

बारामती तालुक्यातील सोमेश्वर सहकारी साखर कारखान्याच्या पंचवार्षिक निवडणुकीचे मतदान आज झाले असून 21 संचालक पदांसाठी 83 उमेदवार रिंगणात होते. उद्या (सोमवारी ता. १२) सकाळी बारामती तालुक्यातील माळेगाव येथे मतमोजणी होणार आहे. सकाळी नऊ वाजता मतमोजणीला सुरुवात होणार आहे.
अमरावतीत शिक्षक मतदारसंघाच्या निवडणुकीवरून भाजपमध्ये राजकीय खळबळ उडाली असून बंडखोरी करणाऱ्या चंद्रशेखर भोयर, संगीता शिंदे आणि सुमित पवार यांच्यावर कारवाई करण्यात आली आहे. भाजप जिल्हाध्यक्ष तथा आमदार प्रताप अडसड यांनी तिघांना सहा वर्षांसाठी पक्षातून निष्कासित केले आहे. अधिकृत उमेदवाराच्या विरोधात उमेदवारी कायम ठेवल्याने पक्षाने कारवाईचा निर्णय घेतला.
दिल्लीत शांततेने आंदोलन करणाऱ्या तरुणांवर झालेल्या लाठीमारानंतर लोकसभेतील विरोधी पक्षनेते राहुल गांधी यांनी सोशल मीडियावर (ट्विटर) आपला एक व्हिडिओ पोस्ट केला आहे. ज्यात त्यांनी केंद्र सरकारविरोधात एल्गार पुकारत सोमवारी (ता. १२ ऑक्टोबर) संपूर्ण देशवासियांना 'चलो दिल्ली'ची हाक दिली आहे.
उद्या सर्व देशप्रेमी रस्त्यावर उतरणार असल्याची माहिती माजी मंत्री आदित्य ठाकरे यांनी पत्रकार परिषदेत दिली. त्यासोबतच मुंबईत आम्ही दादागिरी खपवून घेणार नाही असेही यावेळी आदित्य ठाकरे म्हणाले.
निवडणूक आयोगाचे आयुक्त ज्ञानेश कुमारांच्या विरोधात शिवाजी पार्क परिसरात आंदोलकांनी जोरदार घोषणाबाजी केली. त्यामुळे वातावरण चांगलेच तापले आहे. शिवसेना भवनासमोर पोलीस बंदबस्तामुळे छावणीचे स्वरूप आले आहे. पोलिसांच्या कारवाई विरोधात मनसे, ठाकरेंची शिवसेना रस्त्यावर उतरले असून आंदोलकांना सोडण्याच्या मागणीसाठी पोलीस स्टेशनसमोरच ठिय्या आंदोलन केले जात आहे.
शिवसेना भवनासमोर शिवसेना उद्धव बाळासाहेब ठाकरे पक्षाचे नेते आणि पोलिसांमध्ये झटापट झाली आहे. आंदोल न करणारे आदित्य ठाकरे, तेजस ठाकरे, अनिल परब आणि इतर नेते पोलिसांच्या गाडीसमोर उभे राहिले आहेत. शिवसैनिकांना घेऊन जाणारी गाडी त्यांनी अडवली आहे, त्यामुळे शिवसेना भवनासमोर प्रचंड राडा सुरू आहे.
शिवाजी पार्क परिसरात आंदोलन करणाऱ्या सीजेपीच्या कार्यकर्त्यांना आणि नागरिकांना पोलिसांनी पकडून नेले आहे. त्याचवेळी मैदानात आलेले अमित ठाकरे यांनाही पोलिसांनी हटकले, त्यानंतर त्यांनी एवढा पोलिस बंदोबस्त कशासाठी? असा सवाल करत थेट शिवाजी पार्क पोलिस ठाणे गाठले. ज्या नागरिकांना पोलिसांनी पकडून ठेवले, त्यांना तातडीने सोडावे, यासाठी ठाण्यात ठिय्या मांडला आहे.
