरूड पोलीस ठाण्यात गुन्हा दाखल झाला होता. जामीन मंजूर झाल्यानंतर धंगेकरांनी त्यांचा सत्कार केल्याने राजकीय वर्तुळात या भेटीची चर्चा सुरू झाली आहे.
शहापूरच्या कोठारे येथील तीव्र उतारावर एसटी बसचा भीषण अपघात झाला आहे... ब्रेक फेल झाल्यामुळे हा अपघात झाल्याची प्राथमिक माहिती समोर आली आहे. यात 12 ते 14 प्रवासी किरकोळ तर 4 ते 5 प्रवासी गंभीर जखमी झाले आहेत. त्यांच्यावर उपजिल्हा रुग्णालयात उपचार सुरू आहेत.
महाराष्ट्रातील मराठवाडा आणि विदर्भात कमी पर्जन्यमानामुळे दुष्काळाची परिस्थिती निर्माण झाली असून, काही तालुके दुष्काळग्रस्त म्हणून घोषित करण्यात आल्याचे खासदार सुनील तटकरे यांनी सांगितले.
केंद्रीय माध्यमिक शिक्षण मंडळातर्फे (सीबीएसई) घेण्यात येणाऱ्या केंद्रीय शिक्षक पात्रता परीक्षेचे वेळापत्रक जाहीर झाले आहे. ही परीक्षा येत्या 12 आणि 13 डिसेंबरला राज्यभरात घेतली जाणार आहे. परीक्षा केंद्रांची माहिती परीक्षेपूर्वी 15 दिवस प्रसिद्ध करण्यात येणार आहे. सीबीएसईने ही माहिती दिली आहे.
लाडकी बहीण योजनेबाबत मोठी अपडेट समोर येत आहे. ऑगस्ट महिन्याचा १५०० रुपयांचा हप्ता या आठवड्यात महिलांच्या खात्यात जमा होणार आहे. २४ सप्टेंबरनंतर लाडकी बहीण योजनेचे पैसे जमा होणार असल्याची माहिती आहे. १ कोटी ६६ लाख लाडक्या बहिणींना १५०० रुपये मिळणार आहेत.
आरबीआयने १८ सप्टेंबर रोजी सहकारमंत्री बाबासाहेब पाटील यांच्यासह आठ संचालकांविरोधात कारवाई केली. त्यामुळे १० वर्षांपेक्षा अधिक काळ संचालक असलेले विद्यामान कृषीमंत्री दत्तात्रय भरणे, आमदार दिलीप वळसे पाटील यांच्यासह तब्बल पुणे जिल्ह्यातील तब्बल ९ दिग्गज जिल्हा बँक निवडणुकीत अपात्र ठरण्याची शक्यता आहे.
रविवारी खासदार संजय जाधव यांनी रुग्णालयात जात मनोज जरांगे पाटील यांची भेट घेतली. त्यांच्या प्रकृतीची विचारपूस केली आणि काळजी घेण्याचा आग्रह केला. तसेच मराठा समाजाच्या न्याय्य हक्कांसाठी अविरत संघर्ष करणाऱ्या मनोजदादांना आई तुळजाभवानी मातेच्या कृपेने लवकर पूर्ण आरोग्य लाभावे, असे म्हटले.
लातूरमध्ये जिल्हा परिषद अध्यक्षा उषा पाटील यांच्या शासकीय निवासस्थानी चोरी झाल्याची प्राथमिक माहिती आहे. चोरट्यांनी अंदाजे १२ लाख रुपये रोकड आणि चार तोळे सोन्याचे दागिने लंपास केल्याचे समोर आले आहे.
छत्रपती संभाजीनगर, शहरात रविवारी येथे सीजेपीचे संस्थापक अभिजीत दिपके यांच्यासोबत MPSC विद्यार्थ्यांची एक बैठक झाली. या बैठकीला अनेक विद्यार्थी हजर होते. या बैठकीत अभिजीत दिपके यांनी विद्यार्थ्यांना 'भीमनवार राजीनामा द्या' या मोहिमेत सहभागी होण्याचे आवाहन केले.
उल्हासनगरच्या कॅम्प क्रमांक ३ येथे विजेच्या धक्क्याने एका 26 वर्षीय तरुणीचा दुर्दैवी मृत्यू झाला आहे. सीसीटीव्ही कॅमेरा करिता उभारण्यात आलेल्या पोलच्या संपर्कात आल्याने या तरूणीला वीजेचा धक्का लागल्याची माहिती आहे. करिष्मा मडवाणी असे मृत्यू झालेल्या तरुणीचे नाव आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.