Maharashtra local body elections : महाराष्ट्रातील नगरपरिषदा आणि नगरंपचायतींचा प्रचाराची धामधुम सुरू असताना सुप्रीम कोर्टाने महत्वपूर्ण आदेश दिला आहे. राज्यातील 40 नगरपरिषदा आणि 17 नगरपंचायतीमध्ये आरक्षणाची मर्यादा 50 टक्क्यांच्या पुढे गेली आहे. त्याविरोधात दाखल याचिकेवरील सुनावणीदरम्यान सुप्रीम कोर्टाने निवडणुकांना स्थगिती देण्यास नकार दिला. पण निवडणुकांचा निकाल हा सुप्रीम कोर्टाच्या अंतिम निकालाच्या अधीन राहणार असल्याचे कोर्टाने स्पष्ट केले आहे.
नगरपरिषदा, नगरपंचायतींसह राज्यातील २० जिल्हा परिषदा, ८३ पंचायती समित्या आणि चंद्रपूर व नागपूर महापालिकेत एकूण आरक्षणाची मर्यादा ५० टक्क्यांच्या पुढे गेली आहे. त्याविरोधात सुप्रीम कोर्टात याचिका दाखल करण्यात आली आहे. त्यावर आज झालेल्या सुनावणीदरम्यान सुप्रीम कोर्टाने निवडणुकांना स्थगिती देण्यास नकार दिला.
कोर्टाने राज्य निवडणूक आयोगाला निवडणुका अडविले नाही. मात्र, ५० टक्क्यांची मर्यादा ओलांडलेल्या ठिकाणच्या निवडणुकांचे निकाल कोर्टाच्या अंतिम आदेशाच्या अधीन राहतील, असे कोर्टाने स्पष्ट केले. त्यामुळे ४० नगरपरिषदा आणि १७ नगरपंचायतींचा निकाल कोर्टाच्या अंतिम निकालाच्या अधीन असेल. कोर्टाने ५० टक्क्यांची मर्यादा अमान्य केल्यास अनेकांचे नगरसेवकपद जाण्याची भीती आहे. त्यामुळे या निवडणुकांवर टांगती तलवार कायम असणार आहे, असे याचिकाकर्ते विकास गवळी यांनी स्पष्ट केले. २०२१ मध्ये असेच घडल्याचेही त्यांनी सांगितले.
सुप्रीम कोर्टात पुढील सुनावणी २१ जानेवारी रोजी होणार आहे. दरम्यान, जिल्हा परिषद, महापालिका आणि पंचायत समित्यांच्या निवडणुकांचा मार्गही कोर्टाने मोकळा केला आहे. मात्र, पूर्वीप्रमाणेच म्हणजे ५० टक्केंची मर्यादा न ओलांडता या निवडणुका घ्याव्या लागतील. अद्याप या निवडणुकांचा कार्यक्रम जाहीर झालेला नाही.
कोर्टाच्या या आदेशामुळे निवडणूक आयोगाकडून आरक्षणाची मर्यादा ओलांडलेल्या ठिकाणच्या निवडणुका लांबणीवर टाकल्या जाणार की पुन्हा नव्या आरक्षणाची प्रक्रिया राबविली जाणार, याबाबत उत्सुकता वाढली आहे. कारण ५० टक्क्यांची मर्यादा ओलांडलेल्या ठिकाणी निवडणुका घेऊ नयेत, असे कोर्टाकडून स्पष्ट करण्यात आले आहे. तशी निवडणूक झाल्यास ती कोर्टाच्या अंतिम निकालाच्या अधीन असेल.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.