Ashok Chavan News : 'अशोक चव्हाण को गुस्सा क्यू आया'.. अरे बाबांनो माझ्या नावाने का बोंबलताय? विकासावर बोला ना!

Nanded Mahayuti Politics : नगरपालिका, नगरपंचायत निवडणुकीचा प्रचार अंतिम टप्प्यात पोहोचला असताना राज्याच्या सत्तेत असलेले परंतु स्थानिक स्वराज्य संस्था निवडणुकीत एकमेकांच्या विरोधात उभे ठाकलेले पक्ष आणि त्यांचे नेते अक्षरश: तुटून पडले आहेत. नांदेड जिल्ह्यात राष्ट्रवादी काँग्रेस पक्ष अजित पवार, शिवसेना शिंदे गटाकडून भाजपचे खासदार अशोक चव्हाण यांना टारगेट केले जात असल्याचे दिसून येत आहे.

राज्याच्या सत्तेत महायुती म्हणून एकत्र असले तरी स्थानिक स्वराज्य संस्था निवडणुकीत शिवसेना, भाजप आणि राष्ट्रवादी काँग्रेस पक्ष या तिघांनी मराठवाड्यात व राज्यात स्वतंत्र चूल मांडली आहे. त्यामुळे एकमेकांवर टीका करताना कुठलीच पातळी नेत्यांकडून राखली जात नाहीये. नांदेड जिल्ह्यात अशोक चव्हाण यांच्यावर राष्ट्रवादी काँग्रेसचे आमदार तथा जिल्ह्यातील नेते प्रताप पाटील चिखलीकर, शिवसेनेचे विधान परिषदेतील आमदार हेमंत पाटील यांनी टीकेची झोड उठवली आहे.

चिखलीकर, हेमंत पाटील यांच्याकडून होणारी टीका जिव्हारी लागल्याने अशोक चव्हाण यांचा पारा चांगला चढल्याचे काल दिसून आले. मुदखेड, हिमायतनगर नगरपालिका निवडणुकीच्या प्रचार सभांमध्ये अशोक चव्हाण यांनी आपल्या भाषणातून 'माझ्या नावाने का बोंबलताय? विकास कामावर बोला ना' असे आवाहन देत चिखलीकर, पाटील व जिल्ह्यातील इतर विरोधकांना सुनावले.

चिखलीकरांकडून अशोक चव्हाण हे नगरपालिका निवडणुकीत वडिलांच्या नावाने म्हणजे शंकरराव चव्हाण यांच्या नावाने मतं मागत असल्याचा आरोप केला. तर दुसरीकडे शिवसेनेचे आमदार हेमंत पाटील यांनी राज्याचे मुख्यमंत्री राहिलेल्या अशोक चव्हाण यांनी सध्या उपमुख्यमंत्री असलेल्या अजित पवार यांच्या बारामतीच्या विकासावर मतं मागणे कितपत योग्य आहे? 75 वर्ष तुमचा पक्ष आणि तुम्ही सत्तेवर होतात, मग या राज्याचा विकास का केला नाही? दोन वेळा मुख्यमंत्री झालेला असताना बारामतीसारखा विकास तुम्हाला का करता आला नाही?

तुम्ही नांदेडला बारामती सारखा विकास करू शकणार नाहीत तर पैसे वाटून मतदारांवर भानामती करणार अशा शब्दात हेमंत पाटील यांनी चव्हाणांना डिवचले. एकूणच विरोधक आणि मित्र पक्षातील नेत्यांकडूनही एकमेव अशोक चव्हाण यांना लक्ष केले जात असल्याने चव्हाण यांनी या नेत्यांना आपल्या भाषणातून प्रत्युत्तर दिले. 'माझ्या बापाची पुण्याई मोठी होती, आजही नांदेड जिल्ह्यात प्रत्येक घरामध्ये दिवंगत लोकनेते शंकरराव चव्हाण यांचे फोटो आहेत. लोक त्यांच्यासोबत घालवलेल्या प्रत्येक क्षणाची आठवण काढून ती मला सांगतात.

आता होता आमचा बाप कर्तुत्ववान, तुमचा नसेल तर त्याला मी काय करू? असा पलटवार चव्हाण यांनी चिखलीकर यांच्यावर केला. दोन दिवसांपूर्वी राज्याचे सामाजिक न्याय मंत्री संजय शिरसाट यांनीही नांदेड मधील प्रचार सभेत अशोक चव्हाण यांनाच लक्ष्य केले होते. सगळ्या एजन्सीज तुम्हालाच कशाला हव्यात? तुम्ही भाकरी खाता का नोटा? अशा शब्दात अशोक चव्हाण यांच्यावर निशाणा साधला होता.

यावरही उठसूट कुणीही येतो आणि अशोक चव्हाणांवर बोलून जातो. त्याशिवाय यांना झोप लागत नाही का? संजय शिरसाट हे माझे चांगले मित्र आहेत, त्यांची माझी ओळखही आहे. मंत्रीपदावर असलेल्या एखाद्या व्यक्तीने अशा प्रकारचे आरोप किंवा टीका करणे त्यांना शोभत नाही, अशी तीव्र नाराजी त्यांनी व्यक्त केली. नगरपालिकेच्या प्रचाराला शेवटचे दोन दिवस शिल्लक राहिले आहेत. या दोन दिवसात राज्याच्या सत्तेत असलेले मित्र पक्षातील नेते एकमेकांवर आणखी किती खालच्या पातळीवर जाऊन टीका करतात? हे पहावे लागेल.

FAQs

1. अशोक चव्हाणांवर कोणत्या नेत्यांनी टीका केली?
चिखलीकर, पाटील आणि शिरसाट या नेत्यांनी चव्हाणांवर खुलेपणाने टीका केली.

2. चव्हाणांनी या टीकेला काय प्रतिक्रिया दिली?
ते म्हणाले की, आता खरे तथ्य लोकांसमोर मांडले जातील आणि ते शांत बसणार नाहीत.

3. हा वाद कोणत्या पार्श्वभूमीवर सुरू आहे?
राजकीय धोरणे व निवडणुकीपूर्वी घडणाऱ्या घडामोडीमुळे हा वाद चिघळला आहे.

4. मित्रपक्षांनी टीका का केली?
समन्वय व भूमिकांमधील मतभेदांमुळे संघर्ष निर्माण झाल्याची चर्चा आहे.

5. या वादाचा पुढे राजकारणावर काय परिणाम होऊ शकतो?
राजकीय समीकरणे बदलू शकतात आणि नवे आघाडया तयार होण्याची शक्यता वाढली आहे.