पोलिसांकडून सुटका होत असताना आम्ही आंदोलन करणार नाही, अशा कोणत्याही बॉन्डवर सही केलेली नाही, असे कॉक्रोच जनता पार्टीचे अभिजीत दीपके, सौरव दास आणि आशुतोष रांका यांनी सोशल मीडियाच्या माध्यमातून स्पष्ट केले आहे. आम्ही पुन्हा रस्त्यावर उतरू, असा इशाराही त्यांनी दिला आहे.
केंद्रीय निवडणूक आयुक्त ज्ञानेशकुमार यांच्या राजीनाम्यासाठी पुणे-मुंबईत आंदोलन करणारे क्रॉकोच जनता पार्टीच्या कार्यकर्त्यांची पुण्यात धरपकड करण्यात येत आहे. आंदोलकांना जबरदस्तीने उचलून नेले जात आहे.
सध्या अतिशय संकटाचा काळ आहे. दुष्काळी परिस्थिती आपलं गोधन विकू नका. राज्य सरकार तुमच्यासोबत आहे. आवश्यकता पडल्यास चारा डेपो सुरू करण्यात येतील. चारा उपलब्ध करून देण्यात येईल, असे आवाहन मुख्यमंत्री देवेंद्र फडणवीस यांनी राज्यातील शेतकऱ्यांना केले आहे.
राज्य सरकारने फी माफीचे परिपत्रक काढले आहे, त्यामुळे शाळांनी फी वसूल करण्याचा खोडसाळपणा करू नये. सरकारकडून संबंधित शाळांना कडक सूचना देण्यात येतील, असे सार्वजनिक बांधकाम मंत्री शिवेंद्रसिंहराजे भोसले यांनी सांगितले.
सीजेपीचे नेते आशुतोष रांका आणि सौरव दास यांनी पत्रकार परिषद घेत आंदोलनावर ठाम असल्याचे स्पष्ट केले. मुख्य निवडणूक आयुक्त ज्ञानेश कुमार यांनी राजीनामा दिल्याशिवाय माघार घेणार नाही, असे त्यांनी स्पष्ट केले आहे.
दिल्लीत रविवारीही कॉक्रोच जनता पार्टीच्या कार्यकर्त्यांनी पोलिसांनी धरपकड केली. काही ठिकाणी कार्यकर्त्यांनी आंदोलनाचा प्रयत्न केला. मुंबईतही शिवाजी पार्क परिसरात सीजेपीच्या आंदोलनाच्या पार्श्वभूमीवर पोलिसांनी बंदोबस्त वाढविला आहे. शनिवारी पोलिसांनी मुंबईत काही जणांना ताब्यात घेतले होते.
समृध्द पंचायतराज अभियान कार्यक्रमाचे नाशिकमध्ये आयोजन करण्यात आले आहे. यावेळी बोलताना मुख्यमंत्री देवेंद्र फडणवीस म्हणाले, पुरस्कारप्राप्त ग्रामपंचायतींना भेटी दिल्या जाणार आहे. त्यांच्या कामांची पाहणी केली आहे.
'आम्ही पहिल्यापासून सांगतोय की, निवडणूक आयोग नरेंद्र मोदींच्या सांगण्यावरून काम करतोय. भाजपला जिंकवण्यासाठी काम करतो आहे. काल विमानात घुसून सौरभला, मला आणि दीपके यांना किडनॅप केले. अभिजीत दीपकेंच्या आजीच्या निधनाविषयी माहिती मिळाली तेव्हा देखील पोलिसांनी सहकार्य केले नाही. ', अशी टीका सीजेपी नेते आशूतोष रांका यांनी केली.
