Chhatrapati Sambhajinagar Lok Sabha: 'एक्झिट पोल' फोल, ना खैरे ना भुमरे, इम्तियाज जलील आघाडीवर...

Chhatrapati Sambhajinagar : 'एक्झिट पोल'मध्ये लोकसभेच्या छत्रपती संभाजीनगर मतदारसंघातून शिवसेना ठाकरे गट महाविकास आघाडीचे चंद्रकांत खैरे विजयी होणार असा अंदाज वर्तवण्यात आला होता. प्रत्यक्षात मात्र मतमोजणीच्या पहिल्या फेरीच्या निकालात विद्यमान खासदार एमआयएमचे इम्तियाज जलील 3 हजार 338 मतांची आघाडी घेतली आहे.

दुसऱ्या क्रमांकावर महायुतीचे संदीपान भुमरे, तर महाविकास आघाडीचे चंद्रकांत खैरे तिसऱ्या क्रमांकावर आहेत. मराठवाड्याची राजधानी असलेल्या छत्रपती संभाजीनगरच्या निकालाकडे संपुर्ण राज्याचे लक्ष लागले आहे. पोस्टल मतांमध्ये चंद्रकांत खैरे यांनी आघाडी घेतल्यामुळे पहिल्या फेरीतही ते आघाडीवर राहतील, असे वाटत होते.

परंतु पहिल्या फेरीची मतमोजणी सुरू झाली तेव्हा पहिल्यापासून इम्तियाज जलील हे प्रतिस्पर्धी खैरे-भुमरे यांच्या पेक्षा अधिक मते घेऊन आघाडीवर होते. पहिल्या फेरीचा अधिकृत निकाल जाहीर झाला तेव्हा इम्तियाज जलील यांना 19745, संदीपान भुमरे 16407 तर चंद्रकांत खैरे 11429 मते मिळाली.

गेल्या लोकसभा निवडणुकीत निकालाला कलाटणी देणारे अपक्ष उमेदवार हर्षवर्धन जाधव यांना पहिल्या फेरीत फक्त 1676, तर स्वबळावर लढलेल्या वंचित बहुजन आघाडीचे अफसर खान यांना केवळ 1871 मते मिळाली आहेत. पहिल्या फेरीच्या निकालाचा ट्रेंड पुढे कायम राहतो की हे आकडे बदलतात यावर संभाजीनगरचा खासदार कोण? हे ठरणार आहे.

पहिल्या फेरीत एकूण 55185 मतांची मोजणी झाली. यात 160 मतदारांनी नोटाला मतदान केल्याचे समोर आले आहे. इम्तियाज जलील यांना शहरी भागातून मोठ्या प्रमाणात मतदान झाल्याचा अंदाज वर्तवण्यात आला होता.

मुस्लिम बहुल भागात एमआयएमला एकगठ्ठा मिळाली होती, तसेच गेल्या निवडणुकीच्या तुलनेत यावेळी मुस्लिम मतांचा टक्काही वाढला. त्याचा परिणाम पहिल्या फेरीत इम्तियाज जलील यांना आघाडी मिळण्यात झाला आहे. ग्रामीण भागातील मतमोजणीवर संभाजीनगरचा निकाल अवलंबून असणार आहे.