शिवसेना उद्धव बाळासाहेब ठाकरे पक्षाचे ठाणे शहरातील विभागप्रमुख प्रदीप पुर्णेकर यांच्यावर अज्ञात हल्लेखोरांनी गोळीबार केल्याची घटना मंगळवारी(ता.29) घडली आहे. ठाण्याच्या मनोरमानगर भागात ही गोळीबाराची घटना घडली आहे. या गोळीबारात गंभीर जखमी झालेल्या शिवसेनेच्या प्रदीप पुर्णेकरांना आर मॉलजवळील इन्फिनीटी हाॅस्पिटलमध्ये उपचारासाठी दाखल करण्यात आले आहे.
माजी सनदी अधिकारी दिलीप खेडकर यांच्या पाथर्डी तालुक्यातील भालगाव येथील निवासस्थानी एसीबीने छापा टाकला. नाशिक आणि अहिल्यानगर एसीबी पथकांनी विविध ठिकाणी एकाचवेळी कारवाई करत खेडकर दाम्पत्याविरुद्ध बेहिशोबी मालमत्तेप्रकरणी गुन्हा दाखल केला आहे. पूजा खेडकरचे वडील असलेल्या दिलीप खेडकर यांच्या घराची झाडाझडती सुरू असून महत्त्वाची कागदपत्रे तपासली जात आहेत.
पुणे महापालिकेतील बहुचर्चित बनावट नोकरभरती घोटाळा चर्चेत आला होता. याच घोटाळ्याप्रकरणी शिवाजीनगर पोलिसांनी मंगळवारी (ता.29) मोठी कारवाई केली आहे. मुख्य सूत्रधार असल्याचा आरोप असलेल्या राजेंद्र खेडेकरला पोलिसांनी अटक केली. महापालिकेत नोकरी लावण्याचे आमिष दाखवून शेकडो युवकांकडून कोट्यवधी रुपये उकळल्याचा आरोप त्याच्यावर आहे. दोन महिन्यांपासून फरार असलेल्या खेडेकरला अटक केल्यानंतर न्यायालयात हजर करण्यात आले. न्यायालयाने त्याला 5 दिवसांची पोलीस कोठडी सुनावली असून पुढील तपास सुरू आहे.
पुणे : पुण्यात गेल्या ४० वर्षांपासून प्रतीक्षेत असलेला उच्च क्षमता द्रुतगती वर्तुळाकार मार्गाच्या (एचसीएमटीआर) दोन टप्प्यांचे काम नोव्हेंबर महिन्यात सुरू होईल, असा दावा प्रशासनाकडून केला जात आहे. मात्र, या मार्गाचा प्रकल्प आराखडा डिसेंबरपर्यंत तयार होणार असताना त्यापूर्वीच काम कसे सुरू होणार असा प्रश्न उपस्थित होत आहे. दरम्यान, या दोन टप्प्यांमध्ये सिंहगड रस्ता आणि विमाननगर या भागात काम सुरू होणार आहे.
मुंबई : छत्रपती शिवाजी महाराज टर्मिनसच्या (सीएसएमटी) पुनर्विकासाच्या कामासाठी प्लॅटफॉर्म क्रमांक १४ आणि १५ तसेच स्टेब्लिंग लाइन १५ वर ७५ दिवसांचा ट्रॅफिक आणि पॉवर ब्लॉक घेण्यात येणार आहे. १ ऑक्टोबर ते १५ डिसेंबर या कालावधीत हा ब्लॉक राहणार आहे. त्यामुळे सीएसएमटीकडे येणाऱ्या आठ मेल-एक्स्प्रेस गाड्यांचा प्रवास दादर किंवा ठाणे स्थानकातच संपविण्यात येणार आहे.
पुणे पदवीधर आणि शिक्षक मतदारसंघाच्या अनुषंगाने महायुतीची दोन दिवसांत बैठक होणार आहे. या बैठकीला मुख्यमंत्री, दोन्ही उपमुख्यमंत्री आणि राष्ट्रवादी काँग्रेसचे प्रदेशाध्यक्ष सुनील तटकरे उपस्थित राहणार आहेत. महायुतीलमधील शिवसेना, भाजप आणि राष्ट्रवादी काँग्रेस या तीनही पक्षांचा या दोन्ही जागांवर दावा आहे. मुख्यमंत्र्यांसमवेत होणाऱ्या बैठकीतून त्यावर तोडगा निघण्याची शक्यता आहे.