राज्यसभेचा खासदार होणार नाहीत हे कळून चुकल्यामुळेच आता संजय राऊत कुडमुड्या ज्योतिषासारखी भविष्यवाणी करत आहेत, अशी टीका एकनाथ शिंदे शिवसेनेच्या खासदार ज्योती वाघमारे यांनी केली. यापूर्वी राऊत यांनी भविष्यवाणी केली. मात्र सरकार थंपिंग मेजॉरिटी मध्ये आले. हवा असेल तर एक पोपट आणि पिंजरा मी संजय राऊत यांना देते. राज्यसभेची खासदारकी गेल्यावर एखाद्या रस्त्यावर पथारी मांडून त्यांनी बसावं आणि भविष्या सांगावं. मोदी सरकार कोसळणाऱ्या संजय राऊत यांच्या वक्तव्यावर खासदार ज्योती वाघमारे यांची सडकून टीका केली.
अभिजीत दीपके आणि त्यांच्या सहकाऱ्यांची सुटका झाल्यानंतर ते ज्येष्ठ वकील कपिल सिब्बल यांच्या निवास्थानी गेले आहे. कायदेशी प्रक्रियेचा सल्ला घेण्यासाठी ते गेल्याची माहिती आहे. दरम्यान, आज दुपारी दोन वाजता पत्रकार परिषद घेत दीपके आपली पुढील रणनीती सांगणार आहेत.
राज्यातील सर्व ट्रस्ट हे लोकांच्या पैशातून चालतात; आपल्या सर्वांचे पैसे ट्रस्टमध्ये आहेत. दुष्काळी परिस्थितीत संकटात सापडलेल्या शेतकऱ्यांना तुळजाभवानी संस्थानने मदत करणे गरजेचे आहे. तुळजाभवानी संस्थान शेतकऱ्यांना मदत करेल, असा विश्वास सार्वजनिक बांधकाम मंत्री शिवेंद्रराजे भोसले यांनी व्यक्त केला.
रायगडमध्ये प्रारूप मतदार यादीत नाव असूनही तब्बल 3 लाख 82 हजार 831 मतदारांना SIR च्या नोटिसा बजावण्यात आल्या आहेत. पनवेलमध्ये सर्वाधिक दीड लाख मतदारांचा यात समावेश आहे. नोटीसांमध्ये रहिवासाचा पुरावा आणि वयातील तफावत याचा प्रामुख्याने समावेश आहे. मतदार यादीतील पालक आणि पाल्यांच्या वयात तफावत असल्याची उदाहरण देखील समोर येत आहेत. मतदार यादीत मुलाचे वय अधिक, तर आई किंवा वडिलांचे वय कमी असल्याची नोंद असल्याने गोंधळ निर्माण होत आहे. नोटीस मिळालेल्या मतदारांनी आवश्यक पुरावे सादर करावे, असे सुचित करण्यात आले आहे.
सीजेपीचे अध्यक्ष अभिजित दिपके यांना दिल्ली पोलिसांनी काल ताब्यात घेतल्यानंतर आज त्यांची जामिनावर सुटका केली आहे. मात्र अभिजीत दिपके यांच्या आजीचे निधन झाल्यानंतर अंत्यविधीसाठी पोहोचू न देणाऱ्या दिल्ली पोलिसांचा अभिजितच्या आईने निषेध केला आहे. काल अभिजित दिपके यांना सोडले असते, तर आज आजीच्या अंत्यसंस्कारात पोहोचला असता, असे अभिजित यांच्या आईने म्हटले आहे.
केंद्र सरकारकडून शनिवारी राजस्थान केडरचे 'आयएएस' अधिकारी प्रकाश राजपुरोहित यांची निवडणूक उपायुक्तपदी नियुक्ती करण्यात आली. संजयकुमार यांच्या जागी त्यांची नियुक्ती केली आहे. भारतीय दूरसंचार सेवेचे अधिकारी विवेक खरे यांची राष्ट्रीय परीक्षा संस्थेच्या सहसचिवपदी नियुक्ती करण्यात आली आहे. केंद्रीय मंत्रिमंडळाच्या नियुक्तीविषयक समितीने (एसीसी) सहसचिव आणि समकक्ष पदांवर 27अधिकाऱ्यांच्या नियुक्त्यांना मंजुरी दिली आहे.
