Santosh Deshmukh Case : संतोष देशमुख प्रकरणातील निलंबित पोलिस, सुनावणी घेणारे न्यायाधीशांची एकत्रित 'धुळवड'? दमानियांने फोटो केले शेअर

Anjali Damania News : संतोष देशमुख हत्या प्रकरणातील निलंबित पोलिस अधिकारी आणि सुनावणी करणाऱ्या न्यायाधीशांचा धुळवडचा एकत्रित आनंद घेत असल्याचा फोटो सामजिक कार्यकर्त्या अंजली दमानिया यांनी आपल्या ट्विटरवर शेअर केला आहे.

या फोटोमध्ये निलंबित पोलिस उपनिरीक्षक राजेश पाटील आणि सक्तीच्या रजेवर असलेले पोलीस निरीक्षक प्रशांत महाजन जिल्हा आणि सत्र न्यायालयाचे न्यायाधीश सुधीर भाजीपाले यांच्यासोबत धुळवडीचा आनंद घेताना दिसत आहेत.

अंजली दमानिया यांनी आपल्या ट्विटमध्ये म्हटले आहे की, 'हे फोटो तपासा आणि आधी खात्री करा. मला मिळालेल्या माहितीप्रमाणे संतोष देशमुख हत्या प्रकरणामुळे निलंबित पोलिस उपनिरिक्षक राजेश पाटील व याच हत्याकांडामुळे सक्तीच्या रजेवर पाठवलेले पोलीस निरिक्षक प्रशांत महाजन हे धुरवडीला रंगाची उधळण करुन आनंद साजरा करताना दिसत आहेतपण कोणाबरोबर ? संतोष देशमुख हत्याकांडाची सूनावणी करणारे जिल्हा व सत्र न्यायालयाचे न्यायाधिस सुधीर भाजीपाले यांच्या सोबत रंगाची उधळण करताना दिसत आहेत.'

दमानिया यांनी आपल्या ट्विटमध्ये पुढे म्हटले आहे की, 'आरोपीला वाचणारे हे निलंबित आधिकारी यांच्या सोबत केस चालू असताना जज होळी खेळत असतील तर हे खूप चुकीचे आहे.'

संतोष देशमुख हत्या प्रकरणात पोलिस निरीक्षक प्रशांत महाजन यांना तपासात दिरंगाई केल्यामुळे सक्तीच्या रजेवर पाठवण्यात आले, तर उपनिरीक्षक राजेश पाटील यांना निलंबित करण्यात आले होते. या प्रकरणी आरोपींच्या मदतीच्या संशयावरून अनेक वेळा चर्चा झाली आहे. त्यामुळे न्यायाधीश आणि या अधिकाऱ्यांचा एकत्र फोटो समोर आल्यानंतर मोठी चर्चा रंगली आहे. या फोटोची अधिकृतरित्या सत्यता अजून समोर आलेली नाही. मात्र, हा फोटो व्हायरल झाल्यानंतर सोशल मीडियावर टीका करण्यात येत आहे.

(२५ वर्षे पूर्ण करणारा ई-सकाळ आता का्ॅमस्कोअरमध्ये नंबर १. डिजिटल माध्यमांच्या क्षेत्रातली नवी झेप)