कुख्यात गुंड बापू उर्फ कुमार प्रभाकर नायर हा पुणे महानगरपालिकेसाठी प्रभाग क्रमांक 39 मधून राष्ट्रवादी काँग्रेस पक्षाच्या तिकीटावर उमेदवारी अर्ज दाखल केला आहे. नायर हा दिपक मारटकर हत्या प्रकरणात सध्या जामिनावर बाहेर आहे. अजित पवार यांच्या राष्ट्रवादीकडून गुन्हेगारी पार्श्वभूमीच्या गजा मारणेच्या पत्नीसह आयुष कोमकर हत्याप्रकरणातील सोनाली आंदेकर आणि लक्ष्मी आंदेकर यांनाही उमेदवारी देण्यात आली आहे.
भाजपचे शहराध्यक्ष सुनील केदार यांच्या गाडीचा इच्छुक उमेदवारांकडून पाठलाग करण्यात आल्याची मोठी खळबळजनक घटना घडली आहे. नाशिकमध्ये एबी फॉर्म घेऊन जाणाऱ्या वाहनामागे इच्छुक उमेदवार धाव घेत असल्याचा प्रकार नाशिकमध्ये घडला. या ताफ्यात आमदार राहुल ढिकले आणि आमदार सीमा हिरे यांचाही समावेश होता.
उपमुख्यमंत्री आणि शिवसेनेचे मुख्य नेते एकनाथ शिंदे यांच्या बालेकिल्ल्यात अर्थात ठाण्यात राजकारण तापलं आहे. अशातच आता ठाणे महानगरपालिका निवडणुकीसाठी मनसे अध्यक्ष राज ठाकरे यांचा पक्ष शिवसेना उद्धव बाळासाहेब ठाकरे पक्ष, राष्ट्रवादी काँग्रेस शरदचंद्र पवार पक्ष यांच्यासोबत आघाडी करुन लढत आहे. शिवसेना उद्धव बाळासाहेब ठाकरे पक्ष ठाण्यात सर्वाधिक जागा लढतोय. यानंतर महाराष्ट्र नवनिर्माण सेना 28 जागा लढत आहे.
स्वबळाचा नारा देणाऱ्या भाजपकडे प्रभाग 14 मध्ये एकही उमेदवार नाही. शिंदेंच्या शिवसेनेसोबत एक एक जागेवर भांडणाऱ्या भाजपने चक्क प्रभाग क्रमांक 14 सोडला रिकामा. 122 जागा लढण्याची घोषणा करणाऱ्या भाजपाने प्रत्यक्षात मात्र 118 जागांवरच दिले अधिकृत उमेदवार दिले. जुने नाशिक येथील मुस्लिम बहुल भागात येणाऱ्या प्रभाग 14 मध्ये भाजपने एकही उमेदवार न दिल्याने आश्चर्य व्यक्त केलं जात आहे. मुस्लिम बहुल भाग म्हणून ओळखला जातो नाशिकचा प्रभाग 14. भाजपने या प्रभागात इच्छुक उमेदवार असताना उमेदवार न दिल्याने आश्चर्य
गोवंडी वॉर्ड क्रमांक १३७ व १३८ मधून पिता पुत्र निवडणुकीच्या रिंगणात उतरले आहेत. वडील महादेवराव आंबेकर हे शिवसेना ठाकरे पक्षातून निवडणूक लढवत आहेत. तर डॉ. अमोल आंबेकर हे शिवसेना शिंदे पक्षातून निवडणूक लढवत आहेत. यामुळं सध्या या परिसरात पिता-पुत्र चर्चेचा विषय ठरले आहेत.