कर्तव्यात कसूर केल्याने बीड जिल्हा कारागृहातील दोन कर्मचाऱ्यांचे निलंबन करण्यात आले आहे. संतोष देशमुख यांचे बंधू धनंजय देशमुख यांनी याबाबतची तक्रार केली होती. काही कर्मचाऱ्यांना कारणे दाखवा नोटिस बजावण्यात आली होती. त्यानंतर त्यांच्यावर निलंबनाची कारवाई करण्यात आली आहे.
माझ्या बुलडाणा मतदारसंघात ५० हजार मते बोगस आहेत. एसआयआर मोहिमेमुळे माझ्या विधानसभा मतदारसंघातील ७१ हजार बोगस आणि दुबार नावे वगळण्यात आली आहेत. केंद्रीय मुख्य निवडणूक आयुक्त ज्ञानेश कुमार यांचे काम चांगले आहे आणि त्यांचे समर्थन करणारा मी सत्ताधारी पक्षाचा एकमेव आमदार आहे, असे आमदार संजय गायकवाड यांनी सांगितले.
कॉक्रोच जनता पार्टीचे कार्यकर्ते आणि दादरमधील नागरिकांमध्ये आंदोलन करण्यावरून बाचाबाची झाली. केंद्रीय निवडणूक आयोगाचे मुख्य निवडणूक आयुक्त ज्ञानेश कुमार यांच्या राजीनाम्याची मागणीसाठी CJP ने २ ऑक्टोबर रोजी दादर येथील शिवाजी पार्क मैदानावर आंदोलनाची घोषणा करण्यात आली. या प्रस्तावित आंदोलनामुळे स्थानिक नागरिक आणि वाहतूक व्यवस्थेला त्रास होण्याची शक्यता असल्याने हा वाद सुरू आहे.
राज्यातील दुष्काळग्रस्तांना मदत करण्यासाठी सरकार आता कर्ज काढणार आहे. लाडकी बहीण योजनेमुळे अगोदरच आर्थिक ताण असताना सकारने कर्ज घेण्याची तयारी चालवली आहे. सरकारने वित्त विभागाकडून निधीचा अंदाज घेण्यात आलेला आहे. आता केवळ मदत आणि पुनर्वसन विभागाच्या सर्वेक्षण अहवालाची प्रतीक्षा आहे.
तुळजाभवानी मंदिर देवस्थानच्या वतीने दुष्काळग्रस्तांना करण्यात येणार आहे. मुख्यमंत्री साहाय्यता निधीला मंदिर संस्थान मदत करणार आहे, असे मंदिर संस्थानचे पुजारी किर्ती पुजार यांनी सांगितले. गेल्या वर्षीही अतिवृष्टीग्रस्तांना मदत करण्यासाठी मुख्यमंत्री साहाय्यता निधीला मदत केली होती, असेही पूजार यांनी स्पष्ट केले.
बुलढाणा जिल्ह्यात पावसाअभावी खरिपाची पिकं सुकल्याने शेतकऱ्यांचं मोठं आर्थिक नुकसान झालंय. त्यातच आता जनावरांच्या चाऱ्याचं गंभीर संकट उभं ठाकलं आहे. सोयाबीनसह इतर पिकं करपल्याने आगामी काळात कोरड्या चाऱ्याची टंचाई निर्माण होण्याची भीती आहे. तर पाण्याअभावी हिरवा चाराही उपलब्ध होणं कठीण झालंय. एकीकडे हातातून गेलेली पिकं आणि दुसरीकडे जनावरांच्या चाऱ्याचा प्रश्न, अशा दुहेरी संकटात शेतकरी सापडला आहे. सरकारने तातडीने चारा उपलब्ध करून द्यावा आणि जनावरांसाठी चारा छावण्या सुरू कराव्यात, अशी मागणी शेतकऱ्यांकडून होत आहे.
