Municipal Corporation News : महापालिकेसाठी नव्याने होणार प्रभाग रचना; निवडणूक आयोगाच्या आदेशाची प्रतीक्षा!

Chhatrapati Sambhajinagar : स्थानिक स्वराज्य संस्थांच्या निवडणुका चार महिन्यांत घेण्याचे आदेश सर्वोच्च न्यायालयाने दिल्यानंतर शहरातील महापालिका निवडणुकीची चर्चा सुरू झाली आहे. महापालिका प्रशासनाला मात्र निवडणूक आयोगाच्या आदेशाची प्रतीक्षा आहे. 2022 मध्ये महापालिका निवडणुकीच्या अनुषंगाने महापालिकेने 42 प्रभागांची तयारी केली होती. राज्य निवडणूक आयोगाकडून नवे आदेश आले तर नव्याने प्रभाग रचना करावी लागणार आहे.

महापालिकेच्या (Municipal Corporation) निवडणुका पाच वर्षांपासून विविध कारणांमुळे रखडल्या आहेत. ओबीसी आरक्षणाच्या अनुषंगाने सर्वोच्च न्यायालयात याचिका सुरू होती. त्यात मंगळवारी स्थानिक स्वराज्य संस्थांच्या निवडणुका चार महिन्यांत घेण्याचे आदेश सर्वोच्च न्यायालयाने राज्य शासन व निवडणूक आयोगाला दिले आहेत. निवडणुकीची अधिसूचना चार आठवड्यात काढण्याचे आदेश देखील सर्वोच्च न्यायालयाने दिले आहेत.

2022 मध्ये राज्य निवडणूक आयोगाने दिलेल्या आदेशानुसार 126 वॉर्डांसाठी 42 प्रभागांची रचना करण्यात आली होती. (Chhatrapati Sambhajinagar) एका प्रभागात तीन वॉर्डांचा समावेश करण्यात आला होता. महापालिकेच्या क्षेत्रात 115 वॉर्ड होते, वाढती लोकसंख्या लक्षात घेत अकरा वॉर्ड वाढवण्यात आले. त्यामुळे वॉर्डांची संख्या 126 झाली. या वार्डासाठी 42 प्रभाग करण्यात आले. सध्या 42 प्रभागांची रचना अस्तित्वात आहे.

आठवडाभरात होणार चित्र स्पष्ट

सर्वोच्च न्यायालयाच्या मंगळवारच्या आदेशानुसार राज्य निवडणूक आयोग निवडणुकीच्या अनुषंगाने तयारी करेल. येत्या दोन-तीन दिवसांत निवडणुकीबद्दलच्या मार्गदर्शक सूचना महापालिकेला पाठवल्या जातील. त्यानंतर निवडणुकीबद्दलची नेमकी भूमिका स्पष्ट होऊ शकणार आहे.

'सिंगल वॉर्ड'नुसार किंवा तीन वॉर्डांचा एक प्रभाग यानुसार निवडणूक घेण्याचे निर्देश आले, तर महापालिकेला विशेष तयारी करावी लागणार नाही. चार वॉर्डांचा एक प्रभाग करण्याबद्दल मार्गदर्शक सूचना प्राप्त झाल्यास वॉर्ड रचना आणि प्रभाग रचना नव्याने करावी लागणार आहे.