एबी फॉर्म वाटपावरून भाजपात गोंधळ झाल्याचं पाहायला मिळालं. कारण कैलास अहिरे आणि आमदार सीमा हिरे यांच्यात शाब्दिक बाचाबाची झाली. नाशिकच्या प्रभाग क्रमांक 26 मध्ये एबी फॉर्म देण्यावरून हा वाद झाला. कैलास हिरे यांना एबी फॉर्म दिलेला असताना आमदारांनी तिकीट कापण्याचा प्रयत्न केल्याचा आरोप सीमा हिरे यांनी केला. निवडणूक निर्णय अधिकाऱ्यांच्या कार्यालयाबाहेरच भाजप पदाधिकारी कैलास अहिरे आणि आमदार सीमा हिरे यांच्यात तू तू मै मै झाली. यामुळं भाजपातील अंतर्गत कलह चव्हाट्यावर आला. सोशल मीडियामध्ये हा भांडणाचा व्हिडिओ व्हायरल झाला आहे.
उद्धव ठाकरे आणि राज ठाकरे यांच्या भेटीत आता प्रचाराची रणनीती ठरणार असल्याचे संकेत मिळत आहेत. दोन्ही बंधू प्रामुख्याने मुंबईत एकत्रित सभा घेण्यासाठी प्रयत्नशील आहेत. तर महाराष्ट्रातही काही ठिकाणी दोघांच्या एकत्रित सभा होण्याची शक्यता आहे.
महापालिका निवडणुकीसाठी उमेदवारी अर्ज दाखल करण्याची मुदत संपली आहे. त्यानंतर लगेचच मनसे अध्यक्ष राज ठाकरे मातोश्रीवर दाखल झाले आहेत. ते उद्धव ठाकरे यांची भेट घेणार आहेत. मुंबई महापालिका निवडणुकीसाठी पहिल्यांदाच दोन्ही बंधू एकत्रितपणे निवडणूक लढवत आहेत.
मुंबईत केंद्रीय राज्यमंत्री रामदास आठवले यांचा रिपब्लिकन पक्ष महायुतीतून बाहेर पडला आहे. मुंबईत ३९ जागांवर पक्षाने उमेदवार उभे केले आहेत. महायुतीने विश्वासघात केल्याची नाराजी आठवले यांनी व्यक्त केली आहे.
मुंबईमध्ये उद्धव ठाकरे यांची शिवसेना आणि राज ठाकरेंच्या मनसेमध्ये युती झाली आहे. त्यांना शरद पवारांच्या राष्ट्रवादी काँग्रेसचीही साथ मिळाली आहे. या युतीतील जागावाटप समोर आले असून मनसेच्या वाट्याला ५३ तर पवारांच्या पक्षाला ११ जागा मिळाल्या आहेत. उर्वरित १६३ जागांवर उद्धव ठाकरेंचे उमेदवार असतील, असे समजते.
सोलापुरात एबी फॉर्मवरुन भाजप कार्यकर्त्यांचा गोंधळ पाहायला मिळाला. सोलापुरात भाजपचे एबी फॉर्म वेळेत कार्यालयात न पोहचल्याने शिवसेना शिंदे गट आणि काँग्रेसच्या कार्यकर्त्यांनी भाजप पदाधिकाऱ्यांची वाट अडवली. अगदी शेवटच्या क्षणी भाजप शहराध्यक्ष आणि आमदार सचिन कल्याणशेट्टी हे एबी फॉर्म घेऊन कार्यालयात आले होते. दाखल शिंदेसेना आणि काँग्रेस कार्यकर्त्यांनाकडून कार्यालयाबाहेर जोरदार घोषणाबाजी झाली,
नाशिक महापालिका निवडणुकीसाठी उमेदवारी अर्ज भरण्याचा आज शेवटचा दिवस असून अनेक इच्छुक उमेदवार तिकीट मिळण्यासाठी धावपळ करत आहेत. एबी फॉर्मही आज दिले जाणार आहेत. एबी फॉर्म घेऊन जाणारे शहराध्यक्ष सुनील केदार यांचा इच्छुक उमेदवाराकडून पाठलाग करण्यात आल्याची घटना नाशिकमध्ये घडली.
नांदेडमध्ये काँग्रेस आणि वंचित बहुजन आघाडीमध्ये आघाडीची काँग्रेसचे नेते माणिकराव ठाकरे यांनी घोषणा केली. पत्रकार परिषदेचे वंचित बहुजन आघाडीचे नेते आणि काँग्रेसचे नेते उपस्थित. वंचित आघाडी 20 जागेवर तर 61 जगावर काँग्रेस लढणार आहे. काँग्रेसचे माजी नगरसेवक एमआयएममध्ये गेले आहे, हे भाजपचे षडयंत्र आहे, असे टोला माणिकराव ठाकरे यांनी लगावला.
