Suresh Dhas : मुंडेंविरोधात रान उठवणाऱ्या धसांना अजितदादांनी टाळले? भेटही नाकारली

Beed News : बीड जिल्ह्यातील मस्साजोग गावचे सरपंच संतोष देशमुख हत्याप्रकरणानंतर भाजप आमदार सुरेश धस यांनी आक्रमक पवित्रा घेतला. त्यांनी धनंजय मुंडेंविरोधात रान उठवलं त्यांच्या राजीनाम्याची मागणी लावून धरली आहे. तसेच जिल्ह्यातील विविध गैरप्रकार, गुन्हेगारी आणि जिल्हा नियोजन समितीच्या भ्रष्टाचाराचा पर्दाफाश करताना मुख्यमंत्र्यांसह उपमुख्यमंत्री अजित पवार यांच्याकडे तक्रार करणार असल्याचे म्हटले होते. त्यापद्धतीने ते आज (ता.13) अजित पवार यांची भेट घेण्यासाठी मुंबईला गेले होते. मात्र त्यांची भेट अजित पवार यांनी टाळली आहे. यामुळे रिकाम्या हातांनी धस यांना बीडला निघावे लागले आहे.

बीड जिल्ह्यातील संतोष देशमुख हत्याप्रकरण, पीक विमा घोटाळा, हार्वेस्टर घोटाळा आणि इतर अनेक घोटाळ्यांमध्ये राष्ट्रवादी काँग्रेस पक्षातील मंत्री धनंजय मुंडेंचे कार्यकर्ते आणि पदाधिकाऱ्यांचा हात असल्याचे उघड झाले आहे.

तसेच येथे जिल्हा नियोजन समितीमधील विविध कामात देखील भ्रष्टाचार झाल्याचा आरोप धस यांनी केला होता. याबाबतच ते तक्रार आणि खुलासा करण्यासाठी उपमुख्यमंत्री अजित पवार यांना भेटण्यासाठी निघाले होते. मात्र अजितदादांनी धस यांची भेट टाळली आहे.

धस यांनी जिल्हा नियोजन समितीमधील विविध कामात देखील भ्रष्टाचार झाल्याचा आरोप केला होता. त्यांनी, धनंजय मुंडे सामाजिक न्याय विभागाचे मंत्री असताना 2019-2024 या कालावधीत भ्रष्टाचार झाल्याचा दावा केला होता. तसेच धस यांनी भ्रष्टाचारातील 72 कोटी रुपयांची बोगस बिले पुरावा म्हणून अजित पवारांना दिली आहेत.

याच जिल्हा नियोजन समितीमधील भ्रष्टाचाराची चौकशी करण्याची मागणी धस यांनी केली होती. ते यासाठी अजित पवार यांना भेटणार होते. पण आता अजित पवार यांनी वेळ नाकारत भेट टाळल्याने त्या काळातील चौकशी होणार का? भ्रष्टाचाराला खो मिळणार की याप्रकरणात तडक कारवाई होणार? याकडे सर्वांचेच लक्ष लागेल आहे. तर सुरेश धस आता काय भूमीका घेतात हे ही महत्त्वाचे ठरणार आहे.