Walmik Karad : बीड जिल्हा कारागृहच असुरक्षित? कराड गँगची जेल कर्मचाऱ्याला जीवे मारण्याची धमकी

Beed Crime News : बीडच्या मस्साजोगचे सरपंच संतोष देशमुख याच्या हत्येनंतर वर्ष होत असतानाही एक आरोपी अद्याप सापडलेला नाही. दरम्यान या हत्या प्रकरणातील प्रमुख आरोप वाल्मीक कराड बाबत गेल्या काही दिवसापासून विविध क्लिप व्हायरल होत आहेत. यावरून राज्यातील वातावरण तापले असतानाच आता कराड गँगचा माज कारागृहातही कमी झालेला दिसत नाही. या गँगकडून आता चक्का जिल्हा कारागृहातील कर्मचाऱ्यालाच जीवे मारण्याच्या धमक्या दिल्या जात असल्याचे समोर आले आहे. यामुळे सध्या एकच खळबळ उडाली आहे.

सरपंच संतोष देशमुख यांच्या हत्या प्रकरणात वाल्मीक कराड, सुदर्शन घुले, प्रतीक घुले, जयराम चाटे, महेश केदार आणि इतर आरोपी बीड जिल्ह्यातील कारागृहात आहेत. मात्र यांचा येथेही माज कमी झाला नसून जिल्हा कारागृहातील कर्मचारी बाबा कवठेनामक यांना जीवे मारण्याची धमकी देण्यात आली आहे.

यामुळे कराड गँगची जिल्हा कारागृहातही दादागिरी कमी झाल्याचे दिसत नाही. दरम्यान आता या बाबत बीडचे शिवसेना शिंदे गटाचे जिल्हाप्रमुख स्वप्निल गलधर यांची फेसबुक पोस्ट सध्या चांगलीच व्हायरल होत आहे. ज्यात बीड जिल्हा कारागृहात संतोष आण्णाच्या आरोपींनी एका कर्मचाकी बांधवाला बाहेर गेल्यावर मारण्याची धमकी दिल्याचे म्हटले आहे.

दरम्यान जुलै महिन्यातही कराड गँगमधीलच एक आणि कराडचा जवळचा सहकारी संदीप तांदळे याने राष्ट्रवादीचे आमदार जितेंद्र आव्हाड, बीडचे आमदार सुरेश धस आणि बाळा बांगर यांच्याविरोधात अश्लील भाषेत शिवीगाळ केली होती. त्याने आमदारांना शिवीगाळ आणि धमक्या दिल्या होत्या. तसेच वाल्मीक कराड जेलमध्ये असला तरी त्याच्या गुन्हेगारी गँगचे दहशत माजवणं सुरूच असल्याचे म्हटलं होते. त्यावेळी तो व्हिडिओ चांगलाच व्हायरल झाला होता.

तर नुकताच आण्णा बाहेर येणार असाही एक कथित कॉल रेकॉर्डिंगनं बाहेर आली होती. ज्यामुळे राज्यभर खळबळ उडाली होती. ही कॉल रेकॉर्डिंग आमदार धनंजय मुंडे यांच्या एका निकटवर्तीय परळीतील माजी नगराध्यक्ष बाजीराव धर्माधिकारी यांची होती. ज्यात त्यांनी, अण्णा लवकरच बाहेर येत असून दीपक देशमुख साहेबांच्या रडारवर आहेत, त्यामुळे माझ्यासोबत राहा अशी, धमकी दिल्याचे समोर आले होते. या ऑडिओ क्लिपनंतर मोठी खळबळ उडाली होती.

बाजीराव धर्माधिकारी यांचा व्हायरल झालेल्या कॉल रेकॉर्डिंगमध्ये वाल्मिक कराड याची बेल होणार असून, नगरपालिका निवडणुकीत दीपक साहेबांच्या रडारवर आल्याचं म्हटलं होते. ज्यानंतर देशमुख यांनी प्रतिक्रिया देत, माझ्या एकट्याच्या जीविताला भिती नसून, यांचं न ऐकलेले माझ्यासोबत निवडणुकीला उभे राहिले आहेत, त्या सर्वांनाची भीती असल्याचा दावा केला होता.

तसेच त्यांनी वाल्मिक अण्णा जेलमधून बाहेर येणार असून तो सर्व काही साफ करणार आहे. मात्र कोणाला साफ करणार हेही त्याने सांगावं. मला या अगोदरही अनेक धमक्या आल्या असून पोलिसांकडे या कॉल रेकॉर्डिंग संदर्भात दोन वेळा तक्रार केली. मात्र त्यांनी ती घेतली नाही. आता पोलिसांकडे तसा अर्ज केला असून माझ्या जीविताला धोका असल्याचे म्हटल्याचं देशमुख यांनी म्हटलं आहे.

FAQs :

1. संतोष देशमुख हत्या प्रकरणातील आरोपी कोण आहेत?
➡️ वाल्मीक कराड, सुदर्शन घुले, प्रतीक घुले, जयराम चाटे, महेश केदार यांच्यासह इतर आरोपींचा समावेश आहे.

2. आरोपींवर नेमका काय आरोप करण्यात येत आहे?
➡️ जिल्हा कारागृहातील कर्मचाऱ्याला जीवे मारण्याची धमकी दिल्याचा आरोप आहे.

3. ही माहिती कशी समोर आली?
➡️ शिवसेना शिंदे गटाचे जिल्हाप्रमुख स्वप्निल गलधर यांच्या फेसबुक पोस्टमधून ही बाब समोर आली.

4. या घटनेमुळे काय प्रश्न उपस्थित झाले आहेत?
➡️ जिल्हा कारागृहातील सुरक्षा व्यवस्था आणि कायदा-सुव्यवस्थेवर प्रश्नचिन्ह निर्माण झाले आहे.

5. प्रशासनाकडून काय कारवाई अपेक्षित आहे?
➡️ आरोपांची चौकशी करून कारागृहातील सुरक्षेबाबत कठोर पावले उचलण्याची मागणी होत आहे.