Maharashtra Political Updates: पडळकर अन् खोत दूध भेसळीवर आक्रमक; मुख्यमंत्री फडणवीस म्हणाले...

गोपीचंद फडणवीस आणि सदाभाऊ खोत यांनी दुधातील भेसळीवर सरकारने तातडीने तोडगा काढावा आणि भेसळविरोधी कायदा कडक करावा अशी मागणी केली होती.यावर मुख्यमंत्री देवेंद्र फडणवीस यांनी दुधाच्या माध्यमातून लोकांना विष पाजण्याचा प्रयत्न होत असेल, तर हे सहन करणार नाही. यासंदर्भात फूड अँड ड्रग्स विभाग,आरोग्य विभागाशी संबंधित बैठक घेऊन धडक कारवाई करणार असल्याचं म्हटलं.

ज्येष्ठ नेते शरद पवार यांनी 'महाराष्ट्राच्या स्वाभिमानाची आणि छत्रपती शिवाजी महाराजांच्या शौर्यगाथेची साक्ष देणारे राज्यातील 11 आणि तामिळनाडूतील ‘जिंजी’ किल्ला अशा एकूण 12 किल्ल्यांचा युनेस्कोच्या जागतिक वारसा यादीत समावेश झाल्यानंतर प्रतिक्रिया देताना प्रत्येक शिवप्रेमीच्या हृदयात अभिमानाचं स्फुल्लिंग पेटवणारी आहे, ही बाब असल्याचं म्हटलं आहे. आता छत्रपतींचा इतिहास केवळ आपल्या पाठ्यपुस्तकांपुरता न राहता, जागतिक अभ्यासाचा विषय होणार आहे, असंही पवार यांनी नमूद केलं आहे.

भाजपचे नवे प्रदेशाध्यक्ष रवींद्र चव्हाण यांनी राज्यातील स्थानिक स्वराज्य संस्थांच्या निवडणुकांसंदर्भात मोठं विधान केलं आहे. त्यांनी महायुती म्हणूनच महापालिका निवडणुका लढवणार असल्याचं जाहीर केलं आहे. महापालिका निवडणुका या कार्यकर्त्यांच्या निवडणुका आहेत. त्या महायुती म्हणूनच लढवल्या जातील.

राज्याचे सामाजिक न्यायमंत्री आणि शिवसेना नेते संजय शिरसाट यांच्या बेडरूममधील एक व्हिडीओप्रकरण खासदार संजय राऊत यांनी समोर आणलं होतं. या व्हिडीओनंतर राजकीय वर्तुळात एकच खळबळ उडाली आहे. यावर शिरसाट यांनी राऊतांना इशारा दिला आहे. ते म्हणाले, मला बदनाम करण्यासाठी हा मोर्फ व्हिडीओ वापरला असून ते माझं चारित्र्यहनन आहे. मी त्यांच्यावर अब्रू नुकसानीचा दावा दाखल करणार आहे. त्यांनी माफी मागितली नाही तर गुन्हाही दाखल करणार आहे.