Municipal Corporation news : महापालिकेचे कामकाज पाहण्यासाठी आलेल्या विद्यार्थ्यांसमोर नगरसेवक हमरीतुमरीवर; गोंधळ पाहून मुलं झाली कावरीबावरी...

Chhatrapati Sambhajinagar : शहराचा कारभार हाकणारे नगरसेवक महापालिकेत प्रत्यक्षात कसे काम करतात? हे पाहण्यासाठी शाळेचे काही विद्यार्थी सर्वसाधारण सभेच्यावेळी प्रेक्षक गॅलरीत उपस्थित होते. पण नगरसेवकांना त्याचे काहीच सोयरसुतक नव्हते. त्यांचा नेहमीप्रमाणे सभागृहात गोंधळ सुरू होता. महापौरांच्या आसनासमोर जाऊन आरडाओरड, कागद दाखवून तावातावणे बोलणे हे चित्र पाहून उत्साहाने आलेली मुलं अक्षरशः घाबरून गेली.

विद्यार्थ्यांसमोरच आपले नगरसेवक गोंधळ घालवत आहेत, हे महापौरांच्या निदर्शनास आल्यानंतर त्यांनी विद्यार्थी आपले कामकाज पाहण्यासाठी आलेले आहेत, याचे भान ठेवा, अशा शब्दांत कान टोचले. त्यानंतर कुठे नगरसेवक भानावर आले आणि सभेचे कामकाज सुरळीत सुरू झाले. महापालिकेच्या सर्वसाधारण सभेत कोणत्या विषयावरून वादाचा भडका उडेल याचा नेम नसतो. मंगळवारी (ता. २५) सर्वसाधारण सभेचे कामकाज कसे चालते हे पाहण्यासाठी आलेल्या विद्यार्थी नगरसेवकांचा गोंधळ पाहून गोंधळून गेले होते.

महापालिकेच्या सर्वसाधारण सभेचे कामकाज पाहण्यासाठी हर्सूल येथील संस्कृती ग्लोबल शाळेचे विद्यार्थी आले होते. पत्रकार कक्षातून हे विद्यार्थी कामकाज पाहत असताना सभेचे कामकाजच गोंधळात सुरू झाले. चर्चा घ्यायची की विषय पत्रिकेवर चर्चा करायची? यावरून एमआयएम नगरसेवकांनी आक्षेप घेतला.

सर्वसाधारण सभा प्रत्येक महिन्याच्या एक ते २० तारखेपर्यंत घेणे बंधनकारक असताना ती वेळेत घेतली जात नाही? नगरसेवकांना समोरे जाण्याची तुमची हिम्मत नाही का? अशा तिखट शब्दात विरोधी पक्षनेते समीर साजेद बिल्डर यांनी महापौरांवर हल्लाबोल केला. त्यावर सत्ताधारी पक्षातील नगरसेवक आक्रमक झाले.

दोन्ही कडील नगरसेवक महापौरांच्या आसनासमोर आले. हा गोंधळ पाहून विद्यार्थ्यांची चलबिचल सुरू झाली. ही चलबिचल महापौर समीर राजूरकर यांनी हेरली. त्यांनी शाळेचे विद्यार्थी कामकाज पाहण्यासाठी आलेले आहेत, त्याचे तरी भान ठेवा, अशा शब्दांत नगरसेवकांनी तंबी दिली. त्यानंतर कामकाज सुरळीत झाले.