चाकणसाठी १,४०० कोटींच्या आराखड्यात नाले मोकळे करणे, ३८ किलोमीटर पावसाळी गटार, ७५ किलोमीटर रस्त्यांची सुधारणा, पादचारी मार्ग आणि सहा चौकांची पुनर्रचना प्रस्तावित आहे. वाहतूक कोंडी कमी करण्यासाठी ५०० अतिरिक्त बस आणि एआय आधारित वाहतूक नियंत्रण यंत्रणा उभारण्यात येणार आहे. पार्किंग, पाणीपुरवठा, वीज आणि कचरा व्यवस्थापनावरही भर देण्यात आला आहे.
सांगली जिल्ह्यातील सर्व तालुके दुष्काळग्रस्त जाहीर करावेत,अशी मागणी काँग्रेस आमदार विश्वजीत कदम यांनी केली आहे. सांगली जिल्ह्यात पावसाची परिस्थिती पाहता येणाऱ्या काळात शेतकऱ्यांवरील संकट आणखी वाढणार आहे. त्यामुळे शेतकऱ्यांचं नुकसान होऊ नये, यासाठी राज्य सरकारने जिल्ह्यातील सर्व तालुके दुष्काळ म्हणून जाहीर करावेत,अशी मागणी केली आहे.
सांगली जिल्हा मध्यवर्ती बँकेची निवडणूक सगळ्यांनी एकत्र येऊन लढली पाहिजे, पण कोणी महायुती म्हणून जर निवडणूक लढणार असेल, तर आम्ही देखील महाविकास आघाडी म्हणून ताकदीने निवडणूक लढवू, अशी भूमिका काँग्रेसचे आमदार विश्वजीत कदम यांनी जाहीर केली आहे. सांगली जिल्हा मध्यवर्ती बँकेसाठी आमदार विश्वजीत कदम यांनी आपला उमेदवारी अर्ज दाखल केला आहे. जोरदार शक्ती प्रदर्शन करत कदम यांनी सांगली जिल्हा मध्यवर्ती कार्यालयात येऊन आपली उमेदवारी दाखल केली. सांगली जिल्हा मध्यवर्ती बँकेच्या 21 संचालक पदांसाठी निवडणूक पार पडत असून सर्वच पक्षांकडून ताकतीने आपली उमेदवारी अर्ज दाखल करण्यात येत आहे.
मराठा आंदोलक मनोज जरांगे पाटील यांना आज रुग्णालयातून डिस्चार्ज देण्यात आला आहे. मनोज जरांगे पाटील यांनी पाटोदा येथील उपोषण स्थगित केल्यानंतर १७ सप्टेंबर रोजी छत्रपती संभाजीनगर येथे उपचारासाठी त्यांना दाखल करण्यात आले होते.
सिंधुदुर्गमधील जमीन परप्रांतीय लोकांना विकल्या संदर्भातील ठाकरेंच्या शिवसेनेचे खासदार संजय राऊत यांनी आरोप केल्यानंतर आता वाद सुरू झाला आहे. यावरून आता आमदार भास्कर जाधव थेट मुख्यमंत्री देवेंद्र फडणवीस यांच्याकडेच मागणी केली आहे. त्यांनी, जमीन देण्यासाठी दलाली करणारा तो मंत्री कोण? हे फडणवीस यांनी स्वतः समोर येऊन महाराष्ट्राला सांगावे, असे म्हटलं आहे.
राज्य भरती सुधारणा उच्चस्तरीय समितीच्या अध्यक्ष अतिरिक्त मुख्य सचिव व्ही. राधा यांनी आज माध्यमांशी संवाद साधताना महाराष्ट्र लोकसेवा आयोगाच्या परीक्षांविषयी मोठं विधान केले आहे. विद्यार्थ्यांकडून आयोगाच्या परीक्षा वस्तुनिष्ठ स्वरुपात घेण्याची मागणी होत आहे. यापार्श्वभूमीवर बोलताना त्यांनी विविध विभागांमध्ये संवाद साधताना विद्यार्त्यांची मते वेगवेगळी असल्याचे सांगितले. काही विभागांमध्ये ७० टक्के जणांनी डिस्क्रिप्टिव्ह परीक्षा असावी, असे म्हटले आहे. हे प्रमाण प्रत्येक विभागात वेगळे असल्याचेही त्या म्हणाल्या.
