शिवसेना ठाकरे गटाचे उपनेते शरद कोळी यांच्यावर सोलापूर ग्रामीण पोलिसांची मोठी कारवाई
MPDA कायद्यानुसार शरद कोळी यांच्यावर सोलापूर ग्रामीण पोलिसांनी केली स्थानबद्धतेची कारवाई
आठवडाभरापूर्वीच शरद कोळी यांच्यावर MPDA कायद्यानुसार कारवाईचे आदेश जाहीर करण्यात आले होते
कारवाईचे आदेश जाहीर झाल्यापासून शरद कोळी फरार होते. मात्र काही वेळापूर्वी सोलापूर ग्रामीण पोलिसांच्या स्थानिक गुन्हे शाखेने कोळी यांना सांगलीतून ताब्यात घेतलंय
बीड जिल्ह्यातील अकराही तालुके दुष्काळाच्या छायेत आहेत. पावसाने पाठ फिरवल्याने शेतकऱ्यांच्या डोळ्यांसमोर उभं पीक करपलं आणि हातातोंडाशी आलेला घास हिरावला गेला. अशा संकटाच्या काळात मंत्री पंकजा मुंडे थेट बीडच्या काकडहिरा येथील शेतकऱ्यांच्या बांधावर पोहोचल्या. त्यांनी पिकांची पाहणी करत शेतकऱ्यांशी संवाद साधला आणि संकटात सरकार त्यांच्या पाठीशी असल्याचा विश्वास दिला. इतिहासात पहिल्यांदाच केंद्र आणि राज्याचे सर्व निकष बाजूला ठेवून आमच्या सरकारने दुष्काळ जाहीर केला आहे. तसेच शेतकऱ्यांबाबत सरकार संवेदनशील असून तोंडावर आलेली दिवाळीही सरकार गोड करणार असल्याचा शब्द त्यांनी दिला आहे.
देशभर एकीकडे SIR वरून संतार व्यक्त करत आंदोलन केले जात असतानाच सुप्रीम कोर्टाच्या न्यायमूर्तींनी यावर मोठं भाष्य कें आहे. कोट्यवधी नागरिकांना मतदानाच्या हक्कापासून वंचित ठेवणे हे संविधानाच्या आत्म्यावर आघात करण्यासारखे असल्याचे मत न्यायमूर्ती उज्ज्वल भुयान यांनी व्यक्त केलं आहे.
काही लोकांना असं वाटत असेल की आता शरद पवार साहेबांची सत्ता नाही. पण मी सगळ्यांना सांगू इच्छितो की साहेब एवढे मोठे महान नेते आहेत की त्यांची सत्ता असो किंवा नसो सगळ्यांची कामं होतात, असे युगेंद्र पवार यांनी म्हटले आहे. ते सोमेश्वर सहकारी साखर कारखान्याच्या निवडणुकीत राष्ट्रवादी काँग्रेस पक्ष शरद पवार गटाच्या पॅनलच्या प्रचाराचा शुभारंभ करताना बोलत होते.
पुणे शिक्षक मतदारसंघावर शिवसेनेचा आजही दावा कायम आहे. शिवसेनेचे उमेदवार मंगेश चिवटे हेच असतील. ते शिवसेनेचे उमेदवार म्हणून अर्ज भरतील. भारतीय जनता पक्षाचाही उमेदवारी अर्ज भरला जाईल. मुख्यमंत्री देवेंद्र फडणवीस आणि उपमुख्यमंत्री एकनाथ शिंदे हे त्यावर निर्णय घेतील, असे उद्योगमंत्री उदय सामंत यांनी सांगितले.
डॉक्टर मारहाण प्रकरणातील शिवसेनेचे नगरसेवक रमेश म्हात्रे याच्यासह चौघांचा जामीन सर्वोच्च न्यायालयाने रद्द केला होता. त्यानंतर आज रमेश म्हात्रे आणि इतर तिघांना न्यायालयात उभे करण्यात आले. त्यांना न्यायालयीन कोठडी सुनावण्यात आली आहे. त्यानंतर या चौघांची रवानगी आधारवाडी कारागृहात करण्यात आली आहे.
अजित पवार हे राष्ट्रीय पुरुष, ते आमच्या मनात आणि कणाकणांत आहेत, ते कसे दूर करणार. अजितदादा राष्ट्रीय पुरुष असल्यामुळे त्यांचे नाव आणि फोटो वापरण्याचा अधिकार सर्वांना आहे, असे आव्हान सोमेश्वर सहकारी साखर कारखान्याचे माजी अध्यक्ष पुरुषोत्तम जगताप यांनी उपमुख्यमंत्री सुनेत्रा पवार यांना दिले आहे.
