Maharashtra Election 2026 Voting LIVE Updates : 'मतदानाच्या सुरवातीलाच EVM मशीन बंद, अनेक ठिकाणी मशीनवरील वेळ 15 मिनिटे उशिराची, एकूणच हे सगळंच संशयास्पद'

कोल्हापूर महानगरपालिकेवर बहुमत आमचंच होणार असा विश्वास काँग्रेस नेते सतेज पाटील यांनी व्यक्त केला आहे. तर सध्या भाजपमध्ये नवीन भाजप आणि जुनी भाजप असा वाद सुरू आहे. जुनी भाजप सतरंज्या उचलत आहे तर नवी भाजप खुर्चीत बसल्याचा टोला यावेळी पाटील यांनी लगावला. शिवाय मतदारांना धमकावणे, पैसे वाटणे दहशत निर्माण करण्यापलीकडे महायुतीकडे सध्या काहीच नाही, असंही पाटील म्हणाले.

पुणे, पिंपरी-चिंचवडसह राज्यात अनेक ठिकाणी मतदानाची सुरवातच बंद मशीनने झाली, तर अनेक ठिकाणी EVM वरील वेळ सुमारे १५ मिनिटे उशिराची दाखवली जातेय, काही ठिकाणी तिसऱ्या उमेदवाराला मत दिल्याचं बटन दाबल्यानंतर लाईट लागते, काही ठिकाणी शेवटचं (चौथं) बटन दाबल्यानंतर आवाज येतो पण लाईट लागत नाही.. एकूणच हे सगळंच संशयास्पद आणि निवडणुकीबाबत अविश्वास निर्माण करणारं आहे. निवडणूक आयोगाने याबाबत स्पष्टीकरण देऊन हा गोंधळ तातडीने दूर करावा आणि मतदान हे मुक्त व निर्भय वातावरणासह मत दिलेल्या उमेदवारांनाच ते गेलं पाहिजे, याची काळजी घ्यावी, असं ट्विट शरद पवारांच्या ऱाष्ट्रवादीचे आमदार रोहित पवार यांनी केलं आहे.

राष्ट्रीय स्वयंसेवक सघाचे सरसंघचालक मोहन भागवत यांनीआज नागपूर महानगर पालिकेसाठी मतदान केले.

भाजप प्रदेशाध्यक्ष रवींद्र चव्हाण यांनी सहकुटुंब डोंबिवलीत मतदानाचा हक्क बजावला. यावेळी माध्यमांशी बोलताना ते म्हणाले, पंतप्रधान नरेंद्र मोदी व मुख्यमंत्री देवेंद्र फडणीस यांच्या नेतृत्वात आम्ही सर्वांनी प्रचार केला आणि आम्हाला पूर्ण खात्री आहे 29 महापालिकेत महायुतीचा महापौर असेल.

वार्ड क्रमांक 192 चे उमेदवार यशवंत किल्लेदार हे सकाळी मतदान केंद्रावर मतदानासाठी आले असता त्यावेळी एक दुबार मतदार आढळला. या दुबार यादीत असलेल्या महिला मतदाराला थांबविण्यात आल्याची माहिती आहे. या दुबार यादीत असलेल्या महिला मतदाराला थांबविण्यात आले आणि आधारकार्ड पाहून त्यांच्याकडून प्रतिज्ञापत्र भरून घेतल्यानंतर मतदान करून दिलं जाणार आहे. तर ही सगळी निवडणूक आयोगाची चूक असल्याचं यशवंत किल्लेदार यांनी म्हटलं आहे.

नाशिकमध्ये मतदानाच्या सुरुवातीलाच EVM मध्ये बिघाड झाल्याने प्रभाग क्रमांक 24 मधील मॉडर्न हायस्कूलच्या खोली क्रमांक 9 मध्ये अद्याप मतदानाला सुरुवात झालेली नाही.

पुण्यात आज 9 वर्षांनंतर महापालिका निवडणुकीसाठी मतदानाला सुरूवात झाली असून पुण्यात निवडणुकीच्या रिंगणात एकूण 1153 उमेदवार आहेत.