Shivsena UBT News : शिवसेना-भाजपा दोघांकडून उद्धव ठाकरेंच्या पक्षाला धक्का! आता युवा सेनेलाही गळती..

Chhatrapati Sambhajinagar : आगामी महापालिका, जिल्हा परिषद निवडणुकीच्या पार्श्वभूमीवर छत्रपती संभाजीनगरमध्ये शिवसेना आणि भाजपा या दोन्ही पक्षांकडून शिवसेना उद्धव बाळासाहेब ठाकरे पक्षाला धक्के देणे सुरूच आहे. माजी महापौरांनी शिवसेनेची वाट धरल्यानंतर आता युवा सेनेलाही गळती सुरू झाली आहे. युवासेनेचे चिटणीस आणि शिवसेनेचे उपशहरप्रमुख मिथुन व्यास यांनी आपल्या काही कार्यकर्त्यांसह भाजपात जाण्याचा निर्णय घेतला.

भाजपाचे (BJP) प्रदेशाध्यक्ष रविंद्र चव्हाण यांच्या उपस्थितीत हा प्रवेश होत आहे. गेल्याच आठवड्यात माजी महापौर तथा सहसंपर्कप्रमुख त्र्यंबक तुपे यांनी उद्धव ठाकरे यांच्या पक्षाला जय महाराष्ट्र केला होता. शिवसेनेत प्रवेश करणारे ते सातवे माजी महापौर ठरले होते. हा प्रवेश होऊन काही दिवस उलटत नाही तोच आता भाजपाने शिवसेना उद्धव बाळासाहेब ठाकरे पक्षाच्या तरूण, तडफदार कार्यकर्त्यांवर आपले लक्ष केंद्रीत केले आहे.

शिवसेना (उद्धव बाळासाहेब ठाकरे) पक्षाचे (Shivsena) उपशहर प्रमुख तथा युवा सेनेचे चिटणीस मिथुन व्यास हे भाजपाच्या गळाला लागले आहेत. आपल्या आठ ते दहा समर्थकांसह ते आज भाजापचे कमळ हाती घेणार आहेत. भाजपचे प्रदेशाध्यक्ष रवींद्र चव्हाण यांच्या उपस्थितीमध्ये हा प्रवेश सोहळा होत आहे. निवडणुकीच्या तोंडावर लागलेली ही गळती थांबवण्याचा प्रयत्न ना स्थानिक नेते करत आहेत, ना राज्य पातळीवरचे. उलट ज्यांना जायचे, त्यांना जाऊ द्या, अशीच भूमिका वरिष्ठ नेत्यांची असल्याचे आतापर्यंत दिसून आले आहे.

वर्षानुवर्ष पक्षात राहून निवडणुका हाताळणारे नेते, रस्त्यावर उतरून झटणारे तरूण कार्यकर्ते पक्ष सोडून जात असल्याने याचा फटका उद्धव ठाकरे यांच्या पक्षाला निश्चितच होणार आहे. विशेष म्हणजे छत्रपती संभाजीनगरमध्ये शिवसेना उद्धव बाळासाहेब ठाकरे पक्षालाच सर्वाधिक गळती लागल्याचे चित्र आहे. त्यातुलनेत काँग्रेस, राष्ट्रवादी काँग्रेस शरदचंद्र पवार पक्षात फारशा घडामोडी घडताना दिसत नाहीयेत.

या कार्यकर्त्यांचा होणार प्रवेश..

उपशहर प्रमुख युवासेना चिटणीस मिथुन व्यास, उपशहर प्रमुख युवा सेना विष्णू क्षीरसागर, उपशहर प्रमुख संजय महागुडे, उपशहर प्रमुख युवासेना योगेश जोशी, उपशहरप्रमुख युवासेना शैलेश सुरडकर, विभाग प्रमुख गुलमंडी आकाश झुंजरकर, शाखाप्रमुख पंकज जयस्वाल, शाखाप्रमुख प्रभात पुरवार, गटप्रमुख अभिषेक डोंगरे, गटप्रमुख अशितोष खंडेलवाल यांच्यासह रोहित अहुजा, केतन सावजी, तुषार दरक, परेश जैन, तुषार चोरडिया, सचिन बंब,निखिल, सचिन अचलिया, शुभम डेंगे, अभिषेक क्षीरसागर, गुड्डू डोंगरे, अंकित सोनी यांच्यासह पदाधिकारी पक्ष प्रवेश करणार आहे.