Babjani Durani : काँग्रेसमध्येही बाबाजानी दुर्राणी वेटिंगवरच? जिल्हाध्यक्षपद पितृपक्ष संपल्यावर मिळणार!

Parbhani Congress News : राष्ट्रवादी काँग्रेस शरदचंद्र पवार पक्षातून दीड महिन्यापूर्वी काँग्रेसमध्ये प्रवेश केलेले माजी आमदार बाबाजानी दुर्राणी यांच्यावर अद्याप पक्षाने कुठलीच महत्त्वाची जबाबदारी दिलेली नाही. त्यामुळे पक्षप्रवेशाच्या वेळी परभणी जिल्ह्यात काँग्रेस नंबर एकचा पक्ष दुर्राणी कसा करणार? असा प्रश्न उपस्थित केला जात आहे. दरम्यान काँग्रेसच्या जिल्हाध्यक्षपदावरून परभणीत मोठी चुरस निर्माण झाली आहे. परंतु काँग्रेसच्या वरिष्ठांचा निर्णय पक्का झाला आहे, परंतू पितृपक्षात कुठलेही शुभ कार्य नको, म्हणत दुर्राणी यांना वेटिंगवर ठेवण्यात आले आहे.

काँग्रेस (Congress)मध्ये प्रवेश करताना प्रदेशाध्यक्ष हर्षवर्धन सपकाळ यांनी दुर्राणी यांच्यावर महत्त्वाची जबाबदारी आपण देणार असल्याचे सुतोवाच केले होते. त्यानंतर जिल्हाध्यक्ष पदाची धुरा त्यांच्या खांद्यावर दिली जाणार असल्याची चर्चा होती. आता पितृपक्ष संपल्यानंतर बाबाजानी दुर्राणी यांना जिल्हाध्यक्ष केले जाईल, अशी जोरदार चर्चा परभणी मध्ये सुरू आहे. सुरेश वरपूडकर यांनी दोन महिन्यापूर्वी भाजपमध्ये प्रवेश केला त्यानंतर जिल्ह्यात विविध राजकीय घडामोडी घडल्या.

राष्ट्रवादी काँग्रेस पक्षात फूट पडल्यानंतर आधी शरद पवार आणि नंतर अजित पवार यांच्या पक्षात गेलेल्या बाबाजानी दुर्रानी (Babajani Durani) यांनी पुन्हा युटर्न घेत शरद पवारांच्या राष्ट्रवादी मध्ये घरवापसी केली होती. मात्र आगामी स्थानिक स्वराज्य संस्था निवडणुका पाहता शरद पवार यांच्या पक्षात राहून आपले राजकीय अस्तित्व टिकवता येणार नाही याची जाणीव झाल्यामुळे बाबाजानी दुर्राणी यांच्यावर काँग्रेस प्रवेशासाठी त्यांच्या समर्थकांचा दबाव होता. तर दुसरीकडे सुरेश वरपूडकर यांनी काँग्रेसची साथ सोडल्यानंतर त्या पक्षालाही जिल्ह्यात वजनदार नेत्याची गरज होती ती बाबाजानी दुर्राणी यांच्या काँग्रेस प्रवेशाने पूर्ण झाली.

काँग्रेसचे आमदार अमित देशमुख यांनी बाबाजानी दुर्राणी यांना पक्षात आणण्यासाठी फिल्डिंग लावली होती. 'बहुत देर कर दी मेहरबान आते आते' अशी शेरोशायरी करत अमित देशमुख यांनी तेव्हा बाबाजानी दुर्राणी यांचे पक्षात स्वागत केले होते. त्यांच्या पक्षप्रवेशाने केवळ परभणीच नाही तर मराठवाड्यात काँग्रेस पक्ष मजबूत होईल, असा विश्वास देशमुख यांनी व्यक्त केला होता. आता बाबाजानी यांच्या गळ्यात जिल्हाध्यक्ष पदाची माळ पडल्यानंतर स्थानिक स्वराज्य संस्था निवडणुकीत काँग्रेसचा स्ट्राईक रेट कसा असेल? याकडे त्यांचे समर्थक आणि विरोधक दोघांचेही बारकाईने लक्ष असणार आहे.

परभणीच्या राजकीय क्षेत्रात निष्ठा बदलण्यात माहीर असलेल्या आमदार बाबाजानी दुर्राणी यांनी काँग्रेसमध् प्रवेश केल्यानंतर उत्साहाचे वातावरण आहे. पण अद्याप जिल्हाध्यक्ष पदाची जबाबदारी न मिळाल्यामुळे इथेही त्यांना वेटिंगवरच राहावे लगत असल्याचे दिसते. पितृपंधरवडा ही एक महत्त्वाची धार्मिक परंपरा राजकीय नियोजनाआड आली आहे. दुर्राणी यांचे नाव जिल्हाध्यक्षपदासाठी जवळपास निश्चित झाले आहे.

पुढील दोन ते चार दिवस तरी दुर्राणी यांच्या गळ्यात जिल्हाध्यक्षपदाची माळ पडणार नाही, हे निश्चित मानले जात आहे. राजकीय वर्तुळात यावर टीकाही सुरू झाली असून, दुर्राणी यांच्या राजकीय निष्ठेइतकेच त्यांचे सध्याचे पक्षातील स्थानही थांबते-चालते अशा प्रतिक्रिया ऐकायला मिळत आहेत. पितृपंधरवडा संपल्यानंतर काय होते आणि जिल्हाध्यक्षपदाची माळ दुर्राणी यांच्या गळ्यात पडते का? याकडे सर्वांचे लक्ष लागले आहे.

FAQs

प्र.1: बाबाजानी दुर्राणी सध्या कोणत्या पक्षात आहेत?
उ.1: ते काँग्रेसमध्ये दाखल झाले आहेत.

प्र.2: परभणी काँग्रेस जिल्हाध्यक्ष पदाबाबत काय निर्णय झाला आहे?
उ.2: अद्याप कोणताही निर्णय झाला नाही.

प्र.3: निर्णय घेण्यात उशीर का होतो आहे?
उ.3: पितृपक्ष संपल्यानंतर निर्णय घेतला जाईल असे सांगण्यात आले आहे.

प्र.4: बाबाजानी दुर्राणी कोण आहेत?
उ.4: ते माजी आमदार असून परभणीतील वरिष्ठ राजकीय नेते आहेत.