चंद्रपूर महापालिकेसाठी भाजप उमेदवारांच्या यादीवर आमदार किशोर जोरगेवार यांनी तीव्र आक्षेप घेतला आहे. सुधीर मुनगंटीवार यांच्या दोन समर्थकांना उमेदवारी दिल्याबद्दल जोरगेवार यांनी नाराजी व्यक्त करत, वरिष्ठापर्यंत तातडीने या उमेदवारांबद्दलचे आक्षेप नोंदवत, उमेदवार बदलण्याची मागणी केली. अजय सरकार आणि पूजा पोतराजे यांना उमेदवारी देण्याबद्दल जोरगेवार यांनी तीव्र आक्षेप घेतला आहे. अजय सरकार याच्यावर 302 सहित वीस गंभीर गुन्हे दाखल असल्याचा जोरगेवार यांनी हवाला दिला, तर दुसरीकडे पूजा पोतराजे यांचे पती मनोज पोतराजे यांनी मुख्यमंत्री देवेंद्र फडणवीस यांच्या विरोधात समाज माध्यमावर बदनामीकारक कॅम्पेन चालवण्याचा आरोप जोरगेवार यांनी केला.
भोकरदन तहसील कार्यालयासमोर विविध मागण्यांसाठी नारायण लोखंडे आणि विकास जाधव या शेतकरी पुत्रांनी बेमुदत उपोषण सुरू केलं होतं. यावेळी प्रशासनाचे लक्ष वेधण्यासाठी तहसील कार्यालयात तहसीलदारांच्या केबिनमध्ये घुसून अर्धनग्न होत डफडं वाजवत आंदोलन केलं. याप्रकरणी नायब तहसीलदार अविनाश पाटील यांच्या तक्रारीवरून भोकरदन पोलिस ठाण्यात बारा जणांवर गुन्हा दाखल करण्यात आला. 26 डिसेंबरला कोणतीही परवानगी न घेता मंगेश साबळे यांनी अर्ध नग्न अवस्थेत हातात डफडे घेऊन आंदोलन केलं होतं.
अकोला महापालिका निवडणुकीत तिकीट न मिळाल्याने भाजपच्या कार्यकर्त्यांनी निवडणूक प्रभारीच्या निवासस्थानावर मोठा गोंधळ घातला. भाजप महिला पदाधिकारी शंकुतला जाधव यांना अश्रू अनावर झाले होते. गोंधळ सुरू असतानाच जाधव यांची अचानक तब्येत बिघडली, आणि खाली जमिनीवर कोसळल्यात. या गोंधळानंतर विजय अग्रवाल यांच्या निवासस्थानी पोलिसांचा मोठा बंदोबस्त तैनात करण्यात आला.
नाशिकमध्ये भाजपच्या इच्छुक उमेदवारांनी आमदार सीमा हिरे, आमदार राहुल ढिकले, भाजप शहराध्यक्ष याच्या कारचा पाठलाग केल्याचा थरार समोर आला आहे. नाशिक-मुंबई महामार्गावर तब्बल तासभर हा थरार रंगला होता. अर्ज भरण्यासाठी शेवटचा एक तास राहिल्याने, एबी फाॅर्म मिळवण्यासाठी हा प्रकार घडल्याचं समोर आलं आहे. भाजपने नाशिकमध्ये अनेक ठिकाणी आयात उमेदवार दिले आहे.