काँग्रेसच्या राष्ट्रीय कार्यकारिणीची बैठक आज पार पडली. या बैठकीत मतदार यादीतील प्रत्येक मोठ्या बदलाचा संपूर्ण डेटा सार्वजनिक करण्यात यावा, ज्या मतदारांची नावे वगळण्यात आली आहेत, त्यांना त्याची संपूर्ण माहिती आणि अपील करण्याची संधी देण्यात यावी, राजकीय पक्षांना मतदार यादी आणि त्यासंबंधित आवश्यक डेटा साध्या स्वरूपात वेळेत उपलब्ध करून देण्यात यावा, ज्या ठिकाणी गंभीर विसंगतींचे पुरावे समोर येतील, तेथे स्वतंत्र आणि वेळबद्ध चौकशी करण्यात यावी आणि निवडणूक प्रक्रियेशी संबंधित महत्त्वाचा डेटा आणि निर्णयांमध्ये अशी पारदर्शकता असावी, अशा मागण्या निवडणूक आयोगाकडे करण्यात आल्या आहेत.
निवडणूक आयोगाविरोधातील मोर्च्यात सामील व्हावं, असं आम्ही सर्व राजकीय पक्षांना, अगदी सत्ताधारी राजकीय पक्षांना पण आमंत्रण देणार आहोत. हा लढा फक्त राजकीय पक्षांचा नाही तर जनतेचा देखील आहे. त्यामुळे जनतेने देखील या मोर्च्यात मोठ्या संख्येने जरूर सामिल व्हावं, असे आवाहन मनसे अध्यक्ष राज ठाकरेंनी केले आहे.
संभाजीनगरहून जळगावकडे जाणाऱ्या एसटी बसचा सिल्लोड तालुक्यात भीषण अपघात झाल्याचे वृत्त आहे. सुदैवाने अपघातात कोणतीही जीवितहानी झालेली नाही.
अनुसूचित जातीअंतर्गत उपवर्गीकरणाच्या समर्थनार्थ मातंग समाजाकडून आज मुंबईत मोर्चाचे आयोजन करण्यात आले आहे. सीएसएमटी परिसरात रास्ता रोकोचा प्रयत्न आंदोलकांकडून केला जात आहे. शासन निर्णय निघेपर्यंत मागे हटणार नाही, अशी भूमिका मातंग समाजातील बांधवांनी घेतली आहे.
केंद्रीय निवडणूक आयोगाविरोधात उद्धव ठाकरे आणि राज ठाकरे मैदानात उतरले आहेत. या दोघांनी मंगळवारी एकत्रित पत्रकार परिषद घेत ४ ऑक्टोबर रोजी एकत्रित मोर्चा काढणार असल्याची घोषणा केली. निवडणूक आयोग हा एकमेव मोर्चाचा अजेंडा असेल. प्रत्येकाचा हातात तिरंगा असेल. हा लोकशाही आणि संविधान वाचविण्याचा मुद्दा असल्याचे राज ठाकरेंनी स्पष्ट केले.
राष्ट्रवादीचे अध्यक्ष शरद पवार यांच्या, आम्ही कोणासोबतही जाणार नाही. कोणाला आमच्यासोबत यायचे असेल, तर ते आमच्यासोबत येऊ शकतात, या वक्तव्यावर शिवसेना उद्धव बाळासाहेब ठाकरे पक्षाचे खासदार संजय राऊत म्हणाले, शरद पवार यांनी जे म्हटले आहे, ते योग्यच आहे. मी देखील यापूर्वी म्हटले होते की, पवार कुठेही जाणार नाहीत. ते इंडिया आघाडी आणि महाविकास आघाडीचे आधारस्तंभ आणि प्रमुख नेते आहेत आणि ते आमच्यासोबतच राहतील. त्यांच्या कुटुंबाशी संबंधित किंवा सहकार क्षेत्रातील बाबी हा त्यांचा वैयक्तिक विषय आहे. मात्र, त्यांची राजकीय भूमिका कायमच भाजप आणि राष्ट्रीय स्वयंसेवक संघाच्या विरोधात, तसेच महाविकास आघाडी आणि इंडिया आघाडीच्या समर्थनाची राहिली आहे, असेही राऊत यांनी म्हटले.