राज्य लोकसेवा आयोग अध्यक्ष, सदस्यांसह बरखास्त करण्यात यावा, अशी मागणी सत्ताधारी शिवसेनेचे आमदार संजय गायकवाड यांनी केली आहे. एमपीएससीचे सदस्य २०१८ पासून सदस्य आहेत. या काळात ज्या परीक्षा झाल्या, त्याचे परीक्षा केंद्र आयोगाच्या सदस्यांच्या मर्जीतील देण्यात आले आहेत. मर्जीतील लोकांनाच पेपर तपासायला दिले जायचे. काही विद्यार्थ्यांकडून मोठी रक्कम घेऊन पास केले जायचे. या सदस्यांकडे आज काही हजारो कोटी रुपयांची संपत्ती आहे. त्यांच्याकडून ही रक्कम कोठून आली. त्यामुळे विद्यार्थ्यांचे आंदोलन योग्य वाटते, असे आमदार गायकवाड यांनी सांगितले.
ऑल इंडिया स्टुडंट्स असोसिएशनच्या कार्यकर्त्या नेहा बोरा यांना दिल्ली पोलिसांनी ताब्यात घेतले आहे. त्या इंडिया गेट परिसरात आंदोलनात सहभागी झाल्या होत्या. पोलिसांनी खासगी गाडीतून त्यांना अज्ञातस्थळी नेल्याचा आरोप होत आहे.
शिवसेना आमदार संजय गायकवाड यांनी महाराष्ट्र लोकसेवा आयोगाच्या सदस्यांवर गंभीर आरोप केले आहे. सरकारने आयोगाच्या सदस्यांना पाठिशी घालू नये, त्यांनीच पेपर फोडले आहेत. सदस्यांकडे कोट्यवधींची संपत्ती आहे, असा गंभीर आरोप गायकवाड यांनी केला आहे. तसेच आयोग बरखास्त करण्याची मागणीही त्यांनी केली आहे.
मनसे अध्यक्ष राज ठाकरे आज पुण्यात एमपीएससी आंदोलनस्थळी भेट देण्याची शक्यता आहे. त्यांच्यासोब काँग्रेस व राष्ट्रवादी काँग्रेस शरदचंद्र पवार पक्षाचे नेतेही उपस्थित राहण्याची शक्यता आहे. पुण्यातील एसएम जोशी पुलावर विद्यार्थ्यांचे आंदोलन सुरू आहे.
भाजपने राज्यसभा निवडणुकीसाठी उमेदवारांच्या नावांची घोषणा केली आहे. पक्षाने पश्चिम बंगालमधून रुक्मिणी मल्लिक, तर उत्तराखंडमधून दिनेश आर्य यांना उमेदवारी दिली आहे. भाजपच्या केंद्रीय निवडणूक समितीने दोन्ही उमेदवारांच्या नावांवर शिक्कामोर्तब केले आहे. राज्यसभेच्या 12 जागांसाठी 16 ऑक्टोबर रोजी निवडणूक पार पडणार आहे. यामध्ये उत्तर प्रदेशातील 10, उत्तराखंडमधील 1 आणि पश्चिम बंगालमधील 1 जागेच्या पोटनिवडणुकीचा समावेश आहे.
नवी दिल्ली : काँग्रेसचे ज्येष्ठ नेते पृथ्वीराज चव्हाण यांनी मुख्य निवडणूक आयुक्त ज्ञानेश कुमार यांच्या कार्यपद्धतीवर गंभीर आक्षेप घेत त्यांच्यावर कडक कारवाई करण्याची मागणी केली आहे. पृथ्वीराज चव्हाण म्हणाले, “मुख्य निवडणूक आयुक्त म्हणून ज्ञानेश कुमार गुप्ता यांनी आपल्या कार्यकाळात जे काही केले आहे, ते पूर्णपणे अस्वीकार्य आहे. त्यांनी केलेली कृती पूर्णपणे बेकायदेशीर होती. त्यांनी सर्वोच्च न्यायालयाने घालून दिलेल्या नियमांचे आणि संसदेने केलेल्या कायद्याचे उल्लंघन केले आहे.”
पुणे शिक्षक मतदार संघाच्या निवडणुकीत महायुतीतच मोठी फूट पडल्याचं समोर आलं आहे. आमचा पाठिंबा शिवसेनेला आहे, मंगेश चिवटे यांना नाही, असं मोठं विधान सांगोल्याचे माजी आमदार शहाजीबापू पाटील यांनी केले. पुणे विभाग शिक्षक मतदारसंघाची निवडणूक चांगलीच तापली आहे. या निवडणुकीत उमेदवारी अर्ज दाखल करणार असल्याची घोषणा मंगेश चिवटे यांनी केली. मात्र यावरूनच आता शिवसेनेतच नाराजीचा सूर उमटला आहे. सांगोल्याचे माजी आमदार आणि एकनाथ शिंदे शिवसेनेचे नेते शहाजीबापू पाटील यांनी एक मोठे विधान करत खळबळ उडवून दिली आहे.