छत्रपती संभाजीनगरमध्ये भाजपकडून उमेदवारी न मिळाल्याने पदाधिकाऱ्यांमध्ये उद्रेक उफाळला आहे. भाजप आमदार अतुल सावे यांच्या कार्यालयाबाहेर तीन महिला, दोन पुरूष उमेदवारांनी जोरदार राडा घातला. पोलिसांनी त्यांना हाताला धरून बाहेर काढले. वरिष्ठ नेत्यांकडून पोलिसांच्या बळाचा वापर झाल्याने पदाधिकारी आणि कार्यकर्त्यांमध्ये प्रचंड नाराजी पसरली आहे. एका उमेदवारांने तर अंगावर ज्वलनशील तेल ओतून घेण्याचा प्रयत्न करता. त्याच्याकडून पोलिसांनी पेट्रोलने भरलेले बाटली जप्त केली. भाजपचे खासदार भागवत कराड देखील तेथे बसून होते.
ठाणे महापालिका निवडणुकीत एकनाथ शिंदे शिवसेना पक्षाचे खासदार नरेश म्हस्के यांच्या पुत्राचे तिकिट कापण्यात आले आहे. मुलगा आशुतोष म्हस्के याला तिकिट मिळण्यासाठी खासदार म्हस्केंनी मोठी फिल्डिंग लावली होती. मात्र, म्हस्केंची राजकीय नीती पुत्राला तिकिट मिळवून देण्यासाठी फेल ठरली आहे.
लातूर महापालिकेसाठी उमेदवारी दाखल करण्यासाठी अगदी काही तास शिल्लक असताना भाजपमधील नाराजी नाट्याला सुरूवात झाली आहे. भाजपच्या लातूर शहर संघटनातील संघटन सरचिटणीस पदाचा राजीनामा निखिल गायकवाड यांनी दिला “काम करण्याचे फळ मिळाले, धन्यवाद” अशी पोस्ट समाज माध्यमावर टाकत राजीनामा दिल्याची माहिती मिळते आहे. महापालिकेच्या तोंडावर इतर राजकीय पक्षांमधून मोठ्या प्रमाणात नेते आणि कार्यकर्ते, भाजपमध्ये दाखल झाल्याने, जुन्या कार्यकर्त्यांमध्ये आता नाराजीचा सुरू दिसते आहे.
अमरावती महापालिका निवडणुकीत एकनाथ शिंदे यांच्या शिवसेनेत नाराजी उफाळली आहे. शिवसेनेचे पश्चिम विदर्भ संघटक माजी मंत्री जगदीश गुप्ता यांनी राजीनामा दिला आहे. जागा वाटपामध्ये, भाजप सोबतच्या चर्चेमध्ये विश्वासात न घेतल्याचा आरोप, जगदीश गुप्ता यांनी केला. जगदीश गुप्ता स्वतंत्र पॅनलने निवडणुकीला समोरे जाणार आहे. तसंच अमरावती महापालिका निवडणुकीत एकनाथ शिंदेंची शिवसेना स्वतंत्र निवडणूक लढणार आहे.
भाजपा आणि शिवसेना शिंदे गट स्वबळावर निवडणूक लढवणार आहे. जागा वाटपाचा तिढा न सुटल्याने स्वबळावर लढण्याचा निर्णय घेण्यात आला आहे.दोन्ही पक्षांनी इच्छुकांना AB देण्यास सुरुवात केली आहे.
शिवसेनेतून राष्ट्रवादीत प्रवेश करणाऱ्या सुरज लोखंडे यांना उमेदवारी न मिळाल्याने पुन्हा शिवसेनेत घर वापसी केली आहे. दोन दिवसांपूर्वी सुरज लोखंडे यांनी अजित पवार यांच्या राष्ट्रदादांच्या राष्ट्रवादीत प्रवेश केला होता.
नागपूरात महाविकास आघाडीमध्ये फूट पडण्याची शक्यता आहे. ठाकरे सेना वबळावर लढण्याची शक्यता व्यक्त केली आहे. जागा वाटपावरून काँग्रेस उबाठा मध्ये रस्सीखेच सुरू आहे, 4 ते 5 जागांसाठी आघाडी तुटण्याची शक्यता आहे. आजच्या बैठकीत तोडगा न निघणार का? हे लवकरच समजेल.
