
परळी विधानसभा मतदारसंघातील राष्ट्रवादी काँग्रेसचे उमेदवार धनंजय मुंडे यांनी आपल्या विरोधातील उमेदवाराबाबत मोठा गौप्यस्फोट केला आहे. "राष्ट्रवादी काँग्रेस शरदचंद्र पवार पक्षाकडून परळीत कुणाला तिकीट मिळणार, याची चढाओढ सुरु असताना आपणच 'तुतारी'च्या एका नेत्याला फोन करुन सांगितले की लवकर उमेदवार फायनल करा," असा गौप्यस्फोट धनंजय मुंडे यांनी जाहीर सभेत केला. बीडच्या परळी मतदारसंघातील घाटनांदुर येथे आज जाहीर सभेत ते बोलत होते.
धनंजय मुंडे म्हणाले, "माझ्या विरोधात 'तुतारी'वर लढण्यासाठी अनेक जण उतावीळ झाले होते. त्यात काही निष्ठावंत होते. त्यांनी प्रचाराला सुरवातही केली होती. त्यांच्या नेत्याला विचारुन फिरायला लागले. त्यांचे नेतेही जे येईल, त्याला म्हणायचे लागा कामाला, तिकीट तुम्हालाच. एकाच घरातून आई, लेक, जावई इच्छुक होते. एवढ्यावरच थांबले नाहीत, अनेकजण नडायला लागले. पण, 12 ते 13 जण झाल्यावर मलाच या सगळ्यांची काळजी वाटली. कारण तिकीट एकालाच मिळणार होते. मग मीच 'तुतारी'च्या एका नेत्याला मीच फोन लावला आणि म्हटलं बाबा लवकर फायनल करा. कारण लवकर तिकीट मिळालं नाही अन् त्यातले दोघं वेडे झाले आणि फिरायला लागले तर शेवटी येथील लोकप्रतिनिधी म्हणून त्यांची काळजीसुद्धा मलाच करावी लागेल"
"लोकसभेत जसे केलं, तसेच आता विधानसभेतही हा आयात केलेला उमेदवार देऊन जातीपातीचे राजकारण केलं जात आहे. हे राजकारण कोण करीत आहे, हे तुम्हा सर्वांना माहित आहे," असं म्हणत धनंजय मुंडे यांनी नाव न घेता शरद पवार यांच्यावर पुन्हा एकदा टीका केली. परळी विधानसभा मतदारसंघात एकूण 58 जणांनी उमेदवारी अर्ज दाखल केले होते. त्यापैकी दहा उमेदवारांचे अर्ज छाननी मध्ये अवैध ठरले होते. 48 उमेदवारांचे अर्ज छाननी मध्ये वैध ठरले होते. तर उमेदवारी अर्ज मागे घेण्याच्या शेवटच्या दिवशी एकूण 35 जणांनी आपले अर्ज मागे घेतले. यापूर्वी दोघाजणांनी उमेदवारी मागे घेतली आहे. त्यामुळे निवडणुकीच्या रिंगणात आता 11 उमेदवार राहिले आहे.
अपक्ष उमेदवारी दाखल केलेले राष्ट्रवादी काँग्रेस शरद पवार पक्षाचे युवक नेते राजेभाऊ फड, अपक्ष उमेदवार राजेश देशमुख व प्रभाकर वाघमोडे, दिलीप बिडगर यांच्यासह एकूण 37 जणांनी निवडणुकीच्या रिंगणातून माघार घेतली. यामुळे महायुतीचे उमेदवार राष्ट्रवादी काँग्रेसचे धनंजय पंडितराव मुंडे व महाविकास आघाडीचे राष्ट्रवादी काँग्रेस शरदचंद्र पवार पक्षाचे राजेसाहेब श्रीकिशन देशमुख या दोघांमध्ये सरळ लढत होत आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.