नंदीग्राम पोटनिवडणुकीतील भाजपच्या उमेदवार हसी राणी रथ यांच्याविरोधात काँग्रेसने दाखल केलेली याचिका कलकत्ता उच्च न्यायालयाचे न्यायमूर्ती कृष्णा राव यांनी फेटाळून लावली. या प्रकरणातील सविस्तर आदेशाची प्रतीक्षा आहे.
सर्वोच्च न्यायालयाने मुख्य निवडणूक आयुक्त (CEC) ज्ञानेश कुमार यांचे निलंबन मागणाऱ्या याचिकेची लवकर सुनावणी घेण्यास परवानगी दिली आहे. तसेच, भारताच्या निवडणूक आयोगाकडे निहित असलेले निर्णय आयोगाच्या अध्यक्षांकडून एकतर्फी घेता येणार नाहीत, अशी घोषणा करण्याची मागणीही या याचिकेत करण्यात आली आहे. ज्येष्ठ वकील विकास सिंह यांनी मुख्य न्यायमूर्ती सूर्यकांत यांच्या खंडपीठासमोर या प्रकरणाचा उल्लेख केला. जर आयोगाने एकमताने निर्णय घेतलेला नसेल, तर हा गंभीर मुद्दा आहे, असे विकास सिंह यांनी म्हटले आहे.
महाराष्ट्र बॅडमिंटन असोसिएशनच्या 2020-23च्या कार्यकाळासाठी भाजपचे युवा नेते परेश ठाकूर यांची उपाध्यक्षपदी बिनविरोध निवड करण्यात आली आहे. नागपूर येथे झालेल्या 84व्या चतुरवार्षिक वार्षिक सर्वसाधारण सभेनंतर नवीन कार्यकारिणी गठित करण्यात आली. महत्त्वाची जबाबदारी मिळाल्याबद्दल परेश ठाकूर यांनी समाधान व्यक्त केले.
अमरावतीच्या हिंदू स्मशानभूमी परिसरात तलवार घेऊन नागरिकांमध्ये दहशत निर्माण करणाऱ्या आरोपीला राजापेठ पोलिसांनी अटक केली आहे. 28 सप्टेंबर रोजी पोलिसांना मिळालेल्या गुप्त माहितीनंतर ही कारवाई करण्यात आली. सचिन साहेबराव लोखंडे या 29 वर्षीय आरोपीला ताब्यात घेत त्याच्याकडून सुमारे दोन हजार रुपये किमतीची धारदार लोखंडी तलवार जप्त करण्यात आली. याप्रकरणी आरोपीविरुद्ध गुन्हा दाखल करण्यात आला आहे.
जळगाव जिल्ह्याचे पालकमंत्री गुलाबराव पाटील यांनी मुक्ताईनगरसह बोदवड तालुक्यात केलेल्या दुष्काळ पाहणी दौऱ्याला आता राजकीय वळण मिळाले आहे. राष्ट्रवादी काँग्रेस पार्टी शरदचंद्र पवार पक्षाच्या महिला प्रदेशाध्यक्षा रोहिणी खडसे यांनी 'एक आरोपी तुमच्यासोबत फिरताना दिसत आहे, जरा लक्ष द्या,' असे सांगून 'हितचिंतक म्हणून केलेल्या सूचनेने मन दुखावले तर आश्चर्य वाटते,' अशी भूमिका 'एक्स'वरील पोस्टद्वारे आता मांडली आहे. विशेष म्हणजे कथित आरोपी शिंदे गटाचा पदाधिकारी असल्याचा नवीन आरोप त्यांनी केल्याने मोठी खळबळ उडाली आहे.
