Manoj jarange Patil : मराठा आरक्षणाच्या मागणीसाठी आंदोलक मनोज जरांगे पाटील हे दोन वर्षापासून लढा देत आहेत. गेल्यावेळी मुंबईच्या वेशीवरून परत आलेल्या लाखो मराठा समाज बांधवांनी यावेळी थेट मुंबई गाठली. मनोज जरांगे पाटील यांचे बेमुदत उपोषण आझाद मैदानावर सुरू आहे. या संपूर्ण मराठा आरक्षणाच्या लढ्यात मराठवाड्यातील बीड जिल्ह्याने महत्वाची भूमिका बजावली आहे.
राष्ट्रवादी काँग्रेस शरदचंद्र पवार पक्षाचे बीडचे (Beed News) खासदार बंजरंग सोनवणे, आमदार संदीप क्षीरसागर, राष्ट्रवादीचे माजलगावचे आमदार प्रकाश सोळंके, भाजपाचे आष्टीचे आमदार सुरेश धस यांनी मनोज जरांगे पाटील यांच्या मागण्यांना पाठिंबा जाहीर केला आहे. केवळ पाठिंबा जाहीर करून ते मोकळे झाले नाही, तर आझाद मैदानावर हजेरी लावून त्यांनी मनोज जरांगे पाटील यांना आरक्षणाच्या लढाईत सोबत असल्याची ग्वाही देखील दिली.
लाखोंच्या संख्येने मराठा आंदोलक मुंबईत दाखल झाल्याने राज्याची आर्थिक राजधानी ठप्प झाल्यासारखी परिस्थिती आहे. (Maratha Reservation) आंदोलकांची संख्या लाखांत असतांना सरकारकडून पिण्याच्या पाण्याची व्यवस्था, शौचालय, लाईट, थांबण्यासाठी जागा अशी कुठलीच व्यवस्था करण्यात आलेली नाही, असा आरोप आंदोलकांनी केला. उपोषणाच्या दुसऱ्याच दिवशी यामुळे आंदोलकांचा संताप अनावर झाल्याचे पहायला मिळाले.
या पार्श्वभूमीवर बीड जिल्ह्यातील सर्व आमदारांनी मराठा आरक्षण उपसमितीचे अध्यक्ष राधाकृष्ण विखे पाटील यांची भेट घेऊन त्यांना विविध मागण्यांचे निवेदन दिले. विखे पाटील यांच्या निवासस्थानी आयोजित बैठकीत आमदार सुरेश धस, संदीप क्षीरसागर, प्रकाश सोळंके, विजसिंह पंडित यांनी हजेरी लावली. मराठा आरक्षणावर तातडीने तोडगा निघावा, मनोज जरांगे पाटील यांच्या मागण्या मान्य करण्यात याव्यात, अशी ठाम भूमिका या लोकप्रतिनिधींनी बैठकीत मांडली.
आझाद मैदान परिसरात आंदोलनकर्त्या मराठा समाज बांधवांना मूलभूत सोयीसुविधा उपलब्ध करून द्याव्यात अशी, आग्रही मागणी यावेळी करण्यात आली. आंदोलन करणे हा लोकशाहीतील एक मूलभूत अधिकार आहे, याची जाणीव करून देतानाच आंदोलकांना पाणी, शौचालय या सारख्या सुविधा तातडीने उपलब्ध करून द्याव्यात, असेही या बैठकीत सांगण्यात आले. शिवेंद्रसिंहराजे भोसले, दादा भुसे साहेब, बाबासाहेब पाटील, मकरंद आबा पाटील, माणिकराव कोकाटे यांची देखील बैठकीला उपस्थिती होती. या बैठकीनंतर मागण्यांच्या निवेदनावर प्रशासनाला तातडीने आवश्यक त्या सूचनाही देण्यात आल्या आहेत.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.