ओबीसी जनगणनेत स्वतंत्र कॉलम आणि ड्रॉप-डाऊन मेन्यूची सुविधा लागू करण्याच्या मागणीसाठी जिल्हाधिकारी कार्यालयासमोर निदर्शने करण्यात आली. ओबीसी समाजाची स्वतंत्र नोंद जनगणनेत व्हावी, या मागणीसाठी निवेदन सादर करण्यात आले. मागण्या मान्य न झाल्यास 25 ऑक्टोबरपासून देशव्यापी तीव्र आंदोलन छेडण्यासह जनगणनेवर बहिष्कार टाकण्याचा इशाराही यावेळी देण्यात आला.
सोमेश्वर सहकारी साखर कारखान्याच्या निवडणुकीत दिवंगत अजित पवार यांचा फोटो आणि नावाच्या वापरावरून सुरू झालेल्या वादात आता एक नवा राजकीय ट्विस्ट आला आहे. निवडणूक निर्णय अधिकाऱ्यांनी अजितदादांचा फोटो आणि नाव वापरण्यावर घातलेल्या बंदीच्या विरोधात पॅनेल प्रमुख पुरुषोत्तम जगताप यांनी आक्रमक भूमिका घेतली आहे. त्यांनी थेट निवडणूक अधिकाऱ्यांना पत्र लिहून या निर्णयाला आव्हान दिले असून, या निर्णयाचा पुनर्विचार करण्याची जोरदार मागणी केली आहे. जगताप यांनी शिवसेनेतील राजकीय वादाचे उदाहरण दिले. एकनाथ शिंदे यांच्या पोस्टरवर वंदनीय बाळासाहेब ठाकरे यांचा फोटो वापरण्यावर उद्धव ठाकरे यांनी घेतलेला आक्षेप टिकू शकला नव्हता. कारण महापुरुष किंवा थोर व्यक्ती ही कोणत्याही एका विशिष्ट पक्षाची वा व्यक्तीची खासगी मालमत्ता नसतात; तोच नियम इथेही लागू होतो, असा रोखठोक युक्तिवाद जगताप यांनी मांडला आहे.
ठाकरे बंधूंच्या आजच्या मुंबईतील गर्जना मोर्चात, काँग्रेस नेते सहभागी होणार की नाही, याकडे लक्ष असतानाच काँग्रेस विधिमंडळ नेते विजय वडेट्टीवार हे आजच्या गर्जना मोर्च्यात सहभागी होणार असल्याची माहिती समोर आली आहे. निवडणूक आयुक्त ज्ञानेश कुमार यांच्या विरोधातील आंदोलनात आपण सहभागी होणार असल्याचे विजय वडेट्टीवार यांनी म्हटले आहे.
संत तुकाराम महाराजांच्या पालखीचा मार्ग हा वारकऱ्यांच्या श्रद्धेचा आणि लाखो भाविकांच्या आस्थेचा हा रस्ता! मात्र याच देहू पंढरपूर पालखी मार्गाची सध्या अक्षरशः खड्ड्यांनी चाळण झाली असून, झेंडे मळा ते देहू फाटा या मार्गावर जागोजागी मोठमोठे खड्डे पडले आहेत. विशेष म्हणजे, काही महिन्यांपूर्वी खड्डे बुजवण्यासाठी लाखो रुपये खर्च करूनही रस्त्याची अवस्था पुन्हा जैसे थे झाल्याचा आरोप ग्रामस्थांनी केला. प्रशासनाचे लक्ष वेधण्यासाठी चिंचोलीतील नागरिकांनी चक्क या खड्ड्यांची पूजा केली. खड्ड्यांना फुलांचे हार घातले आणि अनोख्या पद्धतीने प्रशासनाचा निषेध नोंदवला.
निवडणूक आयोगाच्या गलथान कारभाराविरुद्ध आज ठाकरे बंधू आक्रमक होत मुंबईत गर्जना मोर्चा करत आहेत. मोर्चात सहभागी होण्यासाठी राज्यभरातून महाराष्ट्र नवनिर्माण सेना पक्ष आणि शिवसेना उद्धव बाळासाहेब ठाकरे सेना पक्षाचे कार्यकर्ते, पदाधिकारी सहभागी होत आहे. पालघर, बोईसर, डहाणू, वसई, विरार येथील शेकडो मनसे अन् शिवसेना कार्यकर्ते चर्चगेट रेल्वे स्थानकावर दाखल झाले असून मोर्चाच्या ठिकाणी रवाना झाले आहेत. 'राजीनामा द्या, राजीनामा द्या, ज्ञानेश कुमार राजीनामा द्या', अशा घोषणांनी कार्यकर्त्यांनी मुंबईतील रस्ते दणाणून सोडले आहेत.