सरकारने कोरडा दुष्काळ जाहीर केला आहे. परंतु हा कोरडा दुष्काळ सरकारने कागदोपत्री जाहीर केला असून शेतकऱ्यांना अजून कुठलीही मदत मिळाली नाही. त्यामुळे सरकारच्या विरोधात शिवसेना ठाकरे सेना पक्ष आक्रमक झाला आहे. नांदेडच्या देगलूर तहसील कार्यालयासमोर सरकारने काढलेल्या जीआरची होळी करून शिवसेना ठाकरे सेना पक्षाने आंदोलन केले.
दुष्काळ जाहीर करताना लावलेले सगळे निकष हे सदोष आहेत. कुठले ब्रिटीश कालीन कायदे आहेत. कुठला ट्रिगर, हे सगळे दोष असणारी यंत्रणा आहे, अशी टीका संजय पाटील यांनी केली. शेतकऱ्यांचे अश्रू बघा, त्यांचा आक्रोश बघा, तोच निकष लावून जिल्ह्यातील सर्व तालुक्यात दुष्काळ जाहीर करा, अशीही मागणी त्यांनी केली. सरकारने ऐकले नाही, तर आंदोलनाची तीव्रता वाढवण्यात येईल, अशाही इशारा त्यांनी दिला.
SIR कार्यक्रम राबवण्यापूर्वी त्यावेळी एकटा सत्ताधारी पक्षाचा मी म्हणणारा होतो की, माझ्या विधानसभा मतदारसंघात 50 हजार बोगस मतदार आहेत. बरेच नावं डबल आणि बोगस आहेत. त्यामुळे मला त्याचा फटका बसलाय. निवडणूक विभागाने SIR कार्यक्रम राबवण्याची आधी माझ्या मतदारसंघात 3 लाख 23 हजार मतदारांपैकी 23 हजार मतदार बोगस निघाले. SIR मुळे माझ्या एकट्या मतदारसंघातील 71 हजार मतं कमी झालेत. हे सगळे मतदार काँग्रेसच्या काळातील होते. निवडणूक आयुक्त ज्ञानेश कुमार यांचं काम बरोबर आहे, असं वक्तव्य शिवसेनेचे बुलढाण्याचे आमदार संजय गायकवाड यांनी केलं आहे.
बीड जिल्ह्यात दुष्काळाची परिस्थिती गंभीर असताना अधिकारी मुख्यालयावर उपलब्ध असणं गरजेचं असल्याने बीडचे जिल्हाधिकारी विवेक जॉन्सन यांनी अधिकाऱ्यांना परवानगीशिवाय रजा घेता येणार नाही, तसंच परवानगीशिवाय मुख्यालयही सोडता येणार नाही, असे आदेश काढले आहेत.
बारामती तालुक्यातील शेरेवाडीत मध्यरात्री दोन महिलांची गळा चिरून निर्घृण हत्या केल्याची घटना समोर आली आहे. कृष्णाबाई लडकत आणि इंदुमती लडकत अशी मृत महिलांची नावे आहेत. या दुहेरी हत्येमुळे परिसरात खळबळ उडाली आहे.
आज सकाळी 11.30 वाजता शिवतीर्थ येथे ठाकरे बंधूंची संयुक्त पत्रकार परिषद होणार आहे.
मनसेप्रमुख राज ठाकरे यांच्या उपस्थितीत मनसेचे आज महत्त्वाची बैठक पार पडणार आहे. तर दुसरीकडे आज दोन्ही ठाकरे बंधू संयुक्त पत्रकार परिषद देखील घेणार आहेत.
डॉक्टरांना मारहाण करणारा शिंदेंचा शिवसेनेचा नगरसेवक रमेश म्हात्रेला सुप्रीम कोर्टाने दणका दिल्यानंतर कोणत्याही क्षणी रमेश म्हात्रे पोलिसांना शरण जाणार आहे. सुप्रीम कोर्टाचा आदेश आम्ही नाकारू शकत नाही त्यानुसार आज किंवा उद्या पोलीस ठाण्यात हजर राहणार असल्याची माहिती म्हात्रेच्या वकिलाने दिली आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.