Suresh Dhas News : 'देवाभाऊ'चा आश्वासक चेहरा होता म्हणून घड्याळ अन् धनुष्यबाणाला आमची मतं!

BJP Politics : राज्यभरात सध्या सर्वाधिक चर्चेत असलेले भाजपाचे आमदार सुरेश धस यांनी राज्यातील महायुती सरकार सत्तेवर येण्याचे श्रेय मुख्यमंत्री देवेंद्र फडणवीस यांना दिले.देवाभाऊंचा आश्वासक चेहरा पाहूनच मतदारांनी महायुतीला मतदान केले. एवढेच नाही तर आमच्या घटक पक्ष असलेल्या शिवसेना आणि राष्ट्रवादी काँग्रेस पक्षालाही फडणवीस यांच्यामुळेच यश मिळाले, असा दावा धस यांनी केला.

धाराशीव जिल्ह्यातील परांडा येथे एका कार्यक्रमात सुरेश धस (Suresh Dhas) यांनी मुख्यमंत्री देवेंद्र फडणवीस यांचे कौतुक करताना प्रत्येक कार्यकर्त्याला न्याय देणारा नेता म्हणजे देवाभाऊ, असा उल्लेख केला.2024 मध्ये झालेल्या विधानसभा निवडणुकीत फडणवीस यांच्याकडे पाहूनच राज्यातील मतदारांनी महायुतीला भरभरून मतदान केले.

आतापर्यंतच्या इतिहासात एवढे आमदार कधी कोणत्या युतीचे निवडून आले होते का? महायुतीने देवेंद्र फडणवीस (Devendra Fadnavis) यांच्यासारखा स्वच्छ आणि आश्वासक चेहरा दिला म्हणून लोकसभा निवडणुकीतील पराभवानंतर विधानसभेत एवढे मोठे यश मिळाले. केवळ भाजपाच नाही तर मित्र पक्ष असलेल्या एकनाथ शिंदे यांच्या शिवसेना आणि अजित पवार यांच्या राष्ट्रवादी काँग्रेस पक्षालाही याचा फायदा झाला.

देवेंद्र फडणवीस यांच्यामुळेच भाजपाच्या पदाधिकारी, कार्यकर्ते आणि मतदारांनी घड्याळाला मतं दिली. नाहीतर भाजपाने घडळ्याला कधी मतं दिली असती का? असा सवालही धस यांनी यावेळी उपस्थितीत केला. एकनाथ शिंदे यांच्या शिवसेनेशी आमची जुनी मैत्री आहे. प्रत्येक कार्यकर्त्याला न्याय देणारा नेता म्हणून फडणवीस यांच्याकडे पाहिले जाते, असेही धस म्हणाले.

दरम्यान, आयोजकांकडून सुरेश धस यांचा सत्कार केला जात होता, मात्र धस यांनी तो नाकारला. मस्साजोगचे सरपंच संतोष देशमुख यांच्या खुन्यांना जोपर्यंत शिक्षा होत नाही, देशमुख कुटुंबाला न्याय मिळत नाही, तोपर्यंत कुठलाच सत्कार स्वीकारणार नाही, असे सांगत धस यांनी सत्कार नाकारला. धस यांनी सत्काराला नकार दिल्यानंतर व्यासपीठावरील इतरांनीही सत्कारास नकार दिला.