निवडणूक आयोगाने SIR च्या माध्यमातून ज्या गडबडी केल्या आहेत, त्याची वस्तुस्थिती आता जनतेसमोर आलेली आहे. ज्ञानेश कुमार, नरेंद्र मोदी आणि भाजपची जी अभद्र युती होती, ती लोकशाहीची रोज हत्या करीत होती. त्याच्या विरोधात जे जे लोक मैदानात उतरतात, त्या सगळ्यांच्या सोबत प्रत्यक्ष- अप्रत्यक्ष काँग्रेस पक्ष आहे, असं वक्तव्य काँग्रेस नेते नाना पटोले यांनी केलं आहे.
इस्रायलचे पंतप्रधान बिन्यामिन नेतान्याहू यांनी कॅप्टन स्मित मच्छार यांना इस्रायलच्या आगामी स्वातंत्र्यदिनाच्या समारंभात सहभागी होण्यासाठी अधिकृतपणे आमंत्रित केलं आहे. शिवाय पंतप्रधान नरेंद्र मोदी यांना देखील त्यांनी आमंत्रित केलं आहे. बिन्यामिन नेतान्याहू यांनी इस्रायलच्या स्वातंत्र्यदिन सोहळ्यादरम्यान कॅप्टन मच्छार आणि नरेंद्र मोदी यांना संयुक्तपणे उत्सव ज्योत प्रज्वलित करण्यासाठी आमंत्रित केलं आहे.
महसूलमंत्री चंद्रशेखर बावनकुळे आज जळगाव जिल्हा दौऱ्यावर आहेत. सकाळी दहा वाजल्यापासून जिल्हाधिकारी कार्यालयात बैठक घेणार आहेत. त्यानंतर एरंडोल तालुक्यातील दुष्काळ भागाचे पाहणीसाठी निघणार आहे.
कॉक्रोच जनता पार्टीला आंदोलन करण्याचा अधिकार आहे; मात्र या पक्षाची स्थापना अमेरिकेत झाली असल्याने अभिजीत दिपके यांनी अमेरिकेतच आंदोलन करावे, असा टोला रिपब्लिकन पार्टी ऑफ इंडियाचे अध्यक्ष तथा केंद्रीय सामाजिक न्याय राज्यमंत्री रामदास आठवले यांनी दिपके यांना लगावला आहे.
पुण्यात मागील काही दिवसांपासून एमपीएससी करणाऱ्या विद्यार्थ्यांनी आंदोलन सुरू केलं आहे. महाराष्ट्र लोकसेवा आयोगाच्या परीक्षांमधील गोंधळ आणि पेपरफुटी प्रकरणावरून विद्यार्थ्यांनी MPSC आयोगाच्या अध्यक्षांनी राजीनामा द्यावी ही प्रमुख मागणी या विद्यार्थी आंदोलकांची आहे. या आंदोलनाला आता लोकसभेतील विरोधी पक्षनेते राहुल गांधी यांनी देखील या आंदोलनावर भाष्य केलं आहे. राहुल गांधी यांनी एक्सवर एक पोस्ट करत आंदोलक विद्यार्थ्यांच्या मागण्या योग्य असल्याचं म्हटलं आहे. शिवाय विद्यार्थ्यांचे भविष्य ठरवणाऱ्या संस्थेवरच कब्जा केला गेला असून आम्ही हे असं चालू देणार नाही, असा इशारा देखील गांधी यांनी आपल्या पोस्टमधून सरकारला दिला आहे.
मनसेप्रमुख राज ठाकरे उद्या सोमवार सकाळी ते पुण्यात आंदोलन करणाऱ्या एमपीएससीच्या विद्यार्थ्यांची भेट घेणार असल्याची माहिती समोर आली आहे.
मुख्य निवडणूक आयुक्त ज्ञानेश कुमार यांच्या कारभाराविरोधात आज ठाकरे बंधुंकडून मुंबईत गर्जना मोर्चाचं आयोजन करण्यात आलं आहे. गर्जना लोकशाही आणि संविधान वाचवण्यासाठी असं या मोर्चाला नाव देण्यात आलं आहे. सकाळी १० वाजता मोर्चाला सुरुवात होणार असून मेट्रो सिनेमा ते मुंबई महापालिका मुख्यालयापर्यंत हा मोर्चा असणार आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.