यवतमाळ जिल्हा मध्यवर्ती सहकारी बँकेची निवडणूक महा विकास आघाडी व महायुतीने चांगली प्रतिष्ठेची केली असून 23 संचालक पदासाठी तब्बल 58 उमेदवार निवडणुकीच्या रिंगणात आहे. जिल्ह्यातील 16 केंद्रावर मतदान प्रक्रिया पार पडत आहे. मतदार राजा कोण्याच्या झोळीत मतांचा जोगवा टाकतो याचा फैसला उद्या होणार आहेत. जिल्हा बँकेत संचालक पदाच्या एकूण 25 जागा आहेत. मात्र दिग्रस तालुका गटात खासदार संजय देशमुख, तर पुसद गटात विजय जाधव हे अविरोध झाले. त्यामुळे निवडणुकीपूर्वीच महायुतीच्या दोन जागांवर विजयी झालाय उर्वरित 23 जागांमध्ये साठी 58 उमेदवार निवडणूकीच्या रिंगणात आहे.
पावसाळा संपल्यांतर सागरी मासेमारी सुरू झाली आहे. मात्र, समुद्रात जाणाऱ्या मच्छिमारांना मुबलक मासे मिळत नसल्याचे दिसून येतेय. सिंधुदुर्ग जिल्ह्यात मासेमारीसाठी जाणाऱ्या बोटींना सध्या बांगडा, सुरमई, पापलेट हे मासे मिळत असले तरी यामध्ये मोठी घट झाली आहे. यंदा 2025-26 मध्ये सिंधुदुर्गचे मत्स्योत्पादन 6 हजार 413 मेट्रिक टनने कमी होऊन 17 हजार 032 मेट्रिक टन झाले आहे. जे 2024-25 मध्ये 23 हजार 445 मेट्रिक टन एवढे होते. या घटलेल्या मस्य उत्पादनामुळे माशांचे दर वाढल्याचे चित्र आहे.
मुख्य निवडणूक आयुक्त ज्ञानेश कुमार यांच्या राजीनाम्याच्या मागणीवरून दिल्लीतील जंतर-मंतरवर सुरू असलेल्या आंदोलनावर जन सुराज पार्टीचे संस्थापक प्रशांत किशोर यांनी मोठे विधान केले आहे. आंदोलन रोखण्यासाठी सरकारला तब्बल ४० हजार निमलष्करी जवान रस्त्यावर तैनात करावे लागले, यावरूनच सरकार आंदोलनाला किती घाबरले आहे आणि आंदोलन किती शक्तिशाली आहे, हे स्पष्ट होते, असा टोला प्रशांत किशोर यांनी लगावला.
दिल्लीतील आंदोलनाच्या पार्श्वभूमीवर पोलिसांनी अनेक ठिकाणी वाहतूक बंद केली आहे. त्याचा फटका सर्वसामान्य दिल्लीकरांना बसत आहे. तर पोलिसांनी विनाकारण प्रवास करणं टाळण्याचं आवागन केलं आहे.
कॉक्रोच जनता पार्टीकडून मुंबईतही आंदोलनाची हाक देण्यात आली असून आज दुपारी चार वाजता शिवाजी पार्कवर CJP कडून आंदोलन केलं जाणार आहे.
कॉक्रोज जनता पार्टीच्या कालच्या जंतरमंतरवरील आंदोलनापूर्वीच CJP संस्थापक अभिजित दिपके यांना पोलिसांनी अटक केली. त्यानंतर आज दुसऱ्या दिवशी देखील CJP आंदोलन करण्यावर ठाम असून आजच्या मोर्चाचं नेतृत्व अजिंक्य शिंदे हे करणार आहेत.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.