अहिल्यानगरमध्ये ऐन महापालिका निवडणुकीच्या तोंडावर ठाकरेंच्या शिवसेनेचे महाराष्ट्र प्रदेश सहसचिव विक्रम राठोड यांनी राजीनामा दिला आहे. पक्षामध्ये सन्मानजनक वागणूक मिळत नसल्याचा आरोप करत त्यांनी राजीनामा दिला असून ते लवकरच शिंदेंच्या शिवसेनेमध्ये करणार प्रवेश करणार असल्याची माहिती समोर आली आहे.
उपमुख्यमंत्री अजित पवार यांच्या निवासस्थानी एबी फॉर्मचं वाटप सुरू असून अजितदादांच्या भेटीसाठी जिजाऊ निवासस्थानी कार्यकर्ते पदाधिकाऱ्यांनी मोठी गर्दी केली आहे. रुपाली ठोंबरे, माजी आमदार सुनील टिंगरे यांच्यासह अनेक नेते देखील जिजाऊवर अजित पवारांच्या भेटीसाठी आले आहेत.
BMC Election : आगामी मुंबई महानगरपालिकेच्या निवडणुकीसाठी भाजप आणि शिंदेंच्या शिवसेनेचं जागावाटप काल रात्री पूर्ण झाल्याची माहिती खुद्द मुख्यमंत्री देवेंद्र फडणवीस यांनी एक्सवर पोस्ट करत दिली. 'भाजपा आणि शिवसेना महायुतीचे मुंबईतील जागावाटप पूर्ण झाले असून 137 जागा भाजप तर 90 जागा शिवसेना लढवणार आहे. महायुतीचे इतर घटकपक्ष यात समाविष्ट असतील. पंतप्रधान नरेंद्र मोदी यांच्या नेतृत्वात मुंबईच्या विकासासाठी आम्ही कटिबद्ध आहोत. मुंबईकरांचे जीवन सुकर करण्यासाठी विकासाची कामे कुणी केली, हे मुंबईकरांना चांगलेच ठावूक आहे. त्यामुळेच मुंबईकर महायुतीच्या पाठीशी ठामपणे उभे राहतील आणि प्रचंड बहुमताने महायुतीच्या सर्व उमेदवारांना निवडून देतील, हा आम्हाला विश्वास आहे.' असं ट्विट फडणवीसांनी केलं आहे.
बांगलादेशच्या पहिल्या महिला पंतप्रधान खालिदा झिया यांचं वयाच्या 80 व्या वर्षी निधन झालं. त्यांच्या निधनाची बातमी बीएनपी पक्षानं दिली. मागील अनेक दिवसांपासून त्यांची प्रकृती चिंताजनक होती. ढाका येथील एव्हरकेअर रुग्णालयात उपचार सुरू असतानाच त्यांची प्राणज्योत मालवली. खालिदा झिया यांचे पती झियाउर रहमान बांगलादेशच्या स्वातंत्र्यलढ्यातील महत्त्वाचे आणि अग्रगण्य व्यक्ती होते. ते 1977 मध्ये बांगलादेशचे राष्ट्राध्यक्ष होते.
कोल्हापूर महानगरपालिकेत काँग्रेसचे 69 उमेदवार अर्ज दाखल करणार आहेत. तर याआधी काँग्रेसने पहिली आणि दुसरी यादी जाहीर केली आहे. मात्र आता काँग्रेस तिसरी यादी जाहीर न करता उमेदवारांना थेट एबी फॉर्म देणार असून यात आणखी नव्या 12 उमेदवारांना संधी मिळणार आहे. 81 जागांपैकी काँग्रेस 69 जागांवर तर शिवसेना 11 जागांवर निवडणूक लढवणार आहे.
आगामी मुंबई महापालिका निवडणुकीसाठी काँग्रेसने आपल्या उमेदवारांची दुसरी यादी जाहीर केली आहे. या यादीच 52 जणांचा समावेश आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.
वेबसाईटवर ब्राउझिंगचा अनुभव सर्वोत्तम असावा, यासाठी आम्ही कुकीजचा वापर करतो. कुकीजमुळे तुम्हाला तुमच्या आवडत्या मजकुराची शिफारस करता येते. आमचे गोपनीयता आणि कुकीजसंदर्भातील धोरण तुम्हाला